Дар доираи баргузории Фестивали байналмилалии ҷавонону донишҷӯёни аъзои давлатҳои ИДМ ва Созмони ҳамкориҳои Шанхай таҳти унвони «Тоҷикистон ва Роҳи Абрешим: таърих ва замони муосир» дар истироҳатгоҳи “Шоҳин”, воқеъ дар шаҳри Гулистон маросими ифтитоҳи мактаби тобистонаи иҷтимоӣ-инноватсионӣ барои иштирокчиёни фестивал баргузор шуд.
Муовини Раиси вилоят Назира Ғаффорӣ аз номи роҳбарияти вилоят иштирокчиёни Фестивали байналмилалиро ба вилояти Суғд хайрамақдам гуфт. Таъкид гардид, ки Тоҷикистон бо сарварии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо кишварҳои дуру наздик, аз ҷумла Иттиҳоди Давлатҳои Мустақил ва Созмони ҳамкориҳои Шанхай муносибатҳои хубу ҳасанаро ба роҳ мондааст, ки натиҷаи чунин ҳамкориҳо дар ҳамаи бахшҳо ба назар мерасад.
Дилноза Аҳмадзода, муовини раиси Кумитаи ҷавонон ва варзиши назди Ҳукумати Ҷумҳурии Тоҷикистон зимни баромади худ аз ҳадафҳои ташкили Фестивали байналмилалии «Тоҷикистон ва Роҳи Абрешим: таърих ва замони муосир» ёдоварӣ намуд. Иштирокчиёни Фестивал дар ин мавзеъ аз намоишгоҳи иноватсионӣ боздид намуда, бо ҳунарҳои мардумӣ ва дастоварду ихтирои наврасону ҷавонони тоҷик шинос шуданд.
Маврид ба зикр аст, ки дар Фестивали байналмилалии ҷавонону донишҷӯёни аъзои давлатҳои ИДМ ва Созмони ҳамкориҳои Шанхай таҳти унвони «Тоҷикистон ва Роҳи Абрешим: таърих ва замони муосир» аз 7 кишвар, аз ҷумла Ӯзбекистон, Қирғизистон, Қазоқистон, Озарбойҷон, Россия ва Молдова намояндагон ҳузур доранд.
Сипас, дар толори Маркази таълимии Бонки миллии Тоҷикистон конференсияи илмӣ-назариявии байналмилалӣ дар мавзӯи «Тоҷикистон ва Роҳи Абрешим: таърих ва замони муосир» баргузор шуд. Муовини Раиси вилояти Суғд Назира Ғаффорӣ вобаста ба таваҷҷуҳи хосаи давлату Ҳукумат дар самти дастгирии ҷавонон, татбиқи сиёсати давлатии ҷавонон, фаъолияти ин қишри пешбарандаи ҷомеа дар ҳаёти сиёсиву иқтисодӣ ва масъалаҳои марбут ба ҷавонон ҳарф зад.
Дар идомаи конференсия намояндагони кишварҳои Ӯзбекистон, Қирғизистон, Озарбойҷон, Федератсияи Россия ва ғайраҳо баромад намуданд. Ҳадафи баргузории ин Фестивали байналмилалӣ ин густариш бахшидан ба муносибати дӯстиву ҳамдилӣ, муносибатҳои ҳамҷавории байни ҷавонон, табодули таҷриба ва таҳаввулоти тоза ворид намудан дар ҳаёти ҷавонон мебошад.
Тибқи нақша дар назар аст, ки меҳмонон аз Муассисаи давлатии “Боғи миллии Ваҳдат”, Осоишгоҳи “Баҳористон”, Қасри Арбоб, Маҷмааи фарҳангию таърихии “Истиқлол”, Маҷмааи фарҳангию таърихии “Қалъаи Хуҷанд”, Маҷмааи “Оши палов” ва дигар мавзеъҳои таърихиву фарҳангӣ боздид намуда, дар Фестивали байналмилалии “Овози дӯстӣ” иштирок намоянд. Мавриди зикр аст, ки дар чорабинии мазкур 100 нафар ҷавонон аз давлатҳои аъзои ИДМ ва СҲШ иштирок менамоянд.
Манбаъ: Хадамоти матбуоти Раиси вилояти Суғд
Нет комментариев