Дар асоси фармони Сарфармондеҳи Олии Қувваҳои Мусаллаҳи Ҷумҳурии Тоҷикистон, Пешвои миллат, Президенти кишвар, мӯҳтарам Эмомалӣ Раҳмон «Дар бораи ба эҳтиёт рухсат додани хизматчиёни ҳарбие, ки мӯҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1989-1998 Ҷумҳурии Тоҷикистон ба хизмати ҳарбӣ», аз 1-уми апрели соли 2016 дар тамоми шаҳру навоҳии мамлакат даъвати баҳории шаҳрвандон ба хизмати ҳатмии ҳарбӣ оғоз гардид. Дар нахустин рўзи ин маъракаи муҳими сиёсӣ аввалин шуда дар ҷумҳурӣ ноҳияи Кӯҳистони Мастчоҳ ва баъдан шаҳри Истиқлоли вилояти Суғд аз иҷрои пурраи нақшаи даъват гузориш доданд.
Қобили зикр аст, ки дар баробари даъвати ҷавонписарони аз 18 то 27 солаи Ҷумҳурии Тоҷикистон инчунин тибқи талаботи ин фармон ва мутобиқи моддаи 7 Қонуни Ҷумҳурии Тоҷикистон «Дар бораи мудофиа» хизматчиёни ҳарбие, ки мӯҳлати муқарраргардидаи хизмати ҳарбиро адо намудаанд, моҳҳои апрел-майи соли 2016 аз сафи Қувваҳои Мусаллаҳи Ҷумҳурии Тоҷикистон, қӯшунҳои сарҳадии Кумитаи давлатии амнияти миллии Ҷумҳурии Тоҷикистон, Гвардияи миллии Ҷумҳурии Тоҷикистон, қӯшунҳои дохилии Вазорати корҳои дохилии Ҷумҳурии Тоҷикистон, қӯшунҳои мудофиаи граждании Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ва Бригадаи посбоникунандаи Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон ба эҳтиёт рухсат дода шаванд.
Илова бар ин, раисони шаҳру ноҳияҳо бо дарки масъулият якҷо бо комиссариатҳои ҳарбӣ барои амалӣ намудани муқаррароти моддаи 23 Қонуни Ҷумҳурии Тоҷикистон «Дар бораи ӯҳдадории умумии ҳарбӣ ва хизмати ҳарбӣ» даъвати муташаккилонаи шаҳрвандонро ба хизмати ҳарбӣ ба роҳ монанд.
Бояд тазаккур дод, ки шумораи ҷавонони синну соли даъватӣ нисбат ба талаботи Қувваҳои Мусаллаҳ хеле зиёд аст ва ин ба масъулини мақомоти вобастаи давлатии даъват имконият медиҳад, ки аз байни онҳо беҳтаринҳо ҷудо карда шаванд. Зеро, натиҷаҳои чорабиниҳои даъватӣ ба вазъи омодагии Қувваҳои Мусаллаҳ таъсири бевосита мерасонад. Аз ин сабаб масъулини даъват кӯшиш мекунанд, ки танҳо ҷавонони солиму бардам ва болаёқат ба хизмати ҳатмии ҳарбӣ даъват карда шаванд.
Боиси хурсандист, ки сол аз сол сафи ихтиёриён ба хизмати ҳақиқии ҳарбӣ аз ҳисоби ҷавонони далеру шуҷоъ меафзояд. Комиссари ноҳия ба наваскарон тани сиҳату хизмати содиқона таманно намуд. Падару модарони наваскарон аз ихтиёрӣ хизматро пеша кардани фарзандону наберагон изҳори хурсандӣ карда, ба онҳо роҳи сафеду хизмати софдилона орзу карданд. Гусели наваскарон бо ҳунарнамоии кормандони шӯъбаи фарҳанги ноҳия сурат гирифт.
Санаи 1-уми апрели соли равон дар вазъияти ботантана гурӯҳи калони ҷавонони далеру шӯҷоъ ва ватандӯст, ки ихтиёрӣ ба комиссариати ҳарбӣ ҳозир шуда буданд, пас аз гузаштан аз комиссияи муоинаи тиббӣ ба сафи Қувваҳои мусаллаҳи Ҷумҳурии Тоҷикистон сафарбар гардиданд.
Дар ҷамъомадҳое, ки ба ин муносибат дар комиссариатҳои ҳарбии ноҳияву шаҳрҳо доир гардиданд собиқадорони ҷангу меҳнат, падару модарон иштирок доштанд. Онҳо дар баромади худ қайд намуданд, ки хизмат дар сафҳои Қувваҳои мусаллаҳи Ҷумҳурии Тоҷикистон қарзи муқаддас барои ҳар ҷавонмарди ватандӯст ба ҳисоб меравад. Боварӣ ҳаст ҷавонони ватандӯсти кишвар, ки имрӯз ихтиёрӣ баҳри хизмат омадаанд, дар ҳимояи марзу буми Ватан чун дигар родмардони дар хизматбуда содиқ хоҳанд буд.
Вазири мудофиа ба қабули волидони даъватшавандагон дар маҳалҳо дастур дод.
Дирӯз Вазири мудофиаи Тоҷикистон генерал-лейтенант Шералӣ Мирзо бо иштироки комиссарони ҳарбии шаҳру навоҳӣ ва вилоятҳои ҷумҳурӣ машварати корӣ баргузор ва масъалаҳои марбут ба ташкили маъракаи даъвати баҳорӣ ба хизмати ҳарбӣ дар сафи Қувваҳои Мусаллаҳи кишварро баррасӣ намуд.
Котиби матбуотии Вазорати мудофиаи кишвар полковник Фаридун Маҳмадализода дар ин робита иттилоъ дод, ки вазир назди ҳозирини машварат оид ба ташкили маъракаи даъват дар доираи қонунгузории кишвар ва хотима бахшидан ба даъвати маҷбурӣ (облава) вазифаҳои мушаххас гузоштааст.
Вазири мудофиа ба комиссарони ҳарбии шаҳру навоҳӣ ва вилоятҳо дастур дод, ки қабули шаҳрвандон оид ба масоили даъватро дар комиссариатҳои маҳаллӣ ба роҳ монанд, то ки аз муроҷиати волидон ба сохторҳои ҷумҳуриявӣ доир ба масъалаи ҳалли имконпазир дар сатҳи маҳаллӣ пешгирӣ карда шавад».
Шералӣ Мирзо қайд кардааст, ки шумори шаҳрвандони синнусоли мувофиқи даъват ба хизмати ҳарбӣ аз талаботи Қувваҳои Мусаллаҳи кишвар бамаротиб зиёд аст ва ин имкон медиҳад, ки танҳо шаҳрвандони босаводу бомаърифат ва солим ба хизмат даъват карда шаванд.
Маъракаи даъвати баҳорӣ ба хизмати ҳарбӣ дар ҷумҳурӣ 1-уми апрел оғоз гардида, то 31-уми май идома меёбад. Ба хизмати ҳатмии ҳарбӣ шаҳрвандони синнусоли аз 18 то 27-сола, ки барои мавқуф гузоштани хизмат ё озод шудан аз он ҳуқуқ надоранд, даъват карда мешаванд. Ба корҳои ташкили маъракаи даъват ба хизмати ҳарбӣ дар маҳалҳо бевосита раисони шаҳру навоҳӣ ва вилоятҳо масъул мебошанд.
Бояд гуфт, ҳамасола ба хизмат дар сафи Қувваҳои Мусаллаҳи кишвар тақрибан 15-16 ҳазор нафар даъват карда мешаванд. Дар Тоҷикистон зиёда аз 600 ҳазор нафар ҷавонони синнусоли мувофиқ ба хизмати ҳарбӣ ба сар мебаранд, аммо ҳудуди 150 ҳазор нафари онҳо мӯҳлати хизматашонро мавқуф гузоштаанд ё аз хизмат озод карда шудаанд ва ё барои хизмати ҳарбӣ коршоям нестанд. Боз ҳудуди 100 ҳазор нафар шаҳрвандони синнусоли мувофиқ ба хизмати ҳарбии Тоҷикистон дар муҳоҷирати корӣ қарор доранд.
Қувваҳои Мусаллаҳи Тоҷикистон аз се навъи ҷузъу том – Қӯшунҳои зудамал, хушкигард, Қувваҳои ҳарбӣ-ҳавоӣ ва мудофиаи зидди ҳавоӣ иборат аст.
Тибқи муқаррароти Фармони Сарвари давлат ва талаботи Қонуни Ҷумҳурии Тоҷикистон «Дар бораи ӯҳдадории умумии ҳарбӣ ва хизмати ҳарбӣ» раисони шаҳру ноҳияҳо ҷиҳати дар сатҳи зарурӣ ташкил намудани ин чорабинии муҳим масъул мебошанд. Барои муташаккилона гузаронидани маъракаи даъват ба сафи Қувваҳои Мусаллаҳ мақомоти иҷроияи маҳаллии ҳокимияти давлатӣ ва комиссияҳои даъватӣ кори зиёди тарғиботӣ ва сафарбаркуниро бояд ба ҷо оваранд. Андешидани тадбирҳои зарурӣ натиҷаи мусбат хоҳад дод.
Исломҷон Бобоев
Нет комментариев