Кӯдаки 3-сола пойтахти 150 давлатро номбар кард

0
858 просмотров

Нӯъмон ва Ориён Мирзоёровҳо фаъолона бо ёрии падарашон ҷуғрофия, саҳеҳтараш парчаму давлатҳои ҷаҳон ва пойтахтҳои онҳоро меомӯзанд. Давоми чанд ҳафтаи омӯзиш бародарон номи беш аз 150 давлат ва пойтахтҳои онҳоро акнун азёд медонанд. Кӯдакон бисёр мехоҳанд, ки иштирокчии барномаи Максим Галкин «Лучше всех» (Беҳтарин) бошанд.

Ориёни 5-сола аллакай номи 150 кишвари дунё бо пойтахташро дониста, ҳамчунин парчами ин кишварҳоро мешиносад. Нуъмони 3-сола алҳол бурро гап зада наметавонад, лекин намехоҳад, ки аз бародараш қафо монад. Ӯ номи кишварҳо ва пойтахти онҳоро бо лафзи кӯдаконаи худ мегӯяд.

Навори видео, ки дар он Нуъмон номи пойтахтҳоро номбар мекунад, дар муддати ҳамагӣ чандин рӯз ҳаводорони зиёде пайдо карда, мо тасмим гирифтем, ки дар бораи оилаи онҳо маълумоти бештар дарёбем. Маълум шуд, ки дӯстдории фанни ҷуғрофияро ба онҳо падарашон Хотирмурод талқин кардааст.

«Ман ҳам дар хурдӣ ба ҷуғрофия шавқу рағбат доштам, дар ин мавзӯъ китоб мекофтам, вале кор чунин сурат гирифт, ки касби дигарро интихоб намуда, баъдан барои таъмини рӯзгор лозим омад, ки ба Русия рахти сафар бандам», — мегӯяд ӯ.

                                                Бозии маърифатии шомгоҳӣ

Хотирмурод бо аҳли оилааш дар деҳаи Урметан, 40 километр дуртар аз маркази ноҳияи Айнии вилояти Суғд зиндагонӣ мекунанд.

Картинки по запросу деҳаи Урметан

Ҳар бегоҳӣ дар хонаи Мирзоёровҳо ба мисли машғулияту бозӣ ҳамаи аҳли оила кишварҳои дунё, пойтахт ва парчами онҳоро меомӯзанд.

«Ин тасодуфӣ рух дод, Ман саволу ҷавоб бо кӯдаконро натанҳо бо фарзандони худам, балки бо кӯдакони ҳамсоя низ дӯст медорам. Боре вақти дарстайёркунии бародари хурдӣ Ориён бо ишора ба парчами Тоҷикистон гуфт, ки ин парчами кишвар  мост. Аз ҳамон вақт ин машғулияти ҷуғрофии мо оғоз шуд. Писарчаи хурдӣ Нуъмон ҳам дар ин саволу ҷавобҳо ҳузур дошта, ҳамаро ба ёд мегирифтааст», — қайд кард Хотирмурод.

Дар яке аз бегоҳиҳо писари хурдиаш ба саволҳои додааш ба писари калонӣ ҷавоб дода, номи давлату пойтахтҳои онҳоро номбар кардан мегирад.

«Акнун ҳамроҳ ҷуғрофияро меомӯзем. Як китобу донишҳои ман кофӣ набуд. Аз ин рӯ, аз дӯстам хоҳиш кардам, ки аз интернет ба ман рӯйхати пурраи давлат ва пойтахтҳои онҳоро фиристад, баъд ба мо харитаи ҷаҳон туҳфа карданд ва акнун кӯдакон ҷойгиршавии давлатҳоро дар харита низ медонанд», — мегӯяд ӯ.

Саволу ҷавобҳо дар хонаи Мирзоёровҳо ҳар бегоҳ ба анъана табдил ёфта, баъзан кӯдакони ҳамсоя ва ҷиянҳои Хотирмурод низ ба он ҳамроҳ мешаванд.

«Мутаассифона, адабиёт бо забони тоҷикӣ дар ин бора хеле кам аст, ҳарчанд дар китобхонаи падари ман — омӯзгори нафақахӯр беш аз 200 китоб ҳаст, лекин ин миқдор кофӣ нест», — мегӯяд номбурда.

Дар робита ба хоҳиши кӯдакон дар бораи «иштирокашон дар барномаи телевизионӣ», ӯ изҳор мекунад, ки ин он қадр муҳим нест.

«Ман барномаи Галкинро, ки дар он кӯдакон қобилиятҳои худро нишон медиҳанд, дидаам ва дар ин бора ба писаронам нақл кардам. Албатта онҳо меоҳанд, ки дар он иштирок кунанд, вале мо алҳол ба ин имкон надорем, чунки хароҷоти сафар ба Маскав зиёд буда, ғайр аз ин, онҳо ҳоло забони русиро хуб намедонанд. Дар назди одамони бегона хеле зиёд шарм дошта, саросема мешаванд», — мегӯяд падар.

                                                            Парандаҳои муҳоҷир

Хотирмуроди 30-сола аллакай охири моҳи март барои таъмини рӯзгор ба Екатеринбург меравад. Ӯ бо ихтисоси телекоммуникатсия ва технологияҳои иттилоотӣ Донишгоҳи давлатии Хуҷандро хатм карда, лекин дар ватан кору маоши шоиста ёфт нашуд.

Похожее изображение

«Мо аз соли 2011 ҳамин тарз зиндагӣ дорем. Тирамоҳ ба муддати 4-5 моҳ ба хона омада, сипас ним сол ба муҳоҷират меравам. Мехоҳам муддати зиёдтаре бо фарзандонам бошам, чунки онҳо маро муддатҳои зиёд намебинанд», — иброз медорад вай.

Пеш аз ба муҳоҷират рафтан ӯ дар ҷойҳои гуногун кор кард, аз ҷумла дар шаҳри Хуҷанду ноҳияи Айнӣ, лекин маош кофӣ набуд, ки ба оила кумакаш расад. Баъди оиладор шудани Хотирмурод, тасмим гирифта шуд, ки ӯ низ бояд ҳамроҳи бародари калониаш барои пулкоркунӣ ба Русия равад.

«Ҳуҷҷатҳои маро корфармо дуруст карда, пулашро худам медиҳам. Бастаи ҳуҷҷатҳо бо патенти маблағаш барои 6 моҳ пардохтшуда дар Екатеринбург 40 ҳазор рубл арзиш дорад», — мегӯяд ӯ.

Айни замон ӯ дар сохтмон кор карда, моҳона ба ҳисоби миёна 25 ҳазор рубл маош мегирад. Нисфашро ба хона мефиристад, ки ин маблағ барои зиндагии оилааш дар деҳа кофӣ аст. Ӯ афсӯс мехӯрад, ки ба наздикӣ боз ба муҳоҷират меравад, зеро мехоҳад, ки бо фарзандонаш бештар якҷо буда, дониши онҳоро такмил диҳад.

«Ҳамаи кӯдакон қобилиятҳои хос доранд, ки фарзандони ман ба ин мисол шуда метавонанд. Ҳамагӣ дар як моҳи машғулият онҳо ба чунин натиҷаҳо расиданд. Мутаассифона, бисёре аз падарон маҷбуранд, ки ба муддати зиёд хонаҳояшонро тарк кунанд ва кӯдакон ба ҳоли худ гузошта мешаванд. Кӯдакон ояндаи мо мебошанд. Лекин дигар илоҷ нест, ман бояд равам», — зикр кард вай.

Хотирмурод умедвор аст, ки баъди ба муҳоҷират рафтани ӯ кӯдаконаш машғулиятҳоро фаромӯш намекунанд. Ӯ кӯшиш мекунад, ки тариқи телефон ҷараёни омӯзиши онҳоро назорат кунад, лекин алоқаи қимат на ҳамеша барои ин имкон медиҳад. Тирамоҳ зимни аз муҳоҷират баргаштан Хотирмурод ният дорад, ки барои фарзандонаш китобҳои зиёде биёрад, то ки бегоҳиҳои зимистон бо кӯдакон ба омӯзиш машғул шаванд.

Манбаъ: Сомонаи расмии Агентии иттилоотии «Азия плюс»

Нет комментариев

Также рекомендуем

Қурби расмии асъор барои имрӯз 29.12.2017

Бонки миллии Тоҷикистон (БМТ) 29 декабр қурби расмии асъори хориҷиро бо мақсади ҳисобгирии муҳосибӣ ва пардохтҳои гумрукӣ чунин муайян кардааст: 1 доллари ИМА = 8.8248 ...