Иштироки Тоҷикистон дар нишасти Шӯрои коршиносони ИДМ оид ба диабет

0
217 просмотров

4–5 апрели соли равон дар шаҳри Мински Беларус нишасти Шӯрои коршиносони кишварҳои ИДМ оид ба масоили диабет    баргузор мегардад.

Тавре аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» хабар доданд, аз ҷониби Тоҷикистон дар кори нишаст намояндагони Сафорати Тоҷикистон дар Минск иштирок хоҳанд кард.

Ба иттилои манбаъ, зимни нишасти Шӯрои коршиносони кишварҳои ИДМ оид ба диабет масъалаҳои татбиқи барномаи ҳамкории кишварҳои ИДМ вобаста ба пешгирӣ ва табобати диабети қанд дар солҳои 2016-2020, ҳамчунин амалӣ кардани пешниҳодҳое, ки дар 28-умин нишасти Шӯро дар самти ҳифзи иҷтимоӣ қабул шуда буд, баррасӣ карда мешаванд.

«Дар доираи амалисозии Барномаи ҳамкории кишварҳои иштирокчии ИДМ оид ба пешгирӣ ва табобати диабети қанд  барои солҳои 2016-2020 дар Тоҷикистон «Барномаи миллии пешгирӣ, ташхис ва муолиҷаи диабети қанд барои солҳои 2012-2017» қабул ва муваффақона татбиқ карда шуд.  Бо шарофати ин барнома беморони дорои диабети қанд бо инсулин ва дигар воситаҳои танзими қанд ройгон таъмин гардиданд.  Ҳамчунин дар марказҳои эндокринологии ҷумҳурӣ «Мактаби диабет» ворид карда шуд, ки ҳамарӯза фаъолияти худро дар самти баланд бардоштани савияи донишҳо оид ба бемории диабети қанд бурда истодаанд»,-хабар доданд аз Вазорат.

Дар ҷараёни кори нишаст маълумот оид ба ҳолати имрӯзаи беморони дорои диабети қанд дар Тоҷикистон пешниҳод карда хоҳад шуд.

Ба иттилои Маркази клиникии эндокринологии ҷумҳурӣ, соли 2018 дар кишвар расман беш аз 44 ҳазор нафар беморони дорои диабети қанд ба қайд гирифта шудаанд. Аз ин шумора теъдоди нафарони ба  намуди аввалаи ин беморӣ гирифторшуда беш аз 4 ҳазорро ташкил дода, ба намуди дуюм зиёда аз 40 ҳазор нафар шомил шудаанд.

Ба ғайр аз ин тақрибан 1 ҳазор нафар кӯдакони синни аз 0 то 18- сола гирифтори ин беморӣ мебошанд.

Манбаъ: АМИТ «Ховар»

Нет комментариев

Также рекомендуем

%d такие блоггеры, как:

Сообщить об опечатке

Текст, который будет отправлен нашим редакторам: