Дар Театри давлатии мазҳака-мусиқии ба номи Камоли Хуҷандии маркази вилоят бо иштироки Раиси вилоят Раҷаббой Аҳмадзода ва муовини Вазири маориф ва илми Ҷумҳурии Тоҷикистон Латофат Назирӣ машварати августии кормандони соҳаи маорифи вилояти Суғд баргузор гардид.
Машваратро муовини Раиси вилоят Назира Ғаффорӣ ҳусни оғоз бахшид. Раиси вилоят Раҷаббой Аҳмадзода зимни суханронии хеш кулли устодон ва омӯзгоронро бо фарорасии Рӯзи Дониш муборакбод намуда, аз дастоварду муваффақиятҳо ва дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри тараққиёти соҳаи мазкур ёдовар шуд. Қайд гардид, ки бо иқдоми шоистаи Пешвои миллат мардуми шарафманди Тоҷикистон ба ҷашни бузург – 30-солагии Истиқлолияти давлатии Тоҷикистон омодагии хуб дида истодаанд.Рушду нумӯи соҳаи маориф асоси пешрафти ҷомеа маҳсуб ёфта, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маҳз ҳамин нуктаро таъкид ва баҳри ҷорӣ намудани усулҳои нави таълиму тарбия пайваста ғамхорӣ менамоянд. Дар миқёси вилоят ҳафт муассисаи таҳсилоти олӣ ва 21 муассисаи таҳсилоти касбӣ амал мекунад. Дар муассисаҳои мазкур аз рӯи 119 ихтисос мутахассис омода месозанд. 60640 нафар донишҷӯён, аз ҷумла 38937 нафар дар шӯъбаи рӯзона ва 21546 нафар дар шӯъбаи ғоибона бо таҳсил фаро гирифта шудаанд. Ҳамзамон 1204 нафар магистрант ва 145 нафар аспирант дар боргоҳҳои илмӣ корҳои илмӣ ва тадқикотӣ бурда истодаанд.
Муассисаҳои таҳсилоти олӣ ва миёнаи касбӣ дар нимсолаи аввали соли равон дар риштаҳои илм, дониш ва варзиш ба дастовардҳои зиёд ноил гардиданд. Бо мақсади баланд бардоштани сатҳу сифати таълиму тадрис дар муассисаҳои таҳсилоти олӣ 60 конфронси байналмилалӣ ва дигар чорабиниҳои илмӣ гузаронида шуд. Дар ин давра аз ҷониби олимони вилоят ду рисолаи докторӣ ва даҳҳо рисолаҳои номзадӣ ба дифоъ расиданд.Раиси вилоят инчунин дар бораи рушди соҳаи маориф дар вилоят. муҳайё сохтани шароит дар муассисаҳои таълимӣ, таъминот бо лавозимоти муосири таълимӣ, бунёди синфхонаҳои иловагӣ дар назди мактабҳои дар ҳолати садамавӣ қарордошта, дастгирии кӯдакони ятиму бепарастор ва баланд бардоштани савияи дониши толибилмон андешаронӣ кард.
Раиси вилоят дар бобати мавриди баҳрабардорӣ қарор додани бинои муассисаҳои таълимӣ дар шаҳру ноҳияҳои вилоят маълумот дода, афзуд, ки раисони шаҳру ноҳияҳо ва мутасаддиён бо мақсади бартараф сохтани камбудиҳои мавҷуда то ҷашни бузурги таърихӣ – 30-солагии Истиқлолияти давлатии Ҷумҳурии Тоҷикистон муваззаф гардиданд.
Раҷаббой Аҳмадзода омӯзгорро симои асосии муассисаи таълимӣ дониста, дастоварду комёбиҳои соҳаро аз фаъолияти хуби онҳо вобаста донист. Алҳол дар муассисаҳои таҳсилоти миёнаи умумӣ ҳамагӣ 37192 нафар омӯзгор фаъолият мебаранд, ки 78 фоизи онҳо дорои маълумоти олӣ мебошанд. Имсол гуруҳҳои буҷавии донишгоҳҳои олиро 1322 нафар мутахассисони ҷавон хатм карда, бо роҳхати Вазорати маориф ва илми Ҷумҳурии Тоҷикистон ба муассисаҳои таълимӣ равона гардида, бо имтиёзҳо фаро гирифта шуданд.
Раиси вилоят инчунин дар бораи ҷойҳои намоёнро сазовор гардидани хатмкунандагони муассисаҳои таълимӣ дар озмунҳои вилоятӣ, ҷумҳуриявӣ ва байналмилалӣ ва тариқи маркази миллии тестӣ ба унвони донишҷӯ соҳиб гардидани толибилмон сухан ронд. Зикр шуд, ки соли хониши 2016-2017-ум муассисаҳои таҳсилоти миёнаи умумии вилоятро 34935 хонанда хатм карда, зиёда аз 19 ҳазор нафар барои дохил шудан ба донишгоҳҳои олӣ ва коллеҷҳо ҳуҷҷатҳои хешро супориданд.Раҷаббой Аҳмадзода инчунин дар бораи таҳсили хатмкунандагон дар макотиби олии дигар давлатҳо, иштироки фаъолонаи хонандагони муассисаҳои таҳсилоти миёнаи умумӣ дар озмунҳо ва олимпиадаҳои фаннии ҷумҳуриявӣ ва байналмилалӣ ва саҳми устодону омӯзгорон дар ин самт, фаъолияти босамари муассисаҳои томактабӣ, бо таълиму тарбия фаро гирифта шудани ятимон ва маъюбон дар мактаб-интернатҳо, саҳми соҳибкорони ватанӣ дар омода сохтани либоси ягонаи мактабӣ, захираи маводи сӯзишворӣ дар муассисаҳои таълимӣ, минбаъд афзун гардондани кабинетҳои фаннӣ, беҳтар кардани ҳолати лагерҳои истироҳатӣ, дар ҳар шаҳру ноҳия ташкил кардани истироҳатгоҳҳои намунавӣ ва дигар масъалаҳои марбут соҳа ибрози андеша намуд.
Муовини Вазири маориф ва илми ҷумҳурӣ Латофат Назирӣ зимни суханронии хеш доир ба саҳми соҳибкорони вилоят дар омода сохтани либоси ягонаи мактабӣ барои толибилмони мактабҳои шаҳри Душанбе ва дастовардҳои соҳаи маориф дар вилоят изҳори андеша намуда, оиди бартараф сохтани камбудиҳо андешаҳои хешро иброз дошт.
Сипас, барои таълиму тарбияи арзанда, тариқи ҳашар бунёд намудани синфхонаҳои иловагӣ омӯзгорони фаъол ва сарварони муассисаҳои таълимӣ бо Сипосномаи Мақомоти иҷроияи ҳокимияти давлатии вилоят ва туҳфа, нишони Аълочии маориф ва илми Ҷумҳурии Тоҷикистон ва мукофотпулии яквақта қадрдонӣ карда шуданд.
Ба беш аз 130 нафар ғолибони озмуну олимпиадаҳои вилоятӣ, ҷумҳуриявӣ, минтақавӣ ва байналмилалӣ, инчунин ба беш аз 20 нафар собиқадорони соҳаи маориф кумакпулиҳои яквақта ва сипосномаҳо супорида шуд.Суруду таронаҳо дар иҷрои толибилмон ва санъаткорони номӣ анҷомбахши чорабинӣ гардид.
Нет комментариев