Бо мақсади рушди иқтисодиёт ва иҷтимоиёти маҳал, густариши корҳои созандагиву бунёдкорӣ, ободонию кабудизоркунӣ, ҳифзи муҳити зист, босамар ва мақсаднок истифода бурдани неъматҳои табиат, беҳтар намудани фаъолияти муассисаҳои тиб, маориф, фарҳанг, баланд бардоштани маърифати экологӣ, нақш ва фаъолнокии шаҳрвандон — имрӯз дар толори Мақомоти иҷроияи ҳокимияти давлатии шаҳри Хуҷанд бо иштироки Раиси шаҳр мӯҳтарам Шарифзода Шариф Файз ва бо иштироки роҳбарони кумитаву маҳаллаҳо ва сохторҳои дахлдор, муаррифии Лоиҳаи мултимедиявӣ (бисёррасонаӣ)-и “Харитаи интерактивии бакҳо ва қуттиҳои партов, нуқтаҳои қабули фурӯзонакҳои каммасраф, макони оббозӣ (пляж) ва био-ҳоҷатхонаҳои шаҳри Хуҷанд” баргузор гардид.
Дар он Роҳбари лоиҳаи мазкур Хуршед Ӯлмасов сухан карда, лоиҳаро ба таври муфассал муаррифӣ намуд. Гуфта шуд, мақсади лоиҳа – ин ҳамкории ВАО бо аҳолӣ ва сохтору идораҳои дахлдори Мақомоти иҷроияи ҳокимияти давлатии шаҳри Хуҷанд мебошад, ки он барои иттилоотонии саривақтии шаҳрвандон ва тарбияи экологии насли наврас ва ҷавонон равона гардидааст.
Лоиҳа ҳамзамон ба наздиксозии хадамоти масъули мақомоти давлатӣ барои берун баровардани партов ва нигаҳдории дурусти контейнерҳои партовпартоӣ, тозагии ҳудуд ва муҳити зист аз ҷониби сокинони микроноҳияҳо ва маҳаллаҳо мусоидат хоҳад кард. Ҳадафи дигари лоиҳа мусоидат кардан ба огоҳии иттилоотӣ ва баландбардории маърифати экологии шаҳрвандон маҳсуб мешавад. Ҳамчунин, барои дар оянда ташкил намудани “Минтақаи сабз” дар шаҳр, ба навъҳо ҷудокунии партовҳо мусоидат хоҳад кард. Боз як мақсади лоиҳа ин ташкили садд (монеа)-и иттилоотӣ – барои ба амал омадани партовгоҳи беиҷозат (стихиявӣ) мебошад.
Вазифаҳои асосии лоиҳа ин муайян кардани вазъияти кунунии (маҳаллаву микроноҳияҳо, шумора, ҷадвали корӣ) бак ва нуқтаҳои партов, био-ҳоҷатхонаҳо ва ҳоҷатхонаҳои умумӣ, нуқтаҳои қабули фурӯзонакҳои каммасраф мебошад. Ҳамзамон, муқоиса намудани (мувофиқатӣ) макони мавҷуда ва шумораи нуқтаҳои мазкур: нуқтаҳои воқеӣ бо нишондод дар харитаи ташкилот ё муассисаи идоракунӣ аст. Дар марҳилаи аввал барои рушди лоиҳа муайян кардани замима (илова)-ҳо ба харитасозӣ ва баъдан бо мултимедиявӣ зарур мебошад. Мониторинги ҳаррӯзаи нуқтаи бардоштани партов ва пешниҳоду инъикоси натиҷаи он – дар харитаи интерактивӣ низ ногузир аст.
Бояд гуфт, ки Лоиҳа бо дастгирии Намояндагии Интернюс Нетуорк Инк дар Тоҷикистон ва Мақомоти иҷроияи ҳокимияти давлатии шаҳри Хуҷанд, шахсан Раиси шаҳри Хуҷанд мӯҳтарам Шарифзода Шариф Файз амалӣ хоҳад шуд. Лоиҳа барои пурратар гардонидани фазои иттилоотии кишвар, бахусус шаҳри Хуҷанд мусоидат хоҳад кард. Лоиҳа инноватсионӣ буда, формати он мултимедиявӣ (бисёррасонавӣ) мебошад.
Раиси шаҳри Хуҷанд Шарифзода Шариф Файз ва чанд нафар аз ҷамъомадагон ба Роҳбари лоиҳа Хуршед Ӯлмасов вобаста ба азхудкунии лоиҳа саволҳо дода, ҷавобҳои мушаххас ва қаноатманд гирифтанд. Зикр гардид, ки мӯҳлати давомнокии даври аввали лоиҳа 3 моҳ буда, дар он 10 маҳаллаи шаҳри Хуҷанд мавриди истифода ва санҷиш қарор мегиранд. Раиси шаҳри Хуҷанд Шарифзода Шариф Файз Лоиҳаи мултимедиявии “Харитаи интерактивии бакҳо ва қуттиҳои партов, нуқтаҳои қабули фурӯзонакҳои каммасраф, макони оббозӣ (пляж) ва био-ҳоҷатхонаҳои шаҳри Хуҷанд”-ро хуш қабул намуда, барои дастгирии ҳамаҷонибаи он омодагии Мақомоти иҷроияи ҳокимияти давлатии шаҳри Хуҷандро баён намуд. Гуфта шуд, пас аз мавриди амал қарор додани ин лоиҳа метавон дар соҳаю бахшҳои дигар низ ба таври инноватсионӣ, ки талаботи имрӯзаи ҷомеаи шаҳрвандӣ аст, чунин чораҳои зарурӣ андешид. Бо ин васила дар масъалаи ободонии шаҳр ва баландбардории маърифати экологии шаҳрвандон метавон мусоидат намуд.
Дар рафти муаррифии лоиҳа пешниҳод гардид, ки гурӯҳҳои корӣ ташкил карда шуда, ташвиқу тарғиби тоза нигоҳ доштани гирду атроф, маҳалли зист ва ҷойи кор, хуб ба роҳ монда шавад.
Ҳамин тавр, муаррифии Лоиҳаи мултимедиявии “Харитаи интерактивии бакҳо ва қуттиҳои партов, нуқтаҳои қабули фурӯзонакҳои каммасраф, макони оббозӣ (пляж) ва био-ҳоҷатхонаҳои шаҳри Хуҷанд” хеле ҷолиб ва барои иштирокдорон муфиду хотирмон ба интиҳо расид.
Азхудкунии лоиҳа имрӯз оғоз гардида, боварии комил дорем, ки ҳамкории якҷояи Мақомоти иҷроияи ҳокимияти давлатии маҳаллӣ, ВАО, фаъолони ҷомеаи шаҳрвандӣ ба қуллаи мақсади ниҳоии худ мерасад.
Чун дар озмуни ҷумҳуриявии беҳтарин шаҳр – шаҳри Хуҷанд мақоми аввалро соҳиб гардид ва ғолиб дониста шуд, андеша дорем, ки иқдоми навбатӣ низ барои боз ҳам ободу зебо ва дилкашу назаррабо гардидани шаҳри бостонии Хуҷанд, беҳтаршавии муҳити экологӣ ва баландбардории маърифати экологии шаҳрвандон ҳамаҷониба мусоидат хоҳад намуд.
Аз мо-шаҳрвандон зарур аст, ки моҳияти ин амали некро ҳамаҷониба дарк карда, иштироки худро дар ин чорабинии инноватсионӣ таъмин намоем.
Нет комментариев