Муқимҷон Абдуфаттоев: «Ниҳоят хурсандам, ки мухлисони зиёд дорам!»

0
233 просмотров

Театр-студияи «Хандинкамон» на танҳо дар ҷумҳуриамон, балки берун аз кишвар низ маълуму машҳур асту мухлисони худро дорад. Аз ин лиҳоз, дар Рӯзи ханда – 1-уми апрел, доир ба бурду бохти «Хандинкамон» бо роҳбари Театр-студияи мазкур, Аълочии фарҳанги Ҷумҳурии Тоҷикистон Муқимҷон Абдуфаттоев сӯҳбатеро анҷом додем, ки алҳол фишурдаи онро ба Шумо-мухлисони ҳаҷву мутоиба пешкаш менамоем.

Муқимҷон, қаблан Шумо ва дар симои Шумо  кулли ҳампешагонатонро бо Рӯзи ханда таҳният мегӯем. Бигӯед, ки аз давраи наврасиатон ҳамин хел ҳаҷвнигор будед ё…?

a_5ceae4f4

Вақте, ки хонандаи синфи якум будам, дар назди мактаб «маҳфили драмавӣ» амал мекарду ман низ ба он шомил гаштам. Устод Нарзуллохон моро роҳбарӣ мекарданд. Мо дар он ҷо аввал бо лӯхтакҳо саҳна омода намуда, баъдан оҳиста-оҳиста дар озмунҳое, ки байни мактабҳо гузаронида мешуд, иштирок мекардем. Дар «Бӯстон» бо як саҳнаи ҳаҷвиамон соҳиби ҷои аввал гардидем. Боз як чизи дигаре, ки ба ҳаёти ман таккони ҷиддӣ бахшидааст, лигаи «Ҳозирҷавобон» (КВН) буд. Мо аз номи Техникуми соҳаи хӯроквории шаҳри Исфара, ки ман дар он ҷо 4 сол таҳсил намудаам, баромад мекардем. КВН маро ба мардум ҳамчун санъаткор шинос намуд.

Хушбахтиатонро дар шӯҳратмандиатон мебинед ё мояи қиматтар аз ин доред барои бахти баланд?

Ман хушбахтам аз он ки падару модарам дар ҳаётанд, хушбахтам, ки соҳиби се нафар фарзанд ҳастам, хушбахтам аз он ки оилаам маро фаҳмида, касби интихобкардаи маро тарафдорӣ мекунад ва ниҳоят хурсандам, ки мухлис дорам.

Бароятон дар зиндагӣ чӣ муҳимтар аст: пул ё обрӯ?

846753345

Барои ман ҳам маблағ ва ҳам обрӯву эътибор лозим аст. Аксарият бар он ақидаанд, ки барои санъаткор танҳо обрӯ муҳим аст, вале ман ба ин фикр розӣ шуда наметавонам, зеро обрӯро бе пул пайдо кардан ғайри имкон аст. Барои машҳур шудан албатта маблағ лозим.

Бароятон дар саҳна латифа гуфтан осонтар ё суруд хондан?

59505650

 

Латифа гуфтан хубтар аст. Вақте латифа мегӯям, мухлисон табассум мекунанд ва ман аз хандаи онҳо илҳом мегирам.

 

Аз ҳаҷвнигорони ҷаҳон ҳунари киро эътироф мекунед?

Агар Худо дуруғчӣ накунад, дувумин китоби Аркадий Райкинро хонда истодаам. Бо ҳаҷвнигорони Ӯзбекистон Мирзобек Холметов ва Обид Асомов тариқи сомонаи интернет гуфтугӯ мекунем ва ман ба санъати онҳо баҳои баланд медиҳам. Орзу дорам, ки ҳаҷвнигоронро аз Ӯзбекистон ба Душанбе даъват карда, «Иди Ханда»-ро дар сатҳи баланд гузаронем.

Чаро маҳз театр-студияи «Хандинкамон»-ро ташкил кардед?

18947600

Вақте ки ман дар Техникуми хӯроквории шаҳри Исфара таҳсил мекардам, гурӯҳам номи Исфараро дошт. Дар телевизиони ҳамонвақтаи шаҳр бо як видеомагнитафон саҳнаҳои хурди 3-дақиқагиро тӯли 2-3 рӯз сабт мекардем. Баъди он ки саҳнаи омодакардаам тариқи телевизион пахш шуд, Раиси ҳамонвақтаи вилояти Суғд мӯҳтарам Қосим Қосимов маро ба шаҳри Хуҷанд даъват карданд ва 5 майи соли 2003 дар шафати бинои ҳозираи «Қасри ҷавонон» театр-студияи «Хандинкамон»-ро ташкил намудем.

Вақте ки аввалин маротиба дар Хуҷанд консерт мондем, ягона мухлисе, ки моро дастгирӣ мекард, корманди телевизиони вилоятӣ Ӯлмаси Хол буд. Ҳарчанд мухлис надоштему толор холӣ буд, ин марди нек саҳнаҳои моро ба навор гирифта, тариқи оинаи нилгун ба халқ муаррифӣ карданд. Санъати маро аксарият эътироф накарданд, мегуфтанд, ки инҳо каме дар саҳна росту дурӯғ мегӯянду чор танга пулро ҷамъ карда мераванд.

Ҳамчун ҳаҷвнигор кадом муаммоҳои зиндагиро ислоҳ карда тавонистед?

maxresdefault

Имрӯз аксарияти ҷавонони мо барои пайдо кардани қути лоямут ба Русия сафар мекунанду ҳамин ки чор танга пулро диданд, зану фарзанд, хонаву дарашонро фаромӯш карда, он ҷо оилаи нав бунёд мекунанд. Тӯли чанд сол боз ин муаммо ҳалли худро наёфтааст, аз ин лиҳоз мо ин масъаларо дар яке аз барномаҳоямон бо номи «Қулфу калид» мавриди баррасӣ қарор додем. Муносибати зану шавҳар, келину хушдоман ва монанди ин масъалаҳои зиндагии оилавиро ҳам дар саҳнаҳои худ ҷой медиҳем, то ки мардум хатои худро дида дар вақташ ислоҳ шаванд.

Пас аз «Қулфу калид» як нафар карманди хонаи пиронсолон ба ман гуфт, ки баъди тамошои барномаи шумоён як нафар омада модарашро гарифта рафт. Хурсанд шудам, ки саҳнаҳои офаридаи мо каме бошад ҳам, мардумро ислоҳ карда истодаанд.

Вақтҳои охир дар шаҳру ноҳияҳо, дар бозору мағозаҳо миқдори зиёди фиттаи намоишҳои театркунонидаатонро нусхабардорӣ карда, фурӯхта истодаанд. Ҳуқуқи муаллифии шуморо поймол намекунанд?

mqdefault

Чандин маротиба ба дирексияи кино ва видеои вилоят муроҷиат карда будам. Ваъда доданд, ки пеши роҳи ин ҳуқуқвайронкуниро мегиранд, вале ҳанӯз ҳам саҳнаю намоишҳои моро бо сифати паст ба фиттаҳои хитоӣ сабт намуда, мефурӯшанд. Ҳар як харидор бояд донад, ки агар сабти фитта хуб бошад, ҳеҷ вақт нархаш 1,5- 2 сомонӣ намешавад.

Сабаби вақтҳои охир бештар ба реклама рӯ оварданатон чист: манбаи даромад ё обрӯ?

Ҷои пинҳон карданаш нест, имрӯз кас барои қонеъ гардонидани талаботи худ меҳнат мекунад, то пули калон ёфта зиндагиашро таъмин намояд. Пул набошад зиндагиро пеш бурдан ғайри имкон аст, аз ҳамин сабаб ба реклама рӯй овардам, то манбаи даромад гардад.

x_0b4d7228

 

Таманниёти Шумо ба мухлисони Театр-студияи ҳаҷвӣ-мутоибавии «Хандинкамон».   

Ман ба ҳамаи онҳое, ки мухлиси ҳаҷву ханда ҳастанду нестанд, умри дарозу рӯзгори бобаракатро таманно дорам. Орзуву ниятҳое, ки дар дилашон мепарваранд, илоҳо ҷомаи амал пӯшад.

Хандед, хандед ва боз хандед!

 

 

Муқимҷон ташаккур барои посухҳоятон ба саволҳои мо. Ҳамеша саломату сарбаланд бошед.  Рӯзи ханда муборак!

Нет комментариев

Также рекомендуем

Дар Ҳиндустон борони сурх борид

Борони сурхе, ки дар як қатор ноҳияҳои шаҳри Каннури Ҳиндустон борид, сокинони маҳаллиро ба ташвиш овард. Боридани борон соати 6.50 дақиқаи саҳарӣ оғоз ёфта, 15 ...