Вазорати меҳнат, муҳоҷират ва шуғли аҳолии Тоҷикистон мегӯяд, маоши миёна дар кишвар ба 1261,6 сомонӣ баробар шудааст Нурулло Маҳмадуллозода, муовини вазири меҳнат, муҳоҷират ва шуғли аҳолии Тоҷикистон дар ҷамъбасти фаъолияти семоҳаи ниҳодашон гуфт, ба ҳолати 1 феврали соли 2019 музди миёнаи меҳнат 1261,6 сомониро ташкил дод.
Ба гуфтаи Маҳмадуллозода, ин нишондод нисбат ба ҳамин давраи соли гузашта 149,6 сомонӣ ва ё 13,4 фоиз зиёд шудааст. Тибқи ҳисоботи Вазорати меҳнат маоши миёна дар ВМКБ 6 дарсад афзоиш ёфта, ҳудуди 1050 сомониро ташкил медиҳад ва дар Душанбе 9 дарсад зиёд шуда, наздики 1900 сомониро ташкил медиҳад.
“Музди миёнаи меҳнат нисбат ба ҳамин давраи соли гузашта дар ВМКБ – 59,9 сомонӣ ва ё 6,0 фоиз, вилояти Суғд – 126,4 сомонӣ ва ё 12,9 фоиз, вилояти Хатлон – 160,4 сомонӣ ва ё 19,6 фоиз, шаҳри Душанбе – 158,3 сомонӣ ва ё 9,1 фоиз ва НТҶ – 160,0 сомонӣ ва ё 17,2 фоиз зиёд шудааст”, — иттилоъ дод Вазорати меҳнат аз қавли Маҳмадуллозода.
Манбаъ афзуд, ки дар соҳаҳои бахши воқеӣ музди миёнаи меҳнати аз ҳама зиёд дар саноати истихроҷи маъданҳои кӯҳӣ ва коркарди конҳо 2501,7 сомонӣ, сохтмон 2426,6 сомонӣ ва нерӯи барқ, газ ва таъминоти об 1965,0 сомонӣ буда, сатҳи пасттарини он дар соҳаи кишоварзӣ, шикор ва ҷангалпарварӣ 559,5 сомонӣ мебошад.
Вазорати меҳнат таъкид кард, ки зиёдшавии музди миёнаи меҳнат дар соҳаҳои воқеӣ нисбат ба ҳамин давраи соли гузашта дар сохтмон 16,3 фоиз, нерӯи барқ, газ ва таъминоти об 18,9 фоиз ва кишоварзӣ 6,8 фоиз ба қайд гирифта шудааст.
Манбаъ: sputnik-tj.com
Нет комментариев