Дар ҳошияи сафари корӣ ба вилояти Суғд сафири Ҷопон дар Тоҷикистон Такаши Камада аз шаҳри Исфара боздид кард. Ҳадаф аз сафари мазкур тақдими таҷҳизот ба муассисаҳои бахши маорифи шаҳр буда, бо ин мақсад сафир ба мактаби таҳсилоти миёнаи умумии №5 ташриф овард.
Сафири Ҷопон изҳор намуд, ки дар чаҳорчӯби амалисозии лоиҳаи навбатӣ, 7 мактаби шаҳри Исфара ба маблағи умумии 88 ҳазор доллари ИМа бо мебел ва тахтаҳои синфӣ муҷаҳҳаз карда мешаванд.
Ба мактабҳои №№5 ва 69-и шаҳр, №38-и ҷамоати Чилгазӣ, №№ 44 ва 46-и ҷамоати Хонобод, №49-и ҷамоати Чоркӯҳ ва №54-и ҷамоати Лаккон дар маҷмӯъ 1001 ҷуфт мизу курсӣ ва ҳамчунин 57 адад тахтаҳои синфӣ тақдим карда шуданд.
Зимни мулоқот бо раиси шаҳри Исфара дипломат зикр кард, ки сафорати Ҷопон дар Тоҷикистон минбаъд низ ба таҳкими заминаи моддиву техникии муассисаҳои бахшҳои маориф ва тандурустии Тоҷикистон кумаку мусоидат хоҳад кард.
Дар ин бора news.tj хабар медиҳад.
Нет комментариев