Ғолибони нахустин ҳакатон маълум шуданд

0
78 просмотров

Дар шаҳри Душанбе нахустин ҳакатон ё марафони барноманависӣ баргузор шуд, ки дар раванди он 15 барноманависи ҷавону фаъол даргоҳи интернетӣ барои дастрасӣ ба хадамоти давлатӣ, беҳбудсозии хадамоти мусофирбарӣ ва ҳамкории шаҳрвандон бо ниҳодҳои шаҳрдориву кишвардориро падид оварданд. Ин ҳакатон 10 рӯз идома дошт ва саранҷом рӯзи якшанбе, 29 октябр аз дастовардҳояш натиҷагирӣ кард. Фаъолтарин ширкаткунандаҳо дар ин ҳакатон бо ҷоизаҳои нақдӣ тақдир шуданд. Маблағи кулли ҷоизаҳои ин марафон 20 ҳазор сомонӣ  буд. “Ҳадаф аз баргузории ҳакатонҳо дар саросари ҷаҳон падид овардани барномаест, ки барои ҷомеъа судманд бошад. Мо низ чунин ҳадаферо барои худ қарор додем ва дар як ҳафта платформеро падид овардем, ки пойтахтнишинонро ёрӣ медиҳад на танҳо мушкилоти ҳаррӯзаашонро ҳалл кунанд, балки дар зиндагии шаҳр низ фаъолона ширкат кунанд”, — гуфт Масрур Ишонов, мудири рушди фанновариҳои иттилоъотии Бошгоҳи корофаринони ҷавон дар суҳбат бо Sputnik Тоҷикистон.

Вай гуфт, ки дар раванди ин ҳакатон вебгоҳҳо ва барномаҳову нармафзорҳои корбурдӣ дар се бахш офарида шуданд, ки дастрасӣ ба хадамоти давлатиро осон карда, хадамоти мусофирбариро дар шаҳр беҳбуд мебахшанд ва шаҳрвандонро дар ҳамкорӣ бо ниҳодҳои шаҳрдорӣ фаъолтар мекунанд. “Мо аз панҷоҳу чанд кас дархости ширкат дар ин ҳакатонро дарёфт кардем ва аз онҳо танҳо 15 касро интихоб кардем, ки дар риштаҳояшон беҳтарин буданд. Дар он миён барноманависҳо, тарроҳон, варзишкорон, донишомӯзону омӯзгорону устодон ва кунишгарон дар ҳар заминае буданд. Ҳадафамон ин буд, ки ҷавононро барои падид овардани барномаҳои судманд барои ҷомеа ва кишвар гирд оварем”, — таъкид кард Масрур. Дар миёни он беҳтаринон донишҷӯи Донишгоҳи русӣ — тоҷикӣ Виктория Петрова низ буд, ки дар падид овардани роҳнамои хадамоти давлатӣ саҳми арзанда гузоштааст. “Барои фароҳам овардани ин роҳнамо бояд додаҳову иттилоъотро аз бахшҳои шиноснома дар ВКД ҶТ, Бозрасии давлатии автомобилӣ, Идораҳои сабти аҳволи шаҳрвандон, бонкҳо ва дигар созмонҳову ниҳодҳои давлатӣ дарёфт ва радабандӣ мекардем. Акнун ҳар корбаре метавонад аз ин роҳнамо иттилоъоти дақиқ дар бораи хадамоти давлатӣ ва нарху таърифашон ба даст орад, ё дар созмону ниҳоде худро номнавис кунад, ва ё барои дарёфти гувоҳиву иттилоъе сарбаргҳоро электронӣ пур кунад.

Ҳамчунин метавонад феҳристи асноди даркорӣ барои дарёфти шиносномаи нав, ё ном ба ном кардани манзил ва ё дигар иттилоъотро дарёфт кунад”, — гуфт Виктория. Ин роҳнамо ба ду забон — тоҷикӣ ва русӣ иттилоърасонӣ хоҳад кард. Созандагони он ҷоизаи нақдии 8800 сомонӣ дарёфт карданд. Ҷоизаи дувумро созандагони тарҳи M’City дарёфт карданд, ки қарор аст шаҳрвандонро ба ҳамкории бештар бо ниҳодҳои шаҳрдорӣ ва кишвардорӣ фаро хонад. Дар даргоҳи ин тарҳ ҳар шаҳрванде метавонад пешниҳоду итбикороти худро бо дигарон ҳамрасонӣ кунад. Созандагони ин тарҳ 6160 сомонӣ дарёфт карданд.

Ҷоизаи севумро падидоварандагони платформи беҳбуди роҳнамоиву ронандагӣ дар шаҳр ба даст оварданд, ки баробар бо 4400 сомонӣ аст.

Ин ҳакатон дар чорчӯби Соли ҷавонон бо ибтикори Бошгоҳи корофаринони ҷавон ва Бунгоҳи “Ҷомеаи боз” дар Тоҷикистон баргузор шуд.

 

Манбаъ сомонаи  Sputnik-Тоҷикистон

 

 

Нет комментариев

Также рекомендуем

Международному дню защиты детей посвящается…

Неккадам Файзулобеков — юное таджикское  дарование — собрал сотни «лайков» за красивую кавер-версию (авторская музыкальная композиция, часто известная в исполнении другого музыканта) знаменитой песни Майкла ...