Ғолибият ба дастаи “Хуҷанд” 100 ҳазор сомонӣ меорад

0
286 просмотров

Нимаи дуюми рӯзи душанбеи 19 феврал иҷрокунандаи вазифаи Раиси вилоят,  Раиси Федератсияи футболи вилояти Суғд Раҷаббой Аҳмадзода дар варзишгоҳи «20-солагии Истиқлолияти Тоҷикистон» бо ҳайати дастаи футболи  “Хуҷанд” мулоқот намуд. Иҷрокунандаи вазифаи Раиси вилоят, Раиси Федератсияи футболи вилоят Раҷаббой Аҳмадзода дар суҳбат бо бозингарони дастаи “Хуҷанд” қайд намуд, ки бо дастгириҳои Пешвои миллат муҳтарам Эмомалӣ Раҳмон ва раиси Федератсияи футболи Тоҷикистон Рустами Эмомалӣ соҳаи варзиш, махсусан футбол дар кишар рушд намуда, барои оммавияти он тадбирҳои зарурӣ амалӣ шуда истодааст. Тавре ки қайд гардид, соли 2017 барои футболбозони вилоят соли пурбарор буд. Соли гузашта дастаи “Хуҷанд” маротибаи чаҳорум соҳиби Ҷоми Тоҷикистон шуд ва мақоми дуюмро дар чемпионати мамлакат аз худ намуда, ҷиҳати иштирок дар мусобиқаи байналмилалӣ барои дарёфти Ҷоми Конфедератсияи футболи Осиё роҳхат гирифта, дар бозиҳои гурӯҳӣ иштирок дорад. Дар доираи бозиҳои марҳилаи плей-оффи Ҷоми КФО — 2018 бозии ҷавобии дастаи «Хуҷанд» бо дастаи футболи «Аҳал»-и Туркманистон 20 феврал дар варзишгоҳи «20-солагии Истиқлолияти Тоҷикистон»-и шаҳри Хуҷанд баргузор мегардад. Дар робита ба ин, иҷрокунандаи вазифаи Раиси вилоят Раҷаббой Аҳмадзода изҳори боварӣ намуд, ки футболбозони дастаи “Хуҷанд” дар бозӣ бо дастаи «Аҳал» маҳорати худро нишон дода, мухлсионашонро шод мегардонанд. Қайд карда шуд, ки дар сурати ғолибият ба даст овардан дастаи “Хуҷанд” аз ҷониби роҳбарияти Мақомоти иҷроияи ҳокимияти давлатии вилоят бо 100 ҳазор сомонӣ мукофотпулӣ қадршиносӣ мешавад. Дар суҳбат бо роҳбари вилоят ҳайати дастаи “Хуҷанд” аз шароити мавҷуда изҳори қаноатмандӣ намуда, ҳамчун нишони эҳтиром ба иҷрокунандаи вазифаи Раиси вилоят либоси варзишӣ ва тӯб туҳфа намуданд. Баъди мулоқот бо бозингарони дастаи “Хуҷанд” Раҷаббой Аҳмадзода аз шароити мавҷудаи варзишгоҳи «20-солагии Истиқлолияти Тоҷикистон» ва омодагиҳо ба бозии миёни дастаҳои “Хуҷанд” ва “Аҳал” шинос шуд. Ёдовар мешавем, ки бар асари офати табии охири соли 2017 рухдода баъзе аз қисматҳои варзишгоҳ зарар дида буд. Бо дастгирии роҳбарияти вилоят оқибатҳои офати табиӣ бартараф ва дар майдон монитори нав насб гардид. Дар асоси дастури иҷрокунандаи вазифаи Раиси вилоят дар ҳудуди варзишгоҳ корҳои ободонӣ ба роҳ монда шуда, панҷараҳои атроф рангубор ва ниҳолҳои ороишиву ҳамешасабз шинонида шуд.

 

Манбаъ: сомонаи расмии МИҲД-и вилояти Суғд

Нет комментариев

Также рекомендуем