Иштирок дар чорабинии Наврӯзи маҳаллаи «Раззоқ»

0
322 просмотров

Раиси вилояти Суғд Раҷаббой Аҳмадзода ва Раиси шаҳри Хуҷанд Маъруф Муҳаммадзода бо шоиру нависандагон: Аҳмадҷони Раҳматзод, Муҳиддини Хоҷазод, Дадохони Эгамзод ва ходими давлатию ҷамъиятӣ, собиқадори меҳнат  Биҳоҷал Раҳимова дар тантанаҳои наврӯзии маҳаллаҳои Раззоқ ва Ҷаббор Расулови шаҳри Хуҷанд иштирок намуданд.

Меҳмонон дар маҳаллаи Раззоқи шаҳри Хуҷанд нахуст аз намунаи ҳунарҳои мардумӣ ва маҳсули  кадбонугии муҳассилини макотиби маҳалла ошноӣ намуда, ба ҳунару истеъдод ва маҳорати онҳо аҳсант гуфтанд.

Раиси вилояти Суғд Раҷаббой Аҳмадзода бо аҳли сокинони деҳа, махсусан бо мӯйсафедон сӯҳбати самимӣ намуда, аз онҳо дуи неки наврӯзӣ гирифт. Дар сари деги суманак Раиси вилоят ва ҳамроҳонашон баҳри ободии диёр ва шукуфоии Ватан дуои нек намуданд.


Раиси вилояти Суғд Раҷаббой Аҳмадзода зимни ироаи Паёми наврӯзии хеш ба мардуми маҳалла аз ҷумла таъкид сохт, ки « Бо ибтикороти Асосгузори сулҳу Ваҳдати миллӣ-Пешвои миллат, Президенти мамлакат мӯҳтарам Эмомалӣ Раҳмон имрӯз дар ҳама гӯшаву канори Тоҷикистон ин суннати деринаи аҷдодонамонро мардуми кишвар ба таври васеъ ҷашн мегиранд. Аз рӯи анъанаи дерин дар остонаи иди мубораку фархундаи Наврӯз ҳар як фард ботини худро аз кинаву кудурат пок карда, манзилу хонаи зист, сару либос ва тамоми ашёи рӯзгорашонро тозаю ороста менамоянд. Тибқи таомули қадима хонаҳоро сафед мекунанд, то бахти сафед ҳамеша ёрашон бошад; дастархон меороянд, то файзу баракат аз хонадонашон канда нашавад; гул мегардонанд, то гули бахташон шукуфон бимонад; об мепошанд, то ҳама сол сероб гардад; донаи умед мекоранд, то файзи хирману баракати ҳосил дучанд афзояд.

Муҳимтар аз ҳама дар остонаи иди Наврӯз бо меҳру шафқат ба якдигар оғӯш мекушоянд, беморону ранҷурон ва пирони барнодилро зиёрат менамоянд, ба ятимону бепарасторон кӯмак мерасонанд ва амалҳои неку писандидаро вазифаи муқаддас ва қарзи инсонии хеш мешуморанд.

Таъкид гардид,ки бо ҳидоятҳои Пешвои миллат чанде қабл 7 гузарогоҳи сарҳадӣ бо кишвари ҳамсояи ба мо дӯст Ӯзбекистон ифтитоҳ карда шуд ва ин дар остонаи Наврӯз худ фоли нек аст.

Раиси бахши суғдии Иттифоқи нависандагон, Шоири халқии Тоҷикистон Аҳмадҷони Раҳматзод ва  ходими давлатию ҷамъиятӣ, собиқадори меҳнат Биҳоҷал Раҳимова дар бораи файзу фазилатҳои неки Наврӯз андеша баён карда аз ҷумла таъкид сохтанд, ки Наврўз чун рамзи пайванди азалии инсон бо табиат дар шабу рўзҳои эътидоли баҳориву иваз шудани сол фаро мерасад ва бо расидани он рўзгори кўҳан зиндагиро аз сар мегирад, табиату ҳастӣ рахти нав ба тан мекунад ва дар рўҳу ҷони одамон гардише падид меояд.

Иди Наврўзро, ки бо фарорасии он гармии ҷонбахши баҳорӣ оғоз меёбад, ҷашни шукўҳи табиат ва овони эҳёи он гуфтаанд. Воқеан, Наврўз давраест, ки Замин ба меҳвари Хуршед баромада, рўзу шаб баробар мешавад ва кулли инсону мавҷудотро рўҳу равони тоза бахшида, ба ояндаи нек, рўзгори обод ва пешрафту созандагӣ ҳидоят мекунад.

Барномаи рангини муҳассилини макотиби маҳалла ба чорабинӣ ҳусни дигар зам намуд.

Манбаъ: Дафтари матбуоти Раиси шаҳри Хуҷанд

Нет комментариев

Также рекомендуем