Ғолибони Олимпиадаи ҷумҳуриявӣ барои хонандагони синфҳои 5-8-ум аз шаҳри Душанбе сарбаландона баргаштанд. Дар Олимпиадаи мазкур 14 нафар хонандагони шаҳри Хуҷанд иштирок намуда, 10 нафари онҳо мақомҳои гуногунро ба даст оварданд.
Ҳамин тавр, Азамат Шерматов, хонандаи литсейи донишкадаи политехникӣ, Амон Файзиев, муҳассили мактаби хусусии Рустамов, Машҳура Юлдошева, толибаи литсейи ба номи академик Муҳаммад Осимӣ мақоми аввал, Манучеҳр Турсунов ва Иқболи Илҳом хонандагони муассисаи хусусии «Гулчини маърифат» ва Абдурасул Урунбоев, муҳассили литсейи ДДҲБСТ ҷойи дуюм, Абдураҳмон Собиров, Неъматулло Сайфуллоев ва Фарид Файзиев, муҳассилини литсейи №1 ба номи академик М. Осимӣ, Олимҷон Исроилов, талабаи литсейи донишкаи политехникӣ зинаи сеюмро ба даст оварданд.
Ғолибони Олимпиадаро, ки аз вилояти Суғд сафарбар гардида буданд, дар назди Мақомоти иҷроияи ҳокимияти давлатии вилояти Суғд сардори идораи маорифи вилоят Осим Каримзода, муовини Раиси шаҳри Хуҷанд Фирӯза Нуруллозода, муҳассилини макотиби шаҳр, омӯзгорон ва волидайн самимона пешвоз гирифтанд.
Иттилоъ дода шуд, ки дар Олимпиадаи мазкур вилояти Суғд дар сатҳи ҷумҳурӣ мақоми аввалро касб намудааст. Шаҳри Хуҷанд байни дигар шаҳру навоҳии вилоят бо шумори кулли медали Олимпиадаҳои ҷумҳуриявӣ ҷойи якумро ба даст овард.
Манбаъ: Дафтари матбуоти Раиси шаҳри Хуҷанд
Нет комментариев