Илҳом Ҳофиззода донишҷӯи курси дуюми ихтисоси дифои ҳарбӣ ва тарбияи ҷисмонии факултети тарбияи ҷисмонии Донишгоҳи давлатии Хуҷанд ба номи академик Бобоҷон Ғафуров дар Ҷоми Осиё оид ба дзюдо (Cadet Asian Judo Cup), ки дар шаҳри Чирчиқи ҷумҳурии Узбекистон баргузор шуд, бо шикаст додани Эрмек Сариев, намояндаи Қирғизистон бо 100 гирифтани хол медали тиллоро соҳибӣ намуд.
Илҳомҷон Ҳофиззода, дар ин мусобиқа бо вазни -73 кило баромад намуд, нахуст бо ду намояндаи ҷумҳурии Узбекистон, сипас варзишгари тоҷик аз шаҳри Душанбе қувваозмоӣ намуда, ғолибият ба даст оварда, ба даври ниҳоӣ расид. Гуфта мешавад, ки дар ин мусобиқа 140 варзишгар аз 4 кишвар рақобат карданд. Ба ҳайати дастаи мунтахаби Тоҷикистон 22 нафар дохил буд. Дар ҳисоби дастаӣ мунтахаби Узбакистон бо касби 47 медал (11 тилло, 12 нуқра ва 24 биринҷӣ) ғолиб омад. Дастаи Тоҷикистон бо касби 9 медал (4 тилло, 1 нуқра ва 4 биринҷӣ) дувум шуд. Мунтахаби Қазоқистон бо касби 3 медал (1 тилло ва 2 нуқра) дар мақоми севвум қарор гирифт. Мунтахаби Қирғизистон бо 1 медали нуқра ва 1 нишони биринҷӣ дар зинаи охирин чаҳорум ҷой гирифт.
Бояд қайд намуд, ки чанде қабл Илҳом Ҳофиззода донишҷӯи курси дуюми ихтисоси дифои ҳарбӣ ва тарбияи ҷисмонии факултети тарбияи ҷисмонии Донишгоҳи давлатии Хуҷанд ба номи академик Бобоҷон Ғафуров дар мусобиқаи байналмиллалии «Ҷоми Вастан» оид ба дзю-до дар шаҳри Душанбе баргузор, дар вазни 66 кг байни 10 давлатҳои дунё ҷои сеюмро ишғол намуд.
Илҳом Ҳофиззода алҳол дар яке аз толорҳои варзишии шаҳри Хуҷанд таҳти раҳнамоиҳои Аҳмадҷон Тухсанов ва Фурқат Пӯлотов тамрин карда истодааст ва интизор меравад, ки ба наздикӣ дар яке аз мусобиқаҳои ҷаҳонӣ иштирок намояд.
Ба ин муносибат аҳли ҷомеаъи Раёсати Донишгоҳи давлатии Хуҷанд ба номи академик Бобоҷон Ғафуров Илҳом Ҳофиззодаро бо ин шарафмандӣ самимона табрику таҳният гуфта, ба эшон пеш аз ҳама тансиҳативу хотирҷамъӣ, хонаободӣ ва барои баланд бардоштани Парчами Тоҷикистони азиз азму иродаи қавӣ ва парвозҳои аз ин ҳам баландтарро таманно дорад. Дар ин бора аз Маркази иттилоот ва таҳили раёсати донишгоҳ иттилоъ доданд.
Нет комментариев