Раиси шаҳри Хуҷанд Раҷаббой Аҳмадзода  тибқи нақшаи кории худ бо сокинони маҳаллаи «Масҷиди савр» мулоқот намуд.
Зимни вохӯрӣ Раиси шаҳри Хуҷанд доири натиҷаҳои шаҳр дар соли сипаришуда ҳарф зада, қайд намуд, ки соли гузашта дар корхонаҳои шаҳр ба ҳаҷми 490 миллион сомонӣ маҳсулот истеҳсол шудааст, ки ин нисбати соли 2014 81млн сомонӣ зиёд аст.
Теъдоди корхонаҳои хурду миёна бошад 46 адад зиёд шуда, рушди соҳибкориро дар шаҳр таъмин намуданд. Музди маош бошад ба ҳисоби миёна 974 сомониро ташкил дод, ки ин нисбати соли рафта 15% зиёд аст.
Дар ҳамин замина 12 ҳазор нафар шахсони эҳтиёҷманд аз кӯмаки яквақтаи Мақомоти иҷроияи ҳокимияти давлатии шаҳри Хуҷанд бархурдор гашта, 300 нафар кӯдакон аз оилаиҳои қишри камбизоат  бо кӯмаки макомоти шаҳрӣ хатнатӯйи онҳо гузаронида шуд. Ҳамчунин давоми соли хониш 700 нафар хонандагон, ки бе волидайн ва ё дар оилаи эҳтиёҷманд тарбия мегиранд, бо хӯроки ройгон таъмин карда мешаванд.
Аз ҷониби Раиси шаҳри Хуҷанд дар мавриди иҷро нагардидани ӯҳдадорӣ аз ҷониби соҳибкори маҳаллӣ Раҳимхӯҷа Иброҳимов бобати таъмир ва азнавсозии чойхонаи маҳалла эрод гирифта шуд. Соҳибкори номбурда ваъда дод, ки то рӯзҳои таҷлили Наврӯзи соли равон чойхона мавриди истифодаи сокинон,собиқадорону муйсафедони маҳалла қарор хоҳад гирифт.
Ба Раиси шаҳри Хуҷанд дар мавриди ташкили инфросохторҳои муҳим дар маҳаллаҳои навбунёди шаҳр, бенизомии ҳаракати нақлиёт дар мавзеи автовокзали кӯҳнаи шаҳр, мумфаршкунии кӯчаҳои Деҳқон ва Эшони Шайдо, бетартиби ҳаракати нақлиёт дар пайроҳаҳои маҳалла, аз партов тоза намудани соҳили дарёи Сир, ки аз худуди маҳалла мегузарад ва чанде дигар масалаҳо муроҷиат намуданд.
Раиси шаҳри Хуҷанд аз роҳбарони воҳидҳои сохторӣ даъват намуд, ки бобати камбудиҳои зикргардида ва ислоҳи вазъ дар мӯҳлатҳои муқарраргардидаи қонун ҷавобҳои саҳеҳ ва қаноатбахш диҳанд.
Дар интиҳои мулоқот аз ҷониби Раиси шаҳри Хуҷанд Раҷаббой Аҳмадзода ба чанде аз сокинони маҳалла,ки барои ободонӣ ва корҳои хайри маҳалла саҳм гирифтанд, тӯҳфаҳои хотиравӣ супорида шуд. Дар ин бора  khujand.tj хабар медихад.