Microsoft ният дорад, ки пурра аз нишонаҳои махфӣ (пароль) бо истифода аз усули амнияти Windows Hello барои Windows 10, ки дар назар аст тобистони соли ҷорӣ бароварда шавад, даст кашад. Усули нав ба истифодабарандагон имкон медиҳад, ки ба воситаи изи ангуштонашон чеҳра ё пардаи чашмон, компютерҳояшонро кушоянд ё ба веб-сайтҳо дастрасӣ пайдо кунанд. Интегратсияи аслии системаҳои биометрӣ дар Windows 10, бо назардошти он ки чунин системаҳо, акнун ба электроникаи маишӣ, аз ноутбукҳо то смартфонҳо ҷорӣ кунонида мешаванд, як қадами хеле ояндадор маҳсуб меёбад. Microsoft мегӯяд, ки дар Windows Hello барои фавран шинохтани истифодабаранда, мебояд танҳо чеҳраи худро ба дастгоҳ нишон дод ё бо ангуштон онро ламс намуд. Бино ба маълумоти ширкат, асбоби нав нисбат ба истифодаи нишонаҳои анъанавӣ, хеле осон ва бехатар мебошад. Windows Hello, ба талаботи бехатарие, ки аз ҷониби ташкилотҳои тиҷоратӣ пешниҳод шудааст, ҷавобгӯ мебошад. Система истифодабарандагонро аз зарурати нигоҳ доштани нишонаҳо дар дастгоҳҳои компютерӣ ё шабакаи серверӣ, озод месозад, ки он ба ҳамлагарон мушкилиҳо меоварад. Ин маълумот, дар паёми blogs.windows.com ҷой дода шудааст.

Системаи Windows Hello бори аввал 18 март, дар ҳамоиши Windows Hardware Engineering Community (WinHEC), дар шаҳри Шэнчжен (Чин) ба ҷомеа муаррифӣ карда шуд.

Вазифаи шинохтани чеҳра ва чашм, дар асоси истифодаи камераҳои инфрасурх ба роҳ монда шудааст, ки дурустии баланди муайян намудани истифодабарандагонро кафолат медиҳад. Ин тадбир имконият медиҳад, ки пеши роҳҳои истифодабарии симои қалбакӣ гирифта шавад.

Дар якҷоягӣ бо Hello, ба версияи нави Windows, системаи Passport барои сохтани профили корбар, барои пайдо намудани дастрасӣ ба сомонаҳо ва барномаҳои гуногун илова карда мешавад.

Тавре қаблан иттилоъ дода будем, Windows 10 дар смартфонҳои Xiaomi озмуда мешавад.

Сарчашма : http://matrix-tv.tj/