Қоғази махсус барои тоза кардани смартфон дар ҳоҷатхонаҳо

0
111 просмотров

Қоғаз барои смартфон,  чӣ чизҳоеро фикр карда намебароянд ин ҷопониҳо. Воқеан ин чиз аҷиб ба гӯш мерасад. Дар ҳақиқат ҳам қоғаз барои тоза кардани смартфон аз чиркинӣ он қадар чизи нолозима ҳам нест, ки дар назар метобад. Зеро дар дохили ҳоҷатхонаҳо, аз ҷумла дар ҷойҳои ҷамъиятӣ мо ҳеҷ вақт аз дастгоҳи мобилии худ ҷудо намешавем, яъне қариб ба ҳама ҷой онро ҳамроҳи худ  медарорем. Дар ин гуна ҷойҳо, яъне дар даруни ҳоҷатхонаҳо ҳаво аз ҳар намуд микробҳо бой аст, ки ба рӯйи смартфони мо дар намуди як қабати тунук менишинанд. Маҳз дар ин хел ҳолатҳо қоғази махсусе, ки маҳсули истеҳсоли давлати Ҷопон буда,   барои гузоштан дар ҳоҷатхонаҳо пешбинӣ шудааст, ба кӯмаки Шумо меояд.

Нахустин ҳоҷатхонаҳое, ки баҳри таҷриба кардани ин гуна қоғази тозакунӣ барои гаджет сазовор дониста шуданд, ин ҳоҷатхонаи фурудгоҳи байналхалқии Нарита дар шаҳри Токио гардид. Ташаббускори барномаи ғайриоддӣ оператори мобилии бузурги ҷопонии NTTDoCoMo мебошад. Ҳар як пораи лӯлапечи хурди қоғази  барои смартфон пешбинӣ кардашуда дорои маълумот дар бораи чӣ тавр пайваст шудан ба шабакаи  Wi-Fi-и ройгони фурудгоҳ мебошад. Инчунин мусофир оиди ҳамаи саволҳои барояш муҳим дар қоғаз маълумот пайдо карда метавонад. Дар он инчунин дастурамал оиди чӣ тавр бо ёрии ин қоғаз нест кардани микробҳо аз сатҳи гаджет маълумот нашр карда шудааст.

Агар ягон кас аз болои ин гуна инноватсияҳо ханда кунад, пас Шуморо ба бовар кунонидан мешитобем, ки воқен ҳамаи ин амалиёт моҳият ва муҳиммияти муайяни худро дорад. Албатта мову Шумо дастони худро нисбатан тез-тез мешӯем, вале аз ин чӣ суд, агар смартфони мо моҳҳо ба худ ифлосиро зам кунад? Мо бошем, ба намуди гаджетамон нигоҳ мекунему «тозаку» мегӯему онро аз чиркинӣ тоза намекунем. Баъдан мо смартфонро ба мизи хӯрокхӯрӣ, ба ҷойгаҳи хоб ҳамроҳи худ мегирем. Ана пас аз пешниҳоди ин далелҳо ҳисоб кунед, ки чопониҳо воқеан ҳам бо офаридани қоғази тазоканунадаи смартфон, ки дар ҳоҷатхонаҳо гузошта мешаванд, як кори хеле ҳам хуб кардаанд. Умедворем, ки шояд тамоюли истифодабарии коғаз барои тозакунии гаджет ба наздики дар дигар кишварҳо низ густариш меёбад.

Нет комментариев

Также рекомендуем