Машварати кории Раиси шаҳр бо кормандони соҳаи маориф

0
818 просмотров

Дар толори Мақомоти ичроияи ҳокимияти давлатии шаҳри Хуҷанд машварати васеъи кории Раиси шаҳр Маъруф Муҳаммадзода бо роҳбарони муассисаҳои таълимии миёнаи умумӣ, хусусӣ ва муассисаҳои таҳсилоти томактабӣ баргузор гардид. Нахуст аз натиҷаи санҷиши гуруҳи кории Мақомоти иҷроияи ҳокимияти давлатии шаҳр доир ба вазъи татбиқи Қонунҳои Ҷумҳурии Тоҷикистон “Дар бораи маориф”, “Дар бораи масъулияти падару модар дар таълиму тарбияи фарзанд”, “Дар бораи забони давлатии Ҷумҳурии Тоҷикистон” омодагии омўзгорони муассисаҳои таълимии миёнаи умумии шаҳр барои гузаронидани машғулиятҳои дарсӣ, давомоти хонандагон, ҳолати китобҳои дарсӣ ва рўзномаю дафтарҳои кории хонандагон дар муассисаҳои таҳсилоти ҳамагонии №6, 9, №10 22, 23 ва 30 –юми шаҳр навор пахш карда шуд. Дар навори номбурда вазъи макотиби номбурда мавриди таҳлил ва баррасӣ қарор дода шуд. Сипас, муовини Раиси шаҳри Хуҷанд Раъно Ҳошимзода аз натиҷаи санҷиши гузаронидашуда маълумоти муфассал дод. Мудири маорифи шаҳр Илҳом Султонӣ доир ба омилҳои камбудиҳои ҷойдошта ва ошкорнамудаи гуруҳи корӣ иттилоъ дода, зикр дошт, ки барои бартараф намудани он аз тамоми имкониятҳо истифода бурда мешавад. Мудири маориф ҳамзамон дар бораи вазифаву ӯҳдадориҳои роҳбари мактаб маълумоти муфассал ироа намуд. Раиси шаҳри Хуҷанд Маъруф Муҳаммадзода зимни натиҷагирӣ аз мулоқот бо роҳбарони соҳаи маориф таъкид дошт, ки “Бо дарназардошти он, ки фардои миллати мо дар дасти ҷавонону наврасон аст, дар солҳои соҳибистиқлолии мамлакат соҳаи маориф ҳамчун самти афзалиятноки сиёсати давлату Ҳукумат ва ҳадафи аввалиндараҷаи соҳаи маорифи кишвар тарбияи шахсияти фаъолу созанда эълон шудааст. Мақсади олии Давлату Ҳукумати мамлакат аз вусъат додани раванди амалисозии ислоҳот дар соҳаи маориф, бо истифодаи ҳамаи захираву имкониятҳо бунёд кардани таълимгоҳҳои ҷавобгӯй ба талаботи замон ва муҳайё намудани шароити хуби таълим дар он аст, ки наслҳои ояндасози Ватани маҳбубамон соҳибмаърифат гарданд, аз дастовардҳои илму техника ва технологияҳои муосир баҳравар шаванд ва дар оянда ҳамчун фарзандони номбардори халқи бошарафу фарҳангсози тоҷик ба камол расида, дар пешрафти давлати соҳибистиқлоламон ва ободии сарзамини муқаддасамон саҳми арзандаи худро гузошта тавонанд”.

Маъруф Муҳаммадзода гуфт, ки “Раванди тадриҷан беҳтар намудани сатҳи зиндагии аҳолии Тоҷикистон, махсусан сатҳи зиндагии кормандони маориф ва илм аз сиёсати пайгиронаи Асосгузори сулҳу Ваҳдати миллӣ-Пешвои миллат, Президенти мамлакат мӯҳтарам Эмомалӣ Раҳмон ва Ҳукумати Ҷумҳурии Тоҷикистон ва тадбирҳои судманд дар роҳи паст кардани сатҳи камбизоатӣ ва баланд бардоштани сифати зиндагии мардуми ҷумҳурӣ маҳсуб мешавад. Ҷавобан ба ин ғамхориҳо ҳар як корманди соҳаи маорифро зарур аст, ки баҳри пешбурди соҳа, тарбия намудани хонандагон дар рӯҳияи ватандӯстӣ, дуруст ва самарабахш ба роҳ мондани равандитаълиму тарбия кӯшиш ба харҷ диҳанд”. Раиси шаҳри Хуҷанд Маъруф Муҳаммадзода боназардошти нуктаву эродҳои зикргардида ва таклифу пешниҳодҳо баҳри рушди соҳаи маориф, корҳои созандагию ободонӣ, пешбурди фаъолияти муассисаҳои таълимии миёнаи умумӣ ва томактабӣ, барои баланд бардоштани сатҳи таълиму тарбия дар муассисаҳои соҳаи маорифи шаҳр дар назди масъулин вазифагузорӣ намуд. Аз ҷумла таъкид карда шуд, ки ҷиҳати иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон, талаботи қарорҳои Ҳукумати Ҷумҳурии Тоҷикистон, қарору фармоишҳои Вазорати маориф ва илм, дастуру супоришҳои Раиси вилояти Суғд мўҳтарам Абдураҳмон Қодирӣ ва барномаю қарорҳои соҳаи маориф ва илм чораҳои зарурӣ андешида шавад. Барои баланд бардоштани сифати таълиму тарбия дар тамоми зинаҳои таҳсилот аз омӯзгорон ва падару модарон талаб карда шавад, ки диққати хонандагонро барои аз бар намудани донишҳои муосир ҷалб намоянд, ба сатҳи азхудкунии фанҳои дақиқ бештар таваҷҷўҳ зоҳир кунанд, забонҳои хориҷӣ ва омӯзиши технологияҳои иттилоотиву коммуникатсиониро ба роҳ монанд ва ба касбомўзии шогирдону фарзандон эътибори ҷиддӣ дода, онҳоро дар рўҳияи донишомўзиву меҳнатдўстӣ тарбия намоянд. Сарварони муассисаҳои таълимиро зарур аст, ки ҷиҳати таъмин намудан бо муаллимони баландихтисос чораҷўӣ карда, оид ба масъалаи омодагии омўзгорон ба дарс, тарзи либоспўшӣ ва одоби муошират бо хонандагону волидон ва атрофиён тадбирҳои зарурӣ андешанд. Бо мақсади таъмин намудани рушди устувори соҳаи маорифи шаҳр, ҷиҳати зиёд намудани саҳми шаҳри Хуҷанд дар пешрафти вилоят ва ҷумҳурӣ вобаста ба иштироки фаъолонаи хонандагон ва омўзгорони шаҳр дар озмунҳо, мусобиқаҳо ва олимпиадаҳои фаннӣ чораҳои амалӣ андешида шавад. Вобаста ба эълон намудани соли 2018-“Соли рушди сайёҳӣ ва ҳунарҳои мардумӣ” дар тамоми муассисаҳои таълимии шаҳр барои тарбияи зебоипарастӣ, касбомўзии хонандагон аз қабили адрасбофию атласбофӣ, дўзандагӣ, бофандагӣ, дуредгарӣ, челонгарӣ, рўзғордорӣ ва дигар намуди касбомўзии мардумӣ гӯшаҳои махсус ҷудо ва дар ин самт чораҳои зарурӣ андешида шавад. Ҷиҳати пешгирии ҷинояткорӣ, терроризм, экстремизм, худкушӣ, нашъамандӣ, сўиқасд ба ҷони худ ва шомилшавии ҷавонон ба равияҳои ғайриқонунӣ корҳои тарғиботию ташвиқотӣ дар ҳамкорӣ бо мақомотҳои ҳифзи ҳуқуқ корҳоро пурзўр карда, интизому давомоти хонандагон зери назорати ҳамарўзаи сарварони муассисаҳои таълимӣ қарор дода шавад.

Сипас, Хуршеда Атобоева, директори МТҲУ№13, Матлуба Муинова сарвари МТҒ “Гулчини маърифат”, Матлуба Мирзохонова роҳбари МТҲУ №20 ва дигарон аз ин иқдоми роҳбарияти шаҳр истиқбол намуда, таъкид бар он доштанд, ки ҳамагон вазифаи ҷонии хешро содиқона ба сомон расонем ва дар тарбияи наврасони ватандӯсту меҳнапарвар заҳмати софдилона намоем. Шаҳри Хуҷанд дар тамоми ҷабҳаҳои ҳаёти маданиву маърифатии кишвар намуна бошад ва дар ин самт саҳми роҳбарони соҳаи маориф муҳим арзёбӣ мегардад.

Раиси шаҳри Хуҷанд Маъруф Муҳаммадзода дар анҷоми мулоқот аз роҳбарони соҳаи маорифи шаҳр даъват ба амал овард, ки зимни иҷрои вазифаҳои бар ӯҳдаашон гузошташуда пурмасъулиятона меҳнат намоянд.

Маъруф Муҳаммадзода ба масъулини дахлдор дастур дод, ки дар зудтарин фурсат озмуни шаҳрии “Муаллими беҳтарин” ва “Мураббияи беҳтарин”-ро байни муассисаҳои таълимӣ эълон намоянд ва дар озмунҳои вилоятиву ҷумҳурӣ фаъолона иштирок кунанд.

 

Манбаъ: Дафтари матбуоти Раиси шаҳри Хуҷанд

 

Нет комментариев

Также рекомендуем