Дар шаҳри Душанбе муаррифии расмии лоиҳаи “Мусоидат ба сулҳу субот дар Осиёи Марказӣ тавассути баланд бардоштани маърифати расонаӣ, инъикоси муассир ва ҳамкориҳои минтақавӣ”, ки аз ҷониби Иттиҳоди Аврупо маблағгузорӣ шуда, аз ҷониби Internews амалӣ мегардад, баргузор гашт. Дар маросими расмии ифтитоҳи лоиҳа журналистон ва роҳбарони расонаҳои мустақили вилояти Суғд, Хатлон ва Бадахшон, намояндагони сохторҳои давлатӣ, созмонҳои маҳалӣ ва байнулмилалӣ ва коршиносони маъруфе, ки барои ҳамкориҳои минбаъда бо лоиҳа таваҷҷӯҳ доранд, иштирок намуданд.
Мачей Адам Мадалински, мушовир ва роҳбари бахш оид ба ҳамкориҳои Намояндагии Иттиҳоди Аврупо дар Ҷумҳурии Тоҷикистон зимни ифтитоҳи чорабинӣ гуфт: “Иттиҳоди Аврупо бо сохторҳои давлатӣ, созмонҳои маҳалӣ ва байнулмилалӣ ҳамкорӣ намуда, ба онҳо кӯмакҳои техникӣ ва башардӯстона фароҳам меорад. Дар навбати худ ин созмонҳо дар роҳи устувории сулҳу субот дар минтақа талош менамоянд. Иттиҳоди Аврупо дар Тоҷикистон аз соли 1992 инҷониб фаъолият дорад ва ҳамасола барои рушди мамлакат тақрибан 35 млн. евро фароҳам меорад. Лоиҳаи мазкур ба дастгирии ташаббусҳои миллӣ ва минтақавие равона шудааст, ки барои пешгирӣ аз ифротгароӣ дар Осиёи Марказӣ мусоидат мекунанд. Расидан ба ин ҳадаф ба воситаи боло бурдани касбияти хабарнигорон, фаъолони шаҳрвандӣ ва мутахассисони расонаҳои хабарӣ имконпазир аст, то онҳо маводи босифати расонаӣ омода намоянд ва сатҳи интиқодии қабул ва бархӯрд ба матолиби расонаиро миёни шаҳрвандон, масъулони давлатӣ ва фаъолони ҷомеъа баланд бардоранд. Нақши ВАО дар устувории сулҳу субот хеле муҳим аст ва мо умед дорем, ки Шумо аз имконоте, ки лоиҳаи мазкур фароҳам меорад, босамар истифода намуда, ҳамкориҳои минтақавиро мустаҳкамтар сохта, маърифати расонаиро дар маҳалҳо ва ҷомеъа боло мебаред”.
Лоиҳаи “Мусоидат ба сулҳу субот дар Осиёи Марказӣ” кишварҳои Осиёи Марказӣ – Қазоқистон, Қирғизистон, Тоҷикистон, Туркманистон ва Узбекистонро фаро хоҳад гирифт.
Ҳадафҳои лоиҳа мустаҳкамсозии мавқеъи ВАО дар минтақа ба ҳайси миёнарав дар интишори иттилооти ҳассос ва густариши ҳамкориҳои намояндагони ВАО бо мақомоти давлатӣ ва фаъолони ҷомеъа мебошад. Барои расидан ба ин ҳадафҳо Internews ба ҳукуматҳои маҳалӣ, ҷомеъаи шаҳрвандӣ ва ВАО барои баланд бардоштани сифат ва шумораи иттилооти беғараз ва баланд бардоштани маърифати расонаӣ ва мизони интиқодии қабул ва бархӯрд ба матолиби расонаӣ дар ҷомеъа, ки барои пешгирӣ аз ифротгароӣ дар Осиёи Марказӣ мусоидат мекунад, ҳамкорӣ хоҳад кард.
Дар доираи лоиҳа, Internews ҳамроҳ бо шарикон барномаи вижаи омӯзишҳои касбиро барои журналистон таҳия намуда, семинарҳои муштарак дар мавзӯҳои мушаххас барои намояндагони сохторҳои давлатӣ, созмонҳои ҷамъиятӣ ва кормандони ВАО таъсис хоҳад дод. Ҳамчунин, лоиҳа барои таҳияи маводи расонаии тарғибгари арзишҳои сулҳу субот дар минтақа бурсҳо ҷудо мекунад.
Афшин Муқим сухангӯйи Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон гуфт, раванди ҷаҳонишавии ҷомеъа дар рӯ ба рӯйи инсоният падидаҳоеро пешорӯ мегузорад, ки онҳо ҳам мусбат буда метавонанд ва ҳам манфӣ. Истифода аз фанновариҳои нав барои рушди инсоният муҳим аст ва аммо он метавонад мушкилиҳои дигареро ба вуҷуд оварда, ба хусус аз ҷониби гурӯҳҳои ифротгаро ва ҷиноятпеша истифода шаванд: «Хуб аст, ки агар лоиҳаи мазкур барои баланд бардоштани маърифати шаҳрвандон дар қабул ва таҳлили иттилооти рақамӣ таваҷӯҳ намуда, барои боло бурдани амнияти рақамӣ кӯмак намояд. Чунки ҳоло иттилоот ва амният ҳамрадифи якдигаранд ва зарур аст, ки барои ошкор ва фош сохтани иттилоот ва ахбори дурӯғине, ки аз ҷониби гурӯҳҳои ифротӣ паҳн мешаванд, ин лоиҳа мусоидати ҳамаҷониба намояд. Аслан ҳамкории журналистон бо котибони матбуотӣ ба он мусоидат мекунад, ки ҷомеа ба иттилоотӣ воқеъӣ, ки аз сарчашмаҳои мӯътамад гирифта шудааст, дастрасӣ пайдо намоянд.»
Дар доираи лоиҳа бори аввал дар Осиёи Марказӣ Эдютон (Eduthon) баргузор мегардад, ки иштирокдоронаш омӯзгорони донишгоҳҳои олӣ, мактабҳо ва тренерони ВАО хоҳанд буд, ки дар якҷоягӣ лоиҳаи баланд бардоштани маърифати расонаиро омода месозанд ва беҳтаринҳояшон маблағгузорӣ мегардад.
Дар ҳамин замина Дилбар Самадова мудири кафедраи журналистикаи Донишгоҳи давлатии шаҳри Хуҷанд иброз дошт, ки ҷалби устодони донишгоҳ як самти муҳими лоиҳаи “Мусоидат ба сулҳу субот дар Осиёи Марказӣ” маҳсуб меёбад:
“Баланд бардоштани касбияти хабарнигорон дар инъикоси масоили ҳассос дар Осиёи Марказӣ барои нигаҳдории сулҳ ва боло бурдани маърифати расонаӣ хеле зарур аст. Аз ин рӯ бозомӯзии устодони донишгоҳ барои нерӯмандсозии журналистони оянда муҳим аст”.
Дар назар аст, маъракаи иттилотии интернетӣ доир ба маърифати расонаӣ тули 15 моҳ роҳандозӣ гардида, зимни роҳандозии он ба шабакаҳои иҷтимоӣ ва пойгоҳҳои (платформа) маъруфи табодули иттилоот дар Осиёи Марказӣ тарҷеҳ дода мешавад.
Истифодабарандагони ин платформаҳо имконоти омӯзиши малакаҳои амнияти рақамӣ ва истифодаи интиқодии маълумоти интернетиро меомӯзанд.
Барои гирифтани маълумоти муфассал, лутфан муроҷиат намоед: Фарҳод Рахматов, директори лоиҳа, тел.: (+992) 905 50 6116, почтаи электронӣ: frahmatov@internews.org
Нет комментариев