Дар кинотеатри Ватан шоми рӯзи 19 ноябр аввалин Фестивали филмҳои фаронсавӣ, ки аз ҷониби Сафорати Фаронса дар Тоҷикистон ташкил шудааст, ифтитоҳ гардид.
Бино ба иттилои дафтари матбуоти Вазорати фарҳанги ҷумҳурӣ, дар ин бора ба рӯзноманигорон Сафири Фаронса дар Тоҷикистон хонум Ясмин Гуедар зимни нишасти матбуотӣ иттилоъ дода, иброз доштааст, ки Сафорати Фаронса дар Тоҷикистон ният дорад, ки лоиҳаҳои зиёдеро дар соҳаи синамо амалӣ гардонад.
Аз ҷумла онҳо кӯшиш доранд, ки робита ва ҳамкориро байни Тоҷикфилм ва Маркази миллии синамои Фаронса ба роҳ монанд.
Дар доираи Аввалин Фестивали филмҳои фаронсавӣ дар Душанбе аз 19 то 23 ноябри соли ҷорӣ ҳамарӯза соати 17:30 дар хонаи синамои Ватан филмҳои жанрашон мухталифи фаронсавӣ, ки дар солҳои гуногун наворбарборӣ шудаанд, манзури тамошобинон гардонида мешаванд.
Аз ҷумла филмҳои кӯтоҳметража ва пурраметража мисли «Саёҳат ба моҳ», «Номаҳои бонувон», «Кэ дОрсе», «Нафаре аз Рио» «Бел ва Себастян», «Хотирот» ки дар жанрҳои классика, мазҳака, саргузашт, драмаи мазҳакавӣ таҳия гардидаанд, манзури мухлисони санъати синамо гардонида мешаванд.
Даромад ба фестивал ройгон аст. Филмҳо бо забони фаронсавӣ бо субтитри русӣ ба маъраз гузошта мешаванд. «Мо ният дорем, ки тарҷумаи филмҳои фаронсавиро ба забони тоҷикӣ ба роҳ монем ва дар оянда филмҳоро бо субтитри тоҷикӣ пешкаши тамошобинон гардонем», — иброз дошт Сафири Фаронса дар Тоҷикистон.
Хонум Ясмин Гуедар инчунин гуфт, ки хонаи синамои Ватанро яке аз ҷойҳои зеботарини шаҳр меҳисобад ва хеле хурсанд аст, ки маҳз ҳамин мавзеъ барои баргузории Аввалин Фестивали филмҳои фаронсавӣ дар Душанбе интихоб шудааст.
Сафири Фаронса дар Тоҷикистон ба Муассисаи давлатии «Тоҷикфилм», ба Вазорати фарҳанги Ҷумҳурии Тоҷикистон, ба маркази фарҳангии «Бохтар» ва ба тамоми онҳое, ки дар ташкили ин фестивал ҳисса гузоштанд, изҳори сипос намуд.
Манбаъ: https://news.tj
Нет комментариев