Мӯҳлати хизмати ҳарбӣ 1,5 сол мешавад?

0
655 просмотров

Лоиҳаи тағйироти дахлдор ба қонун як сол пеш ба вазорату идораҳо фиристода шудааст.

Сарбозони тоҷик-1

Вазорати мудофиаи Тоҷикистон ним сол кам кардани мӯҳлати хизмати ҳатмии ҳарбии шаҳрвандонро дар Қувваҳои Мусаллаҳи ҷумҳурӣ пешниҳод кардааст.

Тавре ба «Азия-Плюс» як манбаъ аз Вазорати мудофиаи Ҷумҳурии Тоҷикистон дар ин робита иттилоъ дод, лоиҳаи тағйироти дахлдор ба қонун «Дар бораи ӯҳдадориҳои умумии ҳарбӣ ва хизмати ҳарбӣ» қариб як сол пеш ба вазорату идораҳо фиристода шудааст.

Сарбозони тоҷик-3

Бино ба иттилои манбаъ, дар лоиҳаи тағйироту иловаҳо кам кардани мӯҳлати хизмати ҳарбии ҳатмӣ аз 2 соли ҳозира то ба 1,5 сол пешбинӣ шудааст.

«Агар лоиҳаро вазорату идораҳо ва ҳукумат дастгирӣ кунанду парлумон тағйироти номбаршударо қабул намояд, шаҳрвандони синнусоли даъват ба хизмати ҳарбӣ танҳо 1,5 сол адои хизмати ҳарбӣ мекунанд», — гуфт манбаъ.

Сарбозони тоҷик-4

Ҳамчунин зикр гардид, ки дар масъалаи манъи сафари шаҳрвандони синнусолашон мувофиқ ба хизмати ҳарбӣ (даъватшавандагон) ба хориҷи кишвар, Тоҷикистон ба кишвари ҳамсояи Қирғизистон пайравӣ карданӣ нест.

«Дар Тоҷикистон шумори шаҳрвандони синнусоли мувофиқ барои даъват ба хизмати ҳарбӣ кофист, то ки даъватшавандагони аз лиҳози омодагии  ҷисмониву зеҳнӣ беҳтарин ба хизмат сафарбар шаванд», — таъкид доштанд дар Вазорати мудофиа.

Сарбозони тоҷик-5

Қобили зикр аст, ки маъракаи даъват ба хизмати ҳатмии ҳарбӣ дар Тоҷикистон ҳамасола дар ду давра сурат мегирад: даъвати баҳорӣ – аз 1 апрел то 31 май ва даъвати тирамоҳӣ — аз 1 октябр то 30 ноябр. Ба хизмати ҳатмии ҳарбӣ шаҳрвандони синнусоли аз 18 то 27-сола, ки барои мавқуф гузоштани хизмат ё озод шудан аз он ҳуқуқ надоранд, даъват карда мешаванд.

Бояд гуфт, ки ҳамасола ба хизмат дар сафи Қувваҳои Мусаллаҳи кишвар тақрибан 15-16 ҳазор нафар даъват карда мешаванд. Дар Тоҷикистон зиёда аз 600 ҳазор нафар ҷавонони синнусоли мувофиқ ба хизмати ҳарбӣ умр ба сар мебаранд, аммо ҳудуди 150 ҳазор нафари онҳо мӯҳлати хизматашонро мавқуф гузоштаанд ё аз хизмат озод карда шудаанд ва ё барои хизмати ҳарбӣ коршоям нестанд. Боз ҳудуди 100 ҳазор нафар шаҳрвандони синнусоли мувофиқ ба хизмати ҳарбии Тоҷикистон дар муҳоҷирати корӣ қарор доранд.

Сарбозони тоҷик-2

Қувваҳои Мусаллаҳи Тоҷикистон аз се навъи ҷузъу том – Қушӯнҳои зудамал, хушкигард, Қувваҳои ҳарбӣ-ҳавоӣ ва мудофиаи зидди ҳавоӣ иборат аст.

Манбаъ:  http://news.tj/

 

Нет комментариев

Также рекомендуем