Вазири корҳои хориҷии Ҷумҳурии Тоҷикистон Сироҷиддин Муҳриддин дар ҳошияи нишасти 28-уми Шӯрои вазирони корҳои хориҷии кишварҳои ширкаткунандаи Созмони амният ва ҳамкорӣ дар Аврупо (САҲА) дар Стокҳолм бо Вазири корҳои хориҷӣ ва тиҷорати Маҷористон Петер Сийярто ва Вазири корҳои хориҷии Ҷумҳурии Латвия Эдгар Ринкевич мулоқот кард. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.
Зимни вохӯрии Сироҷиддин Муҳриддин бо Вазири корҳои хориҷӣ ва тиҷорати Маҷористон Петер Сийярто мавзӯъҳои таҳкими ҳамкории дуҷониба дар соҳаҳои маориф, варзиш, тандурустӣ, дастгирии иқдомҳои ду кишвар дар абзорҳои байналмилалию минтақавӣ, мубориза бо терроризму ифротгароӣ, инчунин вазъ дар Афғонистон баррасӣ шуданд.
Дар мулоқот вазирони корҳои хориҷии Тоҷикистон ва Латвия Сироҷиддин Муҳриддин ва Эдгар Ринкевич доир ба раванди равобити дуҷониба ва густариши минбаъдаи онҳо, ҳамкории муштарак дар доираи созмонҳои байналмилалӣ, аз ҷумла вазъ дар Афғонистон мубодилаи афкор намуданд.
Манбаъ: АМИТ «Ховар»
Нет комментариев