Карина Комил: Ман бо писари Том Круз танҳо дӯст мебошам

0
80 просмотров

Карина Комил бонуи ҳунар ва зебоист. Ӯ дар муддати кӯтоҳ бо сурудҳои ҷаззобу дилнишин ва клипҳои диданӣ байни мардум шинохта гардида, мухлисони худро пайдо намудааст.

Ин сарояндаи хушовози тоҷик айни ҳол дар шаҳри Дубай қарор дошта, вале аслан дар шаҳри Екатеринбурги Федератсияи Россия зиндагӣ мекунад. Мо бо мақсади ошноии хубтар бо ҳаёту фаъолияти Карина Комил суҳбат намудем, ки муҳтавои онро барои хонандагони Медиапортали «Тироз» пешкаш мегардонем.

— Ассалому алейкум, мехоҳам суҳбатамонро аз хабарҳои тозае, ки оид ба зиндагӣ ва фаъолияти Шумост, оғоз намоем.

— Салом алейкум, аввалин хабари мароқангез ин аст, ки клипи навам баромад. Ҳамчунин гуфтан мехоҳам, ки ба шаҳри Сан-Франсиско рафта будам ва ҳамроҳи дугонаам дар як шабнишинӣ иштирок кардам. Он ҷо писари Том Круз менавохт ва мо бо вай шинос гардида, якҷоя расм гирифтем. Ман он расмро дар саҳифаи инстаграми худ ҷой дода, номи Коннор Крузро ишора намудам. Баъди он, ВАО-и Амрико навиштаанд, ки гӯё ман бо Коннор Круз вомехӯраму муносибат дорам, вале ингуна нест. Ман бо писари Том Круз танҳо дӯст мебошам ва то ҳол суҳбат мекунам, аммо пас аз он воқеа дигарбора ба Амрико парвоз накардаам.

— Бисёр хуб, Шумо дар куҷо ва чи хел оила ба дунё омадед?

— Падару модарам дар Россия ба дунё омадаанд ва ман низ 5-уми март солашро намегӯям (механдад) дар шаҳри Краснокамски Россия таваллуд шудаам. Ҳангоми чордаҳсолагиам волидонам маро ба хонаи бобоям, ки дар шаҳри Душанбе мебошад, фиристоданд ва ман дар ин шаҳр якчанд сол зиндагӣ карда, забони тоҷикиро омӯхтам. Чунки падару модарам бо забони тоҷикӣ гап намезаданд. Падари ман варзишгар (хоккеист) ва модарам муаллимаи забони русӣ мебошанд. Ташаккур ба модарам, ки аз кӯдакиам мехост дар ҳама намуди соҳаҳо худро кам кам санҷида бинам ва ба худам писандашро интихоб намоям. Ниҳоят, ҳофиза шуданро интихоб кардам.

— Карина Комил, оид ба ному насабатон чӣ гуфтанӣ ҳастед?

— Номи аслиам Карина буда, Комил номи падарам аст. Ӯро хеле дӯст медорам. Ман хоҳари калонӣ ҳам дорам, ки номаш Комила мебошад. Афсӯс, ки ҳамин номро ба ман нагузоштанд (механдад). Ба ман чизҳои ғайриоддӣ маъқул аст. Бинобар ин хостам, ки дар насабам номи падарамро ҳамчун тахаллус қабул намоям.

— Беҳтарин! Чӣ сабаб шуд, ки сароянда шудед?

— Аз хурдӣ ба санъат шавқу рағбати зиёд доштам. Дар айёми чордаҳсолагӣ бо дугонаҳоям реп мехондем, дар озмуну чорабиниҳои давлатӣ иштирок мекардем ва машҳур гашта будем. Тибқи гуфтаи модарам, ӯ низ дар вақташ мехостааст, ки ҳунарпеша шавад, вале модараш розӣ нагардидааст. Модарам зани замонавӣ ва фарҳангдӯст буда, эҳсоси хуби интихоби мӯдро дорад. Бародарам ҳам дар яке аз гурӯҳҳои рокӣ ҳамчун таббол (нақорачӣ) фаъолият мебурд. Хулоса, оилаи мо оилаи санъаткор мебошад. Бояд бигӯям, ки якуним сол пеш консерти Мино дар шаҳри Москва шуда буд. Дар консерти мазкур бо ҳофиз ва бастакори ҷавон Руслани Умарзод вохӯрдам. Маҳз ӯ барои ҳофиза гардидану дар ин ҷода фаъолияти ҷиддиро сар карданам сабаб шуд. То имрӯз бо Руслан ҳамкорию дӯстӣ дорам.

— Дар санъат киро устоди хеш меҳисобед?

— Устоди ман Руслани Умарзод буда, то ҳол ба ман ёд медиҳад. Бисёр вақт занг зада мегӯяд, ки Карина чӣ кор карда истодаӣ? Машқ кун! Кор надорӣ? Доим суханаш ҳаминхел аст (механдад).

— Ғайр аз Руслани Умарзод боз бо киҳо ҳамкорӣ доред?

— Ман танҳо бо Руслан ва дӯсташ Шоҳрухи Соҳиб, ки ӯ низ бастакори сурудҳоям ба ҳисоб меравад, ҳамкорӣ мекунам.

— Консерти Шумо кай барпо гашта буд?

— Консерти ман ҳамроҳи Руслани Умарзод 15-уми декабр, пеш аз соли нави 2018 баргузор гардид, ки дар он 12 сурудамро пешкаши мухлисон кардам.

— Нахустин сурудатон кадом аст?

— Якумин суруди ман бо номи “Ҷон лай лай” мебошад, ки аз ҷониби шодравон Тоҷиддин Муҳиддинов ва Муқаддас Набиева иҷро гардида буд. Мо ин сурудро бо Руслани Умарзод дуэт хондем.

— Суруде, ки Шуморо машҳур карду ҳама бо номи Карина Комил шинохтанд, кадом аст?

— Ба фикри ман суруди “Ҷон лай лай”, барои он ки ин сурудамро  аз “Ютуб” зиёд тамошо кардаанд. Инчунин ба ман занг зада мегӯянд, ки суруди “Тоҷикбача” хеле маъруф мебошад. Аз он лиҳоз, ки ман дар Тоҷикистон нестам ҳаминхел баҳо медиҳам, ки ҳамин ду суруд маро шинохта кард.

— Ягон асбоби мусиқиро навохта метавонед?

— Бале, скрипка навохта метавонам. Ман 4 сол бо скрипканавозӣ машғул шудаам.

Дар охир мо — кормандони Медиапортали «Тироз» ба ин бонуи ҳунар барори кору муваффақиятҳои беназирро орзумандем.

Нет комментариев

Также рекомендуем