Оғози ҳаракати автобусҳои нав дар шаҳри Хуҷанд

0
775 просмотров

Ин суханон зимни нишасти матбуотии Раиси шаҳри Хуҷанд Маъруф Муҳаммадзода оид ба натиҷаҳои фаъолияти Мақомоти иҷроияи ҳокимияти давлатии шаҳр дар 6 моҳи аввали соли 2018, ки бо иштироки зиёда аз 40 нафар рӯзноманигорони дохилию хориҷӣ баргузор гардид, гуфта шуданд.

Гуфта шуд, ки аз санаи 31-уми июли соли равон ҳаракати автобусҳои нав дар навбати аввал аз рӯи ду хатсайр ба роҳ монда мешавад. Бино ба иттилои Раиси шаҳр оғоз аз ҳафтаи оянда, санаи 31-уми июл автобусҳо сараввал тариқи 2 хатсайр ба кор оғоз мекунанд. Баъдан дар назар аст, ки моҳи август ва дар умум то охири моҳи сентябр боқимонда автобусҳо ба Хуҷанд тариқи роҳи оҳан оварда шуда, оғоз аз моҳи октябр ҳамаи 100 автобус аз рӯи 10 хатсайри муайян ҳаракат мекунанд. Дар ин замина аз сабаби оне, ки аксарияти ронандагон аз автовокзали «Пахтакор» ба микроноҳияи 3-юм рафтан нахостанд, қарор карда шуд, ки дар минтақаи «Галамайдон» як истгоҳи охирон, яъне автовокзали нав сохта мешавад, то автобусҳо дар он ҷо қарор гиранд. Дигар паҳлу он аст, ки оҳиста-оҳиста то ба кор даромадани ҳамаи хатсайрҳо ҳамаи маршруткаҳо аз шаҳр бароварда шуда, дар самти беруназшаҳрӣ кор мекунанд. Аз сабаби оне, ки автобусҳо калон ва ғунҷоишашон бисёртар аст, тибқи нақшаи пешина хатсайрҳо дар масофаи дароз ба ҳисоб гирифта шудаанд. Яъне, 3 мкр — Ғафуров, 3 мкр — Бӯстон, 3 мкр — Гулистон, аз 34 мкр — Ғафуров, 34 мкр — Бӯстон, 34 мкр — Гулистон, ҳамчунин,  3 мкр — Пахтакор-Галамайдон, 34 мкр — Пахтакор-Галамайдон, зикр дошт шаҳрдор.

alt

Раиси шаҳри Хуҷанд Маъруф Муҳаммадзода ҳамзамон афзуд, ки Мақомоти иҷроияи ҳокимияти давлатии шаҳри Хуҷанд баҳри иҷрои дастуру супоришҳои Асосгузори сулҳу Ваҳдати миллӣ-Пешвои миллат, Президенти мамлакат мӯҳтарам Эмомалӣ Раҳмон доир омодагӣ ба таҷлили 30 солагии Истиқлолияти давлатии Ҷумҳурии Тоҷикистон ва дар амал татбиқ намудани Қарори Раиси вилояти Суғд Раҷаббой Аҳмадзода “Дар бораи эълон гардидани 1300 рўзи ободонию созандагӣ” давоми 6 моҳи соли ҷорӣ дар самти суръатбахшии истеҳсолот, пешбурди ҳамаи паҳлуҳои ҳаёти ҷамъиятию сиёсӣ, иқтисодию иҷтимоӣ, равнақи созандагию бунёдкорӣ ва ободонӣ чораҳои амалӣ андешида, ба нишондиҳандаҳои иҷтимоию иқтисодӣ устуворӣ ва тақвият бахшида шуд.

Маъруф Муҳаммадзода афзуд, ки дар раванди саноатикунонии кишвар ҳаҷми маҳсулоти саноатии истеҳсолшуда бо назардошти тақсимоти барқ ва об нисбат ба ҳамин давраи соли гузашта 55,8 миллион сомонӣ ё 12,4 дар сад афзоиш ёфта, ҳаҷми он ба 507,6 миллион сомонӣ расидааст. Аз ин миқдор маҳсулот ба маблағи 93,9 миллион сомонӣ ба давлатҳои хориҷи кишвар содирот карда шудааст, ки он дар муқоиса ба ҳамин давраи соли сипаригашта 31,7 дар сад ё 22,6 миллион сомонӣ афзоиш ёфта, он барои рушди иқтидори содиротии шаҳр заминаи устувор мегузорад. Дар корхонаҳои саноатӣ 73 намуд маҳсулотҳои ниёзи мардум истеҳсол карда мешавад, ки аз онҳо ҳаҷми 52 намуд маҳсулотҳо нисбат ба ҳамин давраи соли 2017 аз 100 фоиз то 6 маротиба зиёд истеҳсол карда шудааст. Дар рушди бемайлони иқтисодиёти шаҳр муомилоти гардиши молҳо саҳми арзанда дошта, ҳаҷми он дар ин давра ба 1581 млн сомонӣ расида, ҳаҷми хизматрасониҳо 579,8 млн. сомониро ташкил дода, онҳо нисбат ба ҳамин давраи соли сипаригашта бо нархҳои ҷорӣ мутаносибан 46,6 ва 25,5 дар сад афзоиш ёфтаанд.

Раиси шаҳр иттилоъ дод, ки робитаҳои иқтисодӣ собит менамояд, ки имрўз шаҳри Хуҷанд бо 38 мамолики дуру наздик ҳамкорӣ дошта, ҳаҷми гардиши савдои хориҷӣ дар давраи ҳисоботӣ ба 156,0 млн. доллари амрикоӣ, аз ҷумла воридот 137,8 млн доллари амрикоӣ ва содирот 18,2 млн доллари амрикоиро ташкил менамояд, ки ҳаҷми маҳсулотҳои содир гашта, нисбат ба ҳамин давраи соли сипаригашта 24,7 дар сад, ё ба маблағи 3,6 млн доллари амрикоӣ зиёд шудааст. Тақвияти иқтидории нишондиҳандаҳои ҳамаи самтҳои иқтисодию иҷтимоии ин давра ба мо имкон дод, ки иҷрои нақшаи буҷети давлатӣ 103,4 фоиз ва буҷети маҳаллӣ 100 фисад таъмин гардида, аз нақшаҳои пешбинишуда мутаносибан дар ҳаҷми 6,1 млн. сомонӣ ва 80,6 ҳазор сомонӣ зиёд маблағ ба буҷет ворид гардад.

alt

Ба таъкиди Роҳбари шаҳр раванди бунёдкориву созандагӣ яке аз рисолатҳои шаҳрвандии мо ба ҳисоб рафта, дар ин ниҳод бинокорони шаҳр саҳми назаррас гузошта, аз ҳисоби ҳамаи сарчашмаҳои молиявӣ маблағгузории асосӣ 91,9 миллион сомониро ташкил дода, ба маблағи 73,8 миллион сомонӣ корҳои сохтмонию васлкунӣ ба анҷом расонида шудааст, ки он нисбат ба ҳамин давраи соли сипаригашта мутаносибан 34,8 дар сад ва 22,8 дар сад афзоиш ёфтааст. Ҳамагӣ дар ин давра 12 иншооти маданию маишӣ, истиқоматию коммуналӣ ва саноатӣ бо арзиши фондҳои асосии 86,5 млн. сомонӣ сохта ба истифода дода шуд.

Маъруф Муҳаммадзода афзуд, ки бо иштироки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, мўҳтарам Эмомалӣ Раҳмон санаи 29 марти соли ҷорӣ ба фаъолияти Маҷмааи меҳмон-хонаи байналмиллалии “Парламент” расман ҳусни оғоз бахшиданд. Инчунин дар арафаи иди “Наврўз – 2018” дар маркази шаҳр қаҳвахона-тарабхонаи замонавӣ бо номи “Ситораи Хуҷанд” бо саҳми соҳибкорон сохта ба истифода дода шуда, дар ин бино барои қабули 70 нафар меҳмонону сайёҳон, меҳмонхона омода шуда истодааст. Қайд намудан ба маврид аст, ки дар рўзҳои таҷлили Иди Ваҳдати миллӣ аз тарафи Пешвои миллат, мўҳтарам Эмомалӣ Раҳмон маҷмааи хонаҳои истиқоматӣ, боғча ва чойхона дар маҳаллаи Суғдиён, кӯдакистони №28 дар маҳаллаи “Навбаҳор”, корхонаи муштараки “Арча-мебел” баҳри истифодабарӣ қарор дода шуданд.

Раиси шаҳр гуфт, ки дар ин давра 6 иншооти варзишӣ ба истифода дода шуд. Аз ҷумла: 2 майдончаи варзишӣ барои бозии футбол дар кўчаи Сирдарё, назди Маҷмааи меҳмонхонаи “Парламент”, 1 майдонаи варзишии футболи хурди болопўшида бо 200 ҷои нишаст дар шафати “Варзишгоҳи ба номи 20 — солагии Истиқлолияти Тоҷикистон”, толори варзишӣ оид ба намуди бокс дар маҳаллаи Мевағул назди МТМУ №23, майдончаи варзишӣ дар маҳаллаи “Навбаҳор” ва майдончаи варзишию бозии кўдакона дар маҳаллаи “Суғдиён” мавриди истифодабарӣ қарор дода шуд.

Бо мақсади иҷрои дастуру супоришҳои Президенти мамлакат мӯҳтарам Эмомалӣ Раҳмон дар рўзҳои иду ҷашнвораҳо зиёда аз 5000 нафар эҳтиёҷмандон, аз ҷумла иштирокчиён ва маъюбони Ҷанги бузурги Ватанӣ, шахсони барўманд, иштирокчиёни сохти конститутсионӣ, ятимону маъюбон ва оилаҳои камбизоату ниёзмандон аёдат карда шуданд.

Вобаста ба самти ободонӣ иттилоъ дода шуд, ки соли ҷорӣ 32,5 км таъмири роҳҳои автомобилгард, аз ҷумла 12,5 км таъмири роҳҳо ва кўчаю хиёбонҳо ва 20,0 км роҳҳои автомобилгарди байни биноҳои истиқоматии микроноҳияҳо ва дохилии маҳал-лаҳо ба нақша гирифта шуда, то имрўз зиёда аз 17 км роҳҳо асфалтпўш карда шуда, корҳо дар ин самт тақвият меёбанд. Боиси тазаккур аст, ки бо дастгирии мақомоти иҷроияи ҳокимияти давлатии вилоят ва бевосита дастгирии Раиси вилояти Суғд, мўҳтарам Раҷаббой Аҳмадзода кўчаи 30 солагии Ғалаба, кўчаи Сирдарё аз Наврўзгоҳ то гардиши Ором, байни микроноҳияҳои 12-13 бо сифати баланд мумфарш карда шуданд.

Маъруф Муҳаммадзода гуфт, ки дастаи мактаббачагони шаҳр дар Олимпиадаи вилоятӣ (синфи 11, анъанавӣ) ба гирифтани 36 мақоми ифтихорӣ мушарраф гарди-данд ва дар Олимпиадаи ҷумҳуриявӣ ба 21 ҷой сазовор гардиданд. Дар Олимпиадаи вилоятӣ аз фанҳои дақиқ барои синфи 5-8-ум 93 нафар хонандагони муассисаҳои таълимии шаҳри Хуҷанд иштирок намуда, 51 нафар ба гирифтани ҷойҳои ифтихорӣ сазовор гаштанд. Дар ҷамъбаст дастаи хонандагони муассисаҳои таълимии шаҳр барои гирифтани 31 ҷойи ифтихорӣ дар олимпиадаи ҷумҳуриявӣ ноил гардиданд, ки ин нишондиҳанда ҷойи аввал байни шаҳру ноҳияҳои вилояти Суғд мебошад. Ду рӯз қабл аз рӯйи натиҷаҳои ҷамъбасти соли таҳсили 2017-2018-и Вазорати маориф ва илми Ҷумҳурии Тоҷикистон аз 11 медалҳои тиллою нуқра, 6 нафарашро муҳассилини шаҳри Хуҷанд, дақиқтараш хатмкунандагони литсейи физикӣ-математикии ба номи академик Муҳаммад Осимии шаҳр аз рӯйи равияи табию риёзӣ ба даст оварданд.

Сипас, аз тарафи намояндагони расонаҳои хабарӣ, аз ҷумла Ҷовиди Аштӣ, (рӯзномаи “Ҷумҳурият”, Мирзоаъзам Мақсудов (рӯзномаи “Садои мардум”) Дадохони Эгамзод (маҷаллаи “Ноҳид”), Муҳайё Воситзода (рӯзномаи “Тирози ҷаҳон”), Тилав Расулзода (ОИ “ФерганаРу”), Нуъмон Раҷабзод, (рӯзномаи “Омӯзгор”), Абдуаҳад Дадобоев (АМИТ “Ховар”), Фирӯза Мирҷумъаева (ШТР “Диёр”), Мастона Муҳиддилозода (телевизиони вилоятии “Суғд”), Сино Ғафурӣ (ШТР “Танин”), Ҷамшеди Маъруф (радиои “Пайванд”), Уғулой Раҷабова (ШТР “7 ситора”) ва дигарон доир ба содироти молҳои саноатии шаҳр, ҳаракати автобусҳои нав дар хатсайрҳо, корҳои ободонӣ бахшида ба 30 солагии Истиқлолияти давлатии Ҷумҳурии Тоҷикистон, ҳамкории иқтисодӣ бо кишвари Ӯзбекистон, бунёди макотибу кӯдакистони нав, ҳамкорӣ бо бародаршаҳрҳои Хуҷанд, тадбирҳо баҳри арҷгузории Қаҳрамони халқи тоҷик Темурмалик ва ғайраҳо саволҳо дода, ҷавобҳои мушаххасу равшан аз ҷониби Раиси шаҳри Хуҷанд Маъруф Муҳаммадзода дарёфтанд.

Дар анҷоми нишасти матбуотӣ Раиси шаҳри Хуҷанд Маъруф Муҳаммадзода аз раванди хуби ҳамкориҳои судманди тарафайн тавсиф намуда, аз рӯзноманигорон даъват ба амал овард, ки баҳри рушди ҳамкориҳои минбаъда бо шаҳрдорӣ фаъол бошанд.

Манбаъ: Дафтари матбуоти Раиси шаҳри Хуҷанд

Нет комментариев

Также рекомендуем

%d такие блоггеры, как:

Сообщить об опечатке

Текст, который будет отправлен нашим редакторам: