Машварати августии кормандони соҳаи маориф

0
597 просмотров

Рӯзи гузашта дар Кохи фарҳанги ба номи Абӯабдуллоҳи Рӯдакии шаҳри Хуҷанд машварати августии кормандони соҳаи маорифи вилояти Суғд баргузор гардид.

Дар кори машварат Раиси вилояти Суғд Абдураҳмон Қодирӣ, муовини вазири маориф ва илми Ҷумҳурии Тоҷикистон Назирӣ Латофат Қаҳҳор, муовинони соҳавии раисони шаҳру навоҳӣ ва доираи васеи кормандони соҳаи маориф ширкат варзиданд.

Дар машварат нахуст доир ба бурду бохти соҳаи маорифи вилоят муовини Раиси вилоят Назира Ғаффорӣ маърӯза кард. Гуфта шуд, ки маориф ҳамчун соҳаи афзалиятнок дар маркази таваҷҷуҳи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дошта, омили муҳими пешрафти давлату Ҳукмат маънидод мегардад. Бо ин мақсад маблағгузории соҳа аз буҷети давлатӣ сол ба сол афзуда, барои таълиму тарбияи насли наврас шароитҳои зарурӣ фароҳам оварда мешавад. Масалан, соли ҷорӣ аз ҳисоби буҷети ҷумҳуриявӣ ба соҳаи маориф 3 млрд. 581,1 млн. сомонӣ равона шудааст, ки назар ба соли 2016 13,7 дарсад зиёд буда, 18 фисади буҷети давлатиро ташкил медиҳад. Агар аз буҷети вилоятӣсоли 2016  ба ин соҳа 665,7 млн. сомонӣҷудо шуда бошад, пас соли равон ин рақам ба 707,1 млн. сомонӣ  расидааст.

Дар замони Истиқлолияти давлатӣ шумораи мактабҳои олӣ дар вилоят аз 1 ба 7 адад, шумораи мактабҳои миёнаи махсус  ба 17 адад расидааст. Шумораи муассисаҳои таҳсилоти умумӣ имрӯз 924 ададро ташкил медиҳад, ки назар ба соли гузашта 10 адад зиёд мебошад ва дар онҳо наздик 500 ҳазор толибилм таълиму тарбия мегиранд.

Зимни таҳлили амиқи соҳа аз ҷониби Раиси вилоят маълум гардид, ки дар баробари дастовардҳои назаррас ҳанӯз камбудиҳои ҳалталаб низ ҷой доранд. Абдураҳмон Қодирӣ пеш аз ҳама ба масаълаи баланд бардоштани сатҳи саводнокии толибилмони вилоят изҳори назар намуд. Дар ин радиф дастур дода шуд, ки фаъолияти мактабҳо ва роҳбарони онҳо аз рӯи маҳсулнокии дастранҷи омӯзгорон таҳлил карда шуда, ба фаъолияти роҳбарони муассисаҳо баҳои воқеӣ дода шавад. Шароити замони муосир инчунин тақозо мекунад, ки дар баробари баланд бардоштани савияи дониши худи омӯзгорони маҳаллӣ, инчунин муаллимони хориҷӣ низ ба мактабҳои вилоят ҷалб карда шаванд.

Муаммои дигари соҳа ин дуруст ба роҳ мондани маҳфилҳои ҳунаромӯзӣ дар мактабҳо ва баробари шаҳодатномаи хатми мактаб ба хатмкардаҳо додани шаҳодатномаи касбу ҳунар мебошад, ки Раёсати маориф бояд ҷиҳати ҳалли ин муаммо тадбир андешад.

Дар мактабҳо фаъолият бурдани омӯзгорони ғайриихтисос муаммои дигар аст, ки бояд ҳалли худро ёбад. Шумораи чунин омӯзгорон дар вилоят 330 нафарро ташкил медиҳад, ки аз ҷумла 48 нафар ба ноҳияи Ҷаббор Расулов рост меояд.  Дар ин замина, ҳанӯз дар баъзе шаҳру навоҳии вилоят шумораи муайяни муаллимон бо маълумоти миёнаи касбӣ фаъолият мебаранд, ки мувофиқи талабот на кам аз 80 дарсади омӯзгорон бояд дорои маълумоти олӣ бошанд.

Дар машварати  омӯзгорон ба ҳайси муассисаи намунавӣ литсейи хонандагони болаёқати шаҳри Хуҷанд муаррифӣ карда шуд, ки соли равон 16 нафар толибилми ин даргоҳ дар олимпиадаҳои байналмилалӣ, аз ҷумла дар давлатҳои Руминияву Малайзия ва Россияву Қазоқистон ҷойҳои ифтихориро соҳиб шудаанд. Толибилмони литсей таассуроти хешро аз иштирок дар олимпиадаҳо баён намуда, барои шароитҳои мусоиди таҳсил, дастгириҳои пайваста ва ҳавасмандгардониҳои молиявии мақомоти иҷроияи ҳокимияти давлатии вилоят изҳори сипос намуданд. Дастур дода шуд, ки минбаъд дар ин литсей машғулиятҳои омӯзишӣ ва таҷрибаандӯзии омӯзгорони мактабҳои вилоят ба роҳ монда шавад. Сарвари литсей Тоҳир Рӯзибоев бошад, барои дастовардҳои шогирдонаш ба унвони “Директори беҳтарини сол” дар вилоят сазовор гардонида шуд.

Ҳамзамон дар машварат фаъолияти литсейи рақами 3-и Ҷамоати деҳоти Ворухи шаҳри Исфара низ назаррас арзёбӣ гардид. Соли равон аз 10 нафар ғолибони олимпиадаҳои фаннӣ аз шаҳри Исфара се нафарашро хонандагони ҳамин литсей ташкил медиҳанд.

Муовини вазири маориф ва илми ҷумҳурӣ Латофат Назирӣ зимни сухан дастовардҳои соҳаи маорифи вилоятро назаррас арзёбӣ намуд. Ба унвонҳои “Мураббии соли Тоҷикистон” ва “Омӯзгори соли Тоҷикистон” мушарраф шудани намояндагони вилоят дар озмунҳои ҷумҳуриявӣ, соҳиби медали тилло шудани 4 нафар хатмкунандагони вилоят ва иштироки фаъоли толибилмони вилояти Суғд дар олимпиадаҳои фаннии ҷумҳурӣ намунаи чунин дастовардҳо мебошад.  Дар баробари ин, тавсия дода шуд, ки ҷиҳати ҳалли баъзе масъалаҳо, аз ҷумла таҷдиди маблағгузории марказҳои инкишофи кӯдак, омӯзишгоҳҳои фаннӣ, пешгирии худкушӣ дар байни ноболиғон ва ғайра тадбирҳо андешида шаванд.

Раиси вилоят дар поёни машварат ҷиҳати ҳалли камбудиҳо ва беҳтар кардани сатҳу сифати таълиму тарбия дар назди кормандони соҳа вазифаҳои мушаххас гузошт. Аз ҷумла, ба сарварони муассисаҳо супориш дода шуд, ки дар ҳар мактаб на кам аз се омӯзишгоҳи фаннӣ ташкил намуда, муассисаҳоро бо маҷмӯи асбобҳои миллии мусиқӣ ва мутахассисони соҳаи санъат таъмин намоянд.  Илова бар ин, барои иҷрои нақшаҳои таъминоти либоси мактабӣ, захираи маводи сӯхт ва омодагӣ ба мавсими зимистонгузаронӣ, тайёр намудани хонандагон барои иштирок дар олимпиадаҳо ва пешгирии ҷинояткории ноболиғон вазифадор карда шуданд.

Бо иқдоми Раиси вилоят шурӯъ аз мавсими нави таҳсил шумораи омӯзгорони беҳтарин, ки дар осоишгоҳҳои вилоят ройгон ба фароғат фаро гирифта мешаванд, як баробар зиёд, яъне ба дусад нафар расонида мешавад.

Раиси вилоят ҳамчунин аз омӯзгорон даъват намуд, ки дар ташвиқу таблиғи мазмуну моҳияти тағйиру иловаҳо ба қонуни танзими анъана ва дигар санадҳои ҳуқуқӣ ҳиссагузор бошанд.

Дар машварат ба як қатор  фаъолони соҳа унвони “Аълочии маориф ва илми Ҷумҳурии Тоҷикистон”, ба омӯзгорони беҳтарин барои дастовардҳои шогирдонашон Ҷоизаи Раиси илоят ва 6000 сомонӣ маблағ, ба муассисаҳои намунавии томактабӣ Сипосномаи Мақомоти иҷроияи ҳокимияти давлатии вилояти Суғд ва 5000 сомонӣ, ба сарварони мактабҳое, ки дар сохтмони синфхонаҳои иловагӣ ташаббускорӣ иншон додаанд, Сипоснома ва 5000 сомонӣ, ба муаллимоне, ки шогирдонашон дар олимпиадаҳо ғолиб омадаанд ва шогирдони онҳо аз 5 то 15 ҳазор сомонӣ, ба ғолибони олимпиадаҳои ҷумҳуриявӣ Сипоснома ва 1000 сомонӣ, ба хатмкардаҳои сазовори медали тилло Сипоснома ва 1000 сомонӣ ва ба кормадони фаъоли сохторҳои маориф Сипоснома ва мукофотҳои пулии Мақомоти иҷроияи ҳокимияти давлатии вилояти Суғд тақдим гардиданд. Инчунин ба тамоми иштирокчиёни машварати августӣ туҳфаҳои хотиравии Раиси вилоят супорида шуданд.

Машварати августии омӯзгорони вилоят бо барномаи рангини фарҳангӣ ба поён расид.

Манбаъ: сомонаи расмии МИҲД-и вилояти Суғд

Нет комментариев

Также рекомендуем

Упражнения Для Мозга

В 1936 году американская писательница Дороти Бранд в своей книге «Wake Up and Live» («Пробудись и живи») предложила несколько забавных упражнений для мозга, которые помогут ...