Дирӯз дар Қасри варзиши шаҳри Хуҷанд Ярмаркаи байналхалқии савдо “Суғд-2017” ба кори худ оғоз кард.
Дар ярмаркаи мазкур, ки чор сол инҷониб бо ташаббуси Мақомоти иҷроияи ҳокимияти давлатии вилояти Суғд ва бо мақсади дастгирии рушди савдои байналмилалӣ, баланд бардоштани нерӯи содиротӣ, ба роҳ мондани ҳамкории судманд бо давлатҳои хориҷии дуру наздик, ҷалби сармоягузорӣ ва воридоти технологияҳои муосир, ба намоиш гузоштани меваю сабзавоти тару тоза, хушкмеваҳо, намудҳои гуногуни маҳсулоти саноатӣ ва маҳсули ҳунарҳои мардумӣ баргузор шуд, беш аз 200 нафар соҳибкорону тоҷирон ва намояндагони ширкатҳои дохилию хориҷӣ, намояндагон аз 10 давлати дунё ва 23 ташкилоти байналхалқӣ ширкат варзиданд, ки аз баланд гардидани нуфузи ин чорабинӣ гувоҳӣ медиҳад.Бояд гуфт, ки ярмаркаи мазкур дар муддати кутоҳ аз чорабинии минтақавӣ ба намоишгоҳи байналмиллалӣ табдил ёфтааст, ки аз нуфузи баланди он дарак медиҳад. Мақсади ташкили ярмаркаи байналхалқии савдо — ин мустаҳкам намудани тиҷорати дарозмуддат ва робитаҳои ҳамкорӣ байни ҷомеаи соҳибкории вилояти Суғд ва дигар минтақаҳои Тоҷикистон бо ширкатҳои тиҷоратӣ, муштариёни эҳтимолӣ, сармоягузорон ва доираҳои соҳибкории кишварҳои хориҷӣ тавассути таъмини платформа барои нишон додани қобилият ва имконоти иқтисоди вилояти Суғд ва таҷрибаи пешқадами кишварҳои дуру наздики хориҷӣ мебошад. Дар маросими ифтитоҳи ярмаркаи савдо муовини Раиси вилоят Анвар Яъқубӣ ва меҳмонони чорабинӣ-намояндаҳои минтақавии давлатҳои иштирокчӣ, намояндагони корпусҳои дипломатию тиҷоратӣ ва ташкилотҳои байналмилалӣ ширкат варзиданд.
Дар оғози Ярмаркаи байналхалқии савдо “Суғд-2017” инчунин намояндаи Парлумони кишвар Шариф Рахимзода, сафири фавқулодда ва мухтори Белорусия дар Тоҷикистон Олег Иванов, намояндаи тиҷоратии Федератсияи Россия Михаил Кораблин, директори Барномаи рушди СММ Ян Харфст, роҳбари Бонки рушди Олмон Кристин Лабс, роҳбари Бонки таҷдид ва рушди Аврупо дар Тоҷикистон Айтен Рустамова, роҳбари палатаи савдо ва саноати шаҳри Тошканди Ҷумҳурии Ӯзбекистон Файзулло Маманов ва муовини аввали раиси шаҳри Могилёви Ҷумҳурии Белорус Александр Патёмкин сухан карда, изҳор намуданд, ки ташкили чунин чорабинии сатҳи байналмилалӣ ва дар маҷмуъ рушди соҳаҳои гуногуни кишвар пеш аз ҳама ба сиёати оқилонаи Сарвари давлати Тоҷикистон ва Ҳукумати Ҷумҳурии Тоҷикистон вобаста аст.
Доираи ярмарка инчунин муаррифии ширкатҳои Тоҷикистон, вохӯриҳои шахсӣ ва гуфтушунидҳо, мастер-синфҳо, муаррифии намояндагони ширкатҳо аз кишварҳои хориҷӣ, рузи дархои кушод ва форуми доираҳои соҳибкориро фаро хоҳад гирифт. Ярмаркаи байналмилалии савдо «Суғд-2017» имрӯз ҳам дар Қасри варзиш идома хоҳад кард.
Манбаъ: www.sugd.tj
Нет комментариев