Дар маҷлисгоҳи Мақомоти иҷроияи ҳокимияти давлатии шаҳри Хуҷанд бо иштироки муовини якуми Раиси вилояти Суғд Хол Ҳайдар ва роҳбарияти шаҳри Хуҷанд бо роҳбарони корхонаҳои саноатии шаҳр мулоқот баргузор гардид.
Раиси шаҳри Хуҷанд Маъруф Муҳаммадзода вохӯриро ифтитоҳ намуда, аз ҷумла зикр дошт, ки ин тадбир бо мақсади иҷрои дастуру супоришҳои Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вобаста ба эълон намудани саноатикунонии босуръати иқтисоди миллӣ, ки ҳамчун ҳадафи чоруми стратегии Ҷумҳурии Тоҷикистон муайян гардидааст, баргузор мешавад.
Сипас, муовини якуми Раиси вилояти Суғд Хол Ҳайдар таъкид намуд, ки ҳадафи мо суръатбахшӣ ба рушди соҳаи саноат, афзун намудани истеҳсоли молҳои воридотивазкунанда ва таъсиси ҷойҳои нави корӣ мебошад.
Хол Ҳайдар дар ҷараёни мулоқот аз ҳар як роҳбари корхонаҳои саноатии шаҳри Хуҷанд оид ба уҳдадориҳои истеҳсолӣ дар соли 2019 пурсиш ба амал оварда, эшонро ҷиҳати афзун намудани номгӯйи маҳсулот, бакорандозии иқтидорҳои бозмонда, самаранок истифода бурдани майдони ба истеҳсолот вобастагардида, баланд бурдани музди маош, таъсиси ҷойҳои нави корӣ вазифадор намуд.
Таъкид гардид, ки мо бояд дар самти расидан ба ҳадафи чоруми миллӣ- саноатикунонии босуръати кишвар аз тамоми имконоту захираҳо истифода карда, дар ободӣ ва шукуфоии ватани азизамон саҳмгузорӣ намоем.
Манбаъ: Хадамоти матбуоти Раиси вилояти Суғд
Нет комментариев