Ин навбат вохӯрии гурӯҳи корӣ ва муаррифии Лоиҳаи мултимедиявии “Харитаи экологӣ”-и шаҳри Хуҷанд дар Муассисаи таҳсилоти миёнаи умумии рақами 28-уми шаҳри Хуҷанд баргузор гардид.
Дар он наздик 100 нафар омӯзгорону хонандагони мактаб иштирок намуданд.
Ҳангоми муаррифӣ зикр гардид, ки як моҳ аст лоиҳа дар амал татбиқ шуда истодааст. Ҳадафи асосии лоиҳа – ҳамкории ВАО бо аҳолӣ ва сохтору идораҳои дахлдори Мақомоти иҷроияи ҳокимияти давлатии шаҳр мебошад, ки он барои иттилоотонии саривақтии шаҳрвандон ва тарбияи экологии насли наврас ва ҷавонон мусоидат хоҳад кард.
Огоҳии иттилоотӣ ва баланд бардоштани маърифати экологии шаҳрвандон, бахусус ҷавонон ва насли наврас низ аз мақсадҳои асосии лоиҳа маҳсуб мешавад. Бо дарки ин маънӣ муаррифии лоиҳа маҳз дар мактабҳои миёна доир шуда истодаанд.
Зикр гардид, ки дар харитаи экологӣ қуттиҳои партов, нуқтаҳои қабули фурӯзонакҳои каммасрафи корношоям, макони оббозӣ ва ҳоҷатхонаҳои ҷамъиятии шаҳри Хуҷанд ба таври возеҳ нишон дода шудаанд.
Зимни муаррифии лоиҳа гуфта шуд, ки омӯзгорону хонандагон метавонанд аксҳои гирифтаи худро аз мавҷуд будани партов дар маҳалли зист ва кӯчаву хиёбонҳои шаҳр, тавассути Вотсапп (Whatsapp) ва ё Вайбер ба рақами 92-882-66-66 ирсол намоянд. Иштирокчиёни фаъолро тӯҳфаҳои махсус интизор аст.
Зимни муаррифӣ гуфта шуд, ки мӯҳлати давомнокии марҳилаи аввали лоиҳа 3 моҳ буда, дар он 10 маҳаллаи шаҳри Хуҷанд: Пахтакор, Раззоқ, Панҷшанбе, Гулбаҳор, Бофандаи соҳили чапи дарё ва микроноҳияҳои 8-ум, 13-ум, 20-ум, 32-юм ва 34-уми соҳили рости дарё мавриди таҷрибаю санҷиш қарор мегиранд.
Дар қисми дуюми вохӯрӣ байни гурӯҳи корӣ ва устодону толибилмон дар мавзӯи тарзу усули гирифтан ва фиристодани аксҳо саволу ҷавоб сурат гирифт.
Ҳамин тариқ, муаррифии Лоиҳаи мултимедиявии “Харитаи экологӣ”-и Хуҷанд ҷолиб ва барои иштирокдорон – устодону хонандагони Муассисаи таҳсилоти миёнаи умумии рақами 28-уми шаҳри Хуҷанд хотирмон ва барои устодону шогирдони мактаб манфиатовар гузашт.
Гурӯҳи кории Лоиҳаи “Харитаи экологӣ”
Нет комментариев