Варзишгари тоҷик Сорбон Латифов дар Мусобиқаи байналмилалӣ оид ба самбои рамзӣ барои ҷоизаҳои Президенти Ҷумҳурии Қазоқистон Нурсултон Назарбоев, ки дар шаҳри Остона ҷараён дорад, медали нуқра ба даст овард.
Сорбон Латифов, варзишгари тоҷик дар рақобатҳо оид ба самбои рамзӣ дар вазни -62 кило баъди ду пирӯзӣ бар варзишгарони Ӯзбекистон ва Қазоқистон ба сабқат баромада, дар қувваозмоии ниҳоӣ аз ҷониби варзишгари қазоқ мағлуб гашт ва мақоми дувумро ишғол намуд.
Тавре, ки аз Кумитаи миллии олимпии кишвар хабар доданд, дар ин мусобиқаи байналмилалӣ беш аз 200 варзишгар аз 16 кишвари ҷаҳон (Беларус, Булғористон, Гурҷистон Арманистон, Кореяи Ҷанубӣ, Қазоқистон, Қирғизистон, Молдова, Монголия, Озарбойҷон, Олмон, Руминия, Россия, Тоҷикистон, Ӯзбекистон ва Ҷопон) қувваозмоӣ мекунанд.
Суруш Каримов, варзишгари дигари тоҷик низ дар ин мусобиқа иштирок дошта, дар сабқати самбои варзишӣ дар вазни -82 кило имрӯз, 8 июл вориди рақобат мешавад.
Ба иттилои Кумитаи миллии олимпӣ, Сорбон Латифов пагох, санаи 9-уми июл дар сабқати самбои варзишӣ дар вазни -62 кило рақобат мекунад.
Манбаъ: Агентии иттилоотии «Ховар»
Нет комментариев