КАҶОЛ: МАН МАЪШУҚАИ ШОҲРУХ ХОН НЕСТАМ!

0
89 просмотров

Каҷол Девган (қаблан Мукҳерҷӣ) ниёз ба муаррифӣ надорад, зеро ӯ ҳунармандест, ки аз номаш сар карда, то ҳунару маҳораташ, ҳама ғайриодианд. Дар зиёда аз 35 филми истеҳсоли синамогарони ҳинд нақшҳои ҷолибу хотирмон офарида, сазовори чандин ҷоизаҳои ватаниву хориҷист. Суҳбати моро атрофи кору зиндагиаш дар зер бихонед.

-Каҷол, чӣ сабаб шуд, ки шумо ба синамо рӯй овардед?

-Ба синамо рӯй овардани ман тасодуфӣ нест, зеро хонаводаи мо қариб ҳама ҳунарманд буданду ҳастанд. Падарам Шому Мукҳерҷӣ (1943-2008) коргардон ва наворбардор буданд. Модарам Тануҷа Самарт (1943) аз 7-солагӣ дар филмҳо нақш меофариданд ва 58 соли умри худро барои рушди синамои ҳинд дареғ надоштанд. Ҳатто холаам Нутан Самарт (1936-1991) ва бибиям Шобҳана Самарт (1916-2000) ҳунарпешаҳои синамо буданд. Хоҳарам Таниша Мукҳерҷӣ (1978) низ ҳамкасби ман аст.

-Аз оне, ки шуморо маъшуқаи Шоҳрух Хон мегӯянд, асабӣ ва дилмонда намешавед?

-Одат кардаам, зеро қариб 30 сол мешавад, ки ин овозаҳоро мешунавам. Соли 1993 дар дувумин филми худ “Бозӣ бо марг” бори нахуст бо Шоҳрух Хон нақш офаридам. Баъди намоиши филм овоза карданд, ки гӯё ман маъшуқаи Шоҳрух Хон бошам. Пас аз он филм бо Шоҳрух Хон дар 10 филми дигар нақш офаридаам ва ин овозаҳо то ҳол ба гӯшам мерасанд.

-Шавҳаратон баъди ин овозаҳо рашк карда, шуморо зери мушту лагад намегирад?

-Дар 21 соли зиндагии якҷояамон шавҳарам боре ба ман даст набардоштааст. Ӯ худ ҳунарманд аст ва маро дарк мекунад. Баъдан Шоҳрух Хон ҳамкор, дӯст ва як шахси наздик барои мо ба ҳисоб меравад. Тамошобин ин чизҳоро аз паси экран фаҳмида наметавонад.

-Аз шиносоии худу шавҳаратон каме қисса мекунед?

-Ману Аҷай соли 1995 дар рафти наворбардории филми “Оила ва қонун” шинос шудем. Давоми 4 сол ҳамдигарро омӯхтем ва барои ба ҳаёти мустақилона қадам гузоштан омодагӣ дидем. Ниҳоят 24-уми феврали соли 1999 ман ба висоли марди орзуҳоям расидам.

-То соли 2001 фаъолияти шумо чашмрас буд. Баъдан яку якбора саҳнаи ҳунарро тарк кардед. Сабаб чӣ буд?

-Бале, дар ин мобайн қариб 5 сол дар саҳна набудам. Соли 2003 духтарам Нисо ба дунё омад ва худро ба тарбияи ӯ бахшидаму аз саҳнаву ҳаводоронам дур шудам.

-Пас, чаро баъди таваллуди писаратон низ тарки саҳна накардед?

-Аз шумо рӯзноманигорон роҳи халосӣ нест (механдад). Дуруст мегӯед, ки баъди таваллуди писарам Юг ман танаффус эълон накардам. Яъне, ҳам кор мекардам ва ҳам ба тарбияи фарзандонам машғул будам. Гап сари он аст, ки вақти таваллуди Нисо наметавонистам, ки дар як вақт ҳам кор кунаму ҳам барои тифли навзодам модар бошам, чун таҷрибаи кофӣ надоштам. То таваллуди Юг ман хеле чизҳоро омӯхтам.

-Шавҳаратон дар корҳои хона ба шумо кӯмак мерасонад ё ҳар ду ҳам ситораҳои Болливуд ҳастем гуфта, се вақт дар тарабхона хӯрок мехӯреду дар хонаатон хизматгор доред?

-Аслан, зиндагии ҳунармандон аз зиндагии мардуми одӣ он қадар фарқи калон надорад. Фарқ ҳамин аст, ки мо зиёдтар кор мекунем ва шинохта ҳастем, дигар ҳеҷ. Шукр, ки Нисо калонак шудаасту корҳои хонаро мекунад. Аҷай ҳам гоҳ-гоҳ агар илҳомаш биёяд, дасту остин барзада, барои мо хӯрок омода мекунад. Вале то маҷбур нашавам, на духтарам ва на шавҳарамро ба иҷрои коре маҷбур намекунам. Худам ҳоло ҳам чун духтаракони 18-сола чусту чолок ҳастам (механдад).

-Бе падар калон шудан душвор аст?

-Падарам баъди 10 соли оиладориашон аз модарам ҷудо шуда бошанд ҳам, аммо ман намегӯям, ки бепадар калон шудам. Падарам то дами марг меҳрубониашонро аз ману хоҳарам дареғ намедоштанд. Баъди вафоти падарам, модарам барои мо ҳам модар асту ҳам падар.

Манбаъ: https://oila.tj/news/kaol-man-mashuai-shorukh-khon-nestam

Нет комментариев

Также рекомендуем

%d такие блоггеры, как:

Сообщить об опечатке

Текст, который будет отправлен нашим редакторам: