Нимпайкараи Арслонбек Ғозибеков дар майдони «Ситораҳои Хуҷанд»

0
437 просмотров

Дар майдони «Ситораҳои Хуҷанд» боз як нимпайкара зиёд шуд. Тавре, ки иттилоъ дода будем, дар иҷлосияи ҳабдаҳуми Маҷлиси вакилони халқи шаҳр вакилон пешниҳоди Комиссияи номгузорӣ ва ивази номи иншоотҳои таърихию ҷуғрофии мақомоти иҷроияи ҳокимияти давлатии шаҳри Хуҷанд оид ба гузоштани нимпайкараи Арслонбек Ғозибеков дар майдони «Ситораҳои Хуҷанд» якдилона дастгирӣ намуда буданд ва имруз бо иштироки намояндагони Мақомоти иҷроияи ҳокимияти давлатии шаҳри Хуҷанд ва хешону пайвандони марҳум Арслонбек Ғозибеков парда аз рӯйи нимпайкараи эшон бардошта шуд.

Дар маросими ифтитоҳии чорабинӣ муовини Раиси шаҳри Хуҷанд Фирӯза Нуруллозода баромад намуда, аз ҷумла таъкид дошт, ки қадршиносӣ намудани хизматҳои шоёни ходимони барҷастаи давлатию ҷамъиятӣ, Арбобони намоёни илму фарҳанг, зиёиёни пешқадам дар меҳвари асосии фаъолияти инсонпарваронаи Асосгузори сулҳу Ваҳадти миллӣ, Пешвои миллат, Президенти мамлакат муҳтарам Эмомалӣ Раҳмон қарор дорад. Гузоштани нимпайкараи Арслонбек Ғозибеков дар майдони «Ситораҳои Хуҷанд» гувоҳи ин гуфтаҳост.

Иттилоъ дода шуд, ки Арслонбек Ғозибеков соли 1929 дар шаҳри Хуҷанд таваллуд шудааст. Пас аз хатми мактаби миёна солҳои 1946 то соли 1949 дар техникуми кооперативии шаҳри Хуҷанд аз рўи ихтисоси муҳосибӣ таҳсил намуда, баъдан дар ҷамъияти матлуботи шаҳри Сталинобод ҳамчун муҳосиб фаъолияти кории худро оғоз намудааст.

Соли 1970 дар анҷумани кооператорони вилояти навбунёдшудаи Ленинобод якумин раиси Садорати иттифоқи ҷамъияти матлуботи вилоят интихоб гардида, то соли 1972 дар ин вазифа кор кардааст.

Баъдан муовини аввали раис ва соли 1976 раиси садорати Тоҷикматлубот интихоб гардидааст. А. Ғозибеков дар ин вазифа то соли 1987 фаъолият бурда, ин соҳаро аз сари нав тарҳрезӣ намудааст ва имкониятҳои мавҷударо баҳри бунёди корхонаҳои нави савдо ва ривоҷи савдои кооперативӣ дар ҷумҳурӣ равона кардааст. Инчунин барои сохтмони техникуми кооперативии шаҳри Душанбе барои 1200 нафар донишҷў, комплекси варзишӣ ва ду хобгоҳ саҳмгузорӣ намудааст.

Пас аз дар шаҳри Душанбе сохта ба истифода дода шудани филиали Институти савдои кооперативии Новосибирск соли 1987 А. Ғозибеков ба вазифаи ноибректори ин донишкада таъин гардидааст. Соли 1991 бошад дар заминаи филиали Институти савдои кооперативии Новосибирск муассисаи мустақил Донишкадаи тиҷоратии Тоҷикистон таъсис дода шуда, А. Ғозибеков дар ин донишгоҳ ректор таъин мегардад.

Дар шароити нави иқтисодиёти бозоргонии Тоҷикистони соҳибистиқлол дар вилояти Суғд зарурият ба миён омад, ки бояд филиали Донишкадаи давлативу кооперативии тиҷоратӣ ташкил карда шавад.

Ташаббускор ва созмондиҳандаи он А. Ғозибеков буда, аз соли 1993 бахши донишкада дар шаҳри Хуҷанд ба фаъолият оғоз гардид ва роҳбарии ин донишкада ба зиммаи А. Ғозибеков гузошта шуд. Соле нагузашта бо қарори Ҳукумати Ҷумҳурии Тоҷикистон дар вилояти Суғд Донишгоҳи ҳуқуқ, бизнес ва сиёсати Тоҷикистон таъсис дода шуда, А. Ғозибеков ректор таъин гардидааст.

Фаъолиятҳои пурсамари илмӣ, педагогӣ ва ҷамъиятиву давлатии А. Ғозибеков аз тарафи Ҳукумати Ҷумҳурии Тоҷикистон қадршиносӣ карда шуда, бо ду ордени «Нишони фахрӣ», ордени «Дўстии халқҳо», ордени «Шараф», медали ҷашнии «Барои меҳнати шуҷоатнок», «Аълочии савдои советӣ», «Аълочии мусобиқаи сотсиалистии Вазорати хўроки умумии СССР», «Ифтихорномаи Президенти Шўрои Олии Ҷумҳурии Тоҷикистон», унвони фахрии «Иқтисодчии хизматнишондодаи Ҷумҳурии Тоҷикистон» ва бо якчанд ифтихорномаҳо сарфароз гардонида шудааст. Таъкид гардид, ки А. Ғозибеков муаллифи зиёда аз 90 асарҳои илмӣ, илмию методӣ ва мақолаҳо буда, дар ҳимояи рисолаҳо ба сифати муқарризи расмӣ баромад намудааст ва тақризҳои илмӣ навиштааст.

Инчунин ў дар якчанд конфронсу симпозиумҳои ҷумҳуриявӣ, байналмиллалӣ ва мамолики бурунмарзӣ (Финляндия, Португалия, Испания, Ҷопон ва Фаронса) иштирок ва баромад намудааст. Профессор якчанд маротиба ба аъзогии КМ ПКТ дар съездҳои Х1Х, ХХ ва вакили халқии Шўрои Олии Ҷумҳурии Тоҷикисчтон даъватҳои 1Х, Х, Х1 интихоб гардидааст. Ғозибеков А. соли 2008 дар синни 79 солагиаш вафот кардааст.

Сипас, шогирдону пайвандони А. Ғозибеков ба Роҳбарияти Давлату Ҳукумат, Мақомоти иҷроияи ҳокимияти давлатии вилояти Суғд ва Мақомоти иҷроияи ҳокимияти давлатии шаҳри Хуҷанд барои қадршиносӣ миннатдорӣ баён намуданд.

Манбаъ: Дафтари матбуоти Раиси шаҳри Хуҷанд

Нет комментариев

Также рекомендуем

%d такие блоггеры, как:

Сообщить об опечатке

Текст, который будет отправлен нашим редакторам: