Ғолиби озмун сомонаи интернетии «HICA» (Hi Central Asia)

0
542 просмотров

Озмуни «Рушди инноватсионии имкониятҳои сайёҳӣ ва ҳунарҳои мардумӣ» ҷамъбаст гардид. 

Озмун ё хакатон тӯли як моҳ аз ҷониби Кумитаи рушди сайёҳии назди Ҳукумати Ҷумҳурии Тоҷикистон дар ҳамкорӣ бо Барномаи Рушди Созмони Миллали Муттаҳид баргузор карда шуд.

Ғолиби озмун сомонаи интернетии «HICA» (Hi Central Asia), ки муаллифони он Икромхон Валиев, Манучеҳр Азизов ва Олимҷон Алимурзаев мебошанд, эълон гардид. Ҷойи дуюм ба лоиҳаи «Tajtourism», муаллифаш Алишер Сиддиқов ва мақоми сеюм ба лоиҳаи «KujoGo», муаллифонаш Амонулло Файзуллоев ва Анастасия Пенкова сазовор дониста шуданд.

Бояд гуфт, ки хакатон (англ. hackathon) як навъ озмуни кутоҳмуддатест, ки барои барномасозон, дизайнерҳо ва дигар мутахассисони соҳаи технологияҳои иттилоотию коммуникатсионӣ  гузаронида мешавад. Дар озмуни мазкур , ки аз се марҳила иборат буд, 32 даста бо лоиҳаи худ иштирок карданд. Аз байни онҳо 8 лоиҳа ба қисмати  ниҳоӣ роҳ ёфтанд. Маросими ҷамъбастии озмун дар шаҳри Душанбе бо баргузории рӯнамоии лоиҳаҳои ба қисми ниҳоӣ роҳёфта баргузор гардид.

Дар маросими ҷамъбастӣ раиси Кумитаи рушди сайёҳии назди Ҳукумати Ҷумҳурии Тоҷикистон Нӯъмон Абдуғаффорзода зикр кард, ки ташкил ва гузаронидани чунин озмунҳо барои муаррифии имкониятҳои Тоҷикистон ва рушди соҳаи сайёҳиву ҳунарҳои мардумӣ заминаи мусоид фароҳам меорад.

«Имсол аз ҷониби Пешвои миллат Соли рушди сайёҳӣ ва ҳунарҳои мардумӣ эълон шудааст. Дар робита ба ин дар Тоҷикистон Стратегияи рушди сайёҳӣ барои 12 сол таҳия шудааст. Мо аз 150 давлати ҷаҳон ҳудуди 450 ҳазор сайёҳ қабул мекунем. Тақрибан 30 ширкати нави сайёҳӣ ташкил гардид. Аммо ин рақамҳо ҳоло ҳам моро қонеъ намекунад ва бояд шумораи сайёҳон афзун карда шавад», — таъкид кард Нӯъмон Абдуғаффорзода.

Сардори шуъбаи Барномаи Рушди СММ дар Тоҷикистон Мубин Рустамов иқдоми Тоҷикистонро дар самти рушди сайёҳӣ ва ҳунарҳои мардумӣ баланд арзёбӣ карда, таъкид дошт, ки эълони Соли рушди сайёҳӣ ва ҳунарҳои мардумӣ, ташкили мақомоти махсус оид ба сайёҳӣ, баргузории чунин озмунҳо ва ташкили портали интернетӣ гувоҳи мавриди таваҷҷуҳи хоса қарор доштани ин соҳа аст.

«Тоҷикистон имкониятҳои зиёди истифоданашуда дорад. Самтҳои гуногуне ҳастанд, ки метавон ба он таваҷҷуҳ кард ва рушд дод. Барномаи Рушди СММ омода аст, ки дар ин самт ба Тоҷикистон кумак кунад»,-гуфт номбурда.

Иштирокдорон изҳори умед карданд, ки дар ояндаи наздик ин лоиҳаҳо дар якҷоягӣ бо барномарезони касбӣ ва намояндагони шир катҳои сайёҳӣ такмил дода мешавад ва дар амал тадбиқ мегардад.

Манбаъ: Сомонаи расмии АМИТ «Ховар»

Нет комментариев

Также рекомендуем

Барқияи табрикии Пешвои миллат Эмомалӣ Раҳмон ба Дабири кулли Созмони Милали Муттаҳид Антониу Мануэл ди Оливейра Гутерреш

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Дабири кулли Созмони Милали Муттаҳид Антониу Мануэл ди Оливейра Гутерреш барқияи табрикӣ ирсол ...