Интихоби дурусти мӯйхушккунак

0
102 просмотров

Аввалин мӯйхушккунакҳо дар соли 1900-ум дар  Олмон пайдо шуда, намуди аҷиб доштанд. Онҳо ҳаҷман калон буда, ҳавои ниҳоят гарм мебароварданд, ки дар вақти ба сар наздик овардан хатари сӯхтани мӯйҳоро доштанд. Нархи чунин мӯйхушккунакҳо ба харидорон гаронӣ мекард. Масалан як ташриф ба толори ҳусн 2 маркаро ташкил медод. Ба нархи баланд нигоҳ накарда, якумин мӯйхушккунакҳо фавран харидорӣ карда шуданд.

Нафароне буданд, ки мӯйхушккунакҳоро на танҳо барои хушккунии мӯй, балки барои табобаткунии тарбод (ревматизм), подагра ва дигар бемориҳои бо гармӣ табобатшаванда, инчунин барои хушккунии мӯи ҳайвоноти хонагӣ, хушккунии пойафзол, ҷойпӯшҳои хоб истифода мебурданд.

Дар замони мо намуди мӯйхушккунакҳо дигаргун гашта, машҳуртарини онҳо ба ширкатҳои дар ҷаҳон маълум «Ровента, Витек, Филипс, Ремингтон»  мансубанд. Мӯйхушккунакҳои муосир сабуквазнанд ва иқтидори баланд дошта, на танҳо мӯйҳоро хушк, ҳамчунин онҳоро ба тартиб медароранд.

Дар вақти харидорӣ намудани мӯйхушккунакҳо ба якчанд тавсияҳо диққат диҳед. Танаи мӯйхушккунак бо пластмассаи ба гармӣ тобоовар сохта шуданаш лозим аст. Бояд мӯйхушккунакҳо реҷаи гуногуни корӣ дошта бошанд, то ки Шумо ҳарорат ва иқтидори ба худ қулайро интихоб намоед.

Мехоҳед мӯйхушккунаки харидорӣ намудаатон ба Шумо солҳои дароз хизмат намояд? Ин тавр бошад, мӯйхушккунакро бештар  дар фасли тирамоҳу зимистон истифода бурдан беҳтар аст. Мӯйхушккунакҳро дар ҳол пас аз шустани мӯй истифода набаред. Гузоред, ки мӯйҳоятон камтар хушк шаванд. Масофаи байни мӯйхушккунак ва сари Шумо бояд 30 сантиметрро ташкил диҳад. Агар  пӯсти саратон хушк бошад, мӯйхушккунакро  камтар  истифода баред, то ки он сабабгори пайдоиши сабӯсаки сар нагардад. Хушк намудани мӯи сари кӯдакон бо мӯйхушккунак  мумкин  аст, лек зарурияти мунтазамро надорад. Хар қадаре, ки мӯйхушккунакро камтар истифода баред, ҳамон қадар беҳтар аст. Умедворед ин тавсияхои мо дар харидорӣ ва истифодаи дурусти муйхушккунаки барқӣ ба Шумо кӯмак хоҳанд кард.

Зарнигори Рустам

Нет комментариев

Также рекомендуем