Нашри ду китоби профессори тоҷик дар Ҳиндустон

0
183 просмотров

Ду рисолаи илмии доктори илмҳои филологӣ, барандаи Ҷоизаи давлатии ба номи Исмоили Сомонӣ ва ҷоизаҳои Камоли Хуҷандӣ ва Маҳастӣ, профессори Донишгоҳи давлатии Хуҷанд ба номи академик Бобоҷон Ғафуров Замира Ғаффорова таҳти унвони “Адабиёти форсӣ дар Кашмир дар асрҳои XVI ва XVII” (550 саҳ.) ва “Ҷамолии Деҳлавӣ ва маснавии “Меҳру Моҳ” (335 саҳ.) аз ҷониби Институти таҳқиқоти форсии Донишгоҳи Алигарҳи Ҳиндустон ба нашр расид.

Рӯнамоии ин китобҳо санаи 21-уми феврали соли ҷорӣ дар дар Донишгоҳи Алигарҳи Ҳиндустон  баргузор шуд. Дар рўнамоии китобҳои олимаи тоҷик ректори Донишгоҳи Алигарҳ Ториқ Мансур, раиси Анҷумани устодони забон ва адабиёти форсии саросари Ҳинд Озармидухти Сафавӣ, раиси Институти таҳқиқоти форсии Алигарҳ Асадалӣ Хуршед, раиси Маркази таҳқиқоти форсии Деҳлӣ Аҳсануллоҳ Шукруллоҳӣ, муҳаққиқони кишварҳои Тоҷикистон, Эрон, Шри-Ланка ва устодони забон ва адабиёти форсии донишгоҳҳои мухталифи Ҳинд, аз ҷумла Деҳлӣ, Лакҳнав, Кашмир, Аллоҳобод, Беҷопур, Мумбай, Ҳайдаробод, Банорас иштирок доштанд.

Ин севумин китоби илмии Замира Ғаффорова аст, ки аз ҷониби ин муассисаи муътабари илмӣ ва панҷумин китоби ин олимаи мумтози тоҷик аст, ки дар сарзамини Ҳинд ба нашр мерасад. Қаблан китобҳои “Арзёбии ду тазкираи маъруфи Ҳинд: “Каламот-уш-шуаро” ва “Сафинаи Хушгӯ” (соли 2017) дар Донишгоҳи Алигарҳ ва маҷмӯаи мақолоти ў — “Ҷониби Ҳиндустон ояд ҳаме” (соли 2011) аз ҷониби Маркази таҳқиқоти форсии шаҳри Деҳлӣ ба нашр расида буд. Ҳамчунин, соли 2016 шумораҳои 71-72-юми маҷаллаи бонуфузи “Қанди порсӣ” ба вежаномаи фаъолияти илмии профессор Замира Ғаффорова ихтисос дошт, ки 550 саҳифа мақолаҳои ин донишманди камназири тоҷикро фаро мегирифт. Гуфтанист, ки бори аввал аст, ки маҷаллаи мазкур вежаномаеро барои олимони тоҷик ихтисос медиҳад.

Ба нашр расидани панҷ китоби бонуи донишманди тоҷик дар сарзамини Ҳинд аз густариши муносибатҳои илмии Тоҷикистону Ҳиндустон шаҳодат медиҳад.

Манбаъ: Хадамоти матбуоти Раиси вилояти Суғд

Нет комментариев

Также рекомендуем

%d такие блоггеры, как:

Сообщить об опечатке

Текст, который будет отправлен нашим редакторам: