Дар хоҷагии деҳқонии “Ҳайитбой”-и Ҷамоати деҳоти Гулхонаи ноҳияи Ҷаббор Расулов бо иштироки Раиси вилояти Суғд Раҷаббой Аҳмадзода ба кишти пахта оғоз бахшида шуд.
Дар ин мавзеъ навъҳои гуногуни тухмии пахта, заҳрдоруҳои кимёвӣ ва дигар лавозимоти кишоварзӣ муаррифӣ карда шуд. Раҷаббой Аҳмадзода зимни суҳбат бо хоҷагидорон ва кишоварзони ноҳияи Ҷаббор Расулов аз имкониятҳои фарохи соҳаи кишоварзӣ ёдоварӣ намуд. Дар ин рӯз бо дуои неки пирони рӯзгор ва кишоварзони соҳибтаҷриба кишти пахта оғоз ёфт. Тибқи иттилои масъулин соли равон дар ноҳияи Ҷаббор Расулов дар майдони 6 ҳазор гектар пахта кишт карда мешавад.
Сипас, Раиси вилоят аз хоҷагии деҳқонии “Улуғбек”-и Ҷамоати деҳоти Деҳмой боздид намуд. Дар хоҷагии мазкур зироатҳои кишоварзӣ ба усули зерипардагӣ парвариш ва ҳосили дилхоҳ ба даст оварда мешавад. Иттилоъ дода шуд, ки дар як гектар замин имкони ба даст овардани бештар аз 20 тонна карам мавҷуд аст. Ҳоло дар нимгектар замин 6 намуди зироати кишоварзӣ парвариш ва нашъунамои хуб дорад. Раиси вилоят ба кори деҳқонони ин хоҷагӣ баҳои баланд дода, ҷиҳати руёнидани ҳосили фаровон дастуру маслиҳатҳои муфид дод.
Манбаъ: Хадамоти матбуоти Раиси вилояти Суғд
Нет комментариев