Клипи нави Ҷонибек Муродов, хонандаи попи тоҷик ва Сардор Раҳимхон, ҳунарманди хизматнишондодаи Ӯзбекистон зери унвони “Дӯстон” тайи як рӯзи нашр дар Ютуб даҳҳо ҳазор тамошобин пайдо кард.
Ҷонибек Муродов дар сӯҳбат ба хабарнигорон гуфт, Сардор яке аз дӯстони дерина ва хеле хуби ӯ мебошад, аз ин рӯ тасмим гирифтаанд, то суруди муштарак таҳия кунанд.
Матни таронаи “Дӯстон” ба қалами шоири соҳибқалам Толиб Карими Озарахш тааллуқ дошта, ба гуфти Ҷонибек клипу тарона дар шаҳрҳои Тошканд ва Киев сабт шудааст.
Ин аввалин дуэти Ҷонибек нест, ки мавзӯи аслиаш дӯстӣ аст. Соли 2014 ӯ бо Валиҷон Азизов таронаи “Дӯстӣ”-ро иҷро карда буд.
Ҷонибек Муродов 29-уми майи соли 1986 дар шаҳри Хуҷанд таваллуд шудааст. Ӯ фарзанди сарояндаи маъруф Ҷурабек Муродов мебошад. Дар соли 2003 Ҷонибек мактаби миёнаи «СОМНИН»-ро хатм намуд ва ба коллеҷ дохил шуда, онро бо ихтисоси — забони арабӣ ба итмом расонд.
Дар солҳои 2006-2007 Ҷонибек Муродов дар ҳайати гурӯҳи мусиқии «Вазир» фаъолияти эҷодӣ намуд. Аз соли 2007 инҷониб вай дар танҳоӣ баромад менамояд.
Ҳунарманди хизматнишондодаи Ӯзбекистон Сардор Раҳимхон 3-юми сентябри соли 1981 дар шаҳри Тошканд ба дунё омадааст. Пас аз хатми мактаби миёна дар соли 1998 вай ба Донишгоҳи давлатии техникии Тошканд, факултети «Электроника, автоматика ва техникаи ҳисоббарор» дохил шуд.
Фаъолияти эҷодии Сардор соли 2000 дар Шабакаи радиоии «Сезам»-и шаҳри Тошканд оғоз гардид, ки дар он вай барандаи барномаҳои ӯзбекӣ буд. Дар як вакт Сардор дар озмуну фестивалҳои мухталифи суруду мусиқа дар Ӯзбекистон иштирок намуд.
Соли 2002 Сардор дар Фестивали «Номҳои нав» иштирок ва мақоми аввалро ба даст овард. Каме баъдтар дар соли 2003 дар озмуни «Овози тиллоӣ» ғолиб дониста шуд.
Соли 2005 ба Сардор маъруфияти воқеӣ дар Ӯзбекистон насиб гардид. Моҳи августи соли 2009 Президенти Ҷумҳурии Ӯзбекистон Ислом Каримов ба Сардор Раҳимхон унвони ифтихории «Ҳунарманди шоистаи Ӯзбекистон»-ро тақдим намуд.
Манбаъ: Сомонаи Тоҷикистон таймс
Нет комментариев