Ғолибони озмунҳои «Ҳуҷраи беҳтарин» ва «Ошёнаи беҳтарин» муайян шуданд

0
81 просмотров

Дар доираи эълон шудани соли 2017 – Соли ҷавонон дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ чорабиниҳои мухталифи фарҳангиву варзишӣ доир гардида истодаанд.
Наздики як моҳ  байни бошандагони хобгоҳи донишкада озмунҳои «Ҳуҷраи беҳтарин» ва «Ошёнаи беҳтарин» ҷараён гирифта, дар онҳо тамоми донишҷӯёни дар хобгоҳ иқоматдошта фаъолона ширкат варзиданд.

Голибони озмунхо

Озмунҳои мазкур ҷамъбаст ва ғолибон муайян шуданд.
Директори донишкада Саидӣ Дилафрӯз Раббизода зарурияти баргузории чунин озмунҳоро дар соли барои ҷавонон муҳим қайд намуда, таъкид дошт, ки дӯст доштани Ватан аз хонаву дари худ оғоз меёбад. Бояд ҳар як насли худогоҳу хештаншинос барои ободии макони зист, ҷое, ки он ҷо таълим мегираду ба камол мерасад, кӯшиш намояд. Сарвари донишкада иқдоми пешгирифтаро қадаме ба пеш ба сӯи омодасозии ҷавонон ба ҳаёти мустақилона номид. Сипас дар вазъияти тантанавӣ ба ғолибон ифтихорнома ва тӯҳфаҳои таъсиснамудаи роҳбарияти донишкада тақдим карда шуданд.
Ҳамин тавр аз ошёнаи якум ҳураи рақами 106, ки бошандагонашон Дилдора Сабурова ва Мавзуна Қодирова мебошанд, ғолиб дониста шуданд. Аз ошёнаи 3 ҳуҷраи 331, ки Ханов Горягин шаҳрванди Ҷумҳурии Туркманистон ва Ҷалолзай Ризо, шаҳрванди Ҷумҳурии исломии Афғонистон мебошанд, ғолибият ба даст оварданд. Дар ошёнаи 4-ум ҳуҷраи донишҷӯён Комилҷон Каримов, Азиз Шодиев ва Ноибшоҳ Холов беҳтарин ҳуҷра эътироф гардид.
Дар маҷмӯъ ҳайати ҳакамон ҷойи аввалро ба бошандагони ошёнаи 4, ҷойи дуюмро ба сокинони ошёнаи 3 ва ҷойи сеюмро ба донишҷӯёни дар ошёнаи 1 иқоматдошта доданд.
Ба ғолибон тӯҳфаҳо аз қабили тафтдони барқӣ, асбоби обҷӯшон тақдим карда шуданд.
Ҳамзамон дар ин чорабинӣ озмуни «Беҳтарин фаррош ва рӯбанда» ҷамъбаст гардид. Дар натиҷа фаррош  Бароат Раҳмонова ҷойи аввалро ишғол намуд. Зинаҳои баъдиро Маҳбуба Ҳакимова ва Ибодат Собирова ба даст оварданд.

Дар озмуни «Рӯбандаи беҳтарин» бошад, ғолибият насиби Саломат Рустамова гардид.
Ба ҳамаи ғолибони ин озмун аз ҷониби раёсати донишкада тӯҳфаҳои молиявӣ супорида шуданд.

Манбаъ: http://www.khujand.tj/

Нет комментариев

Также рекомендуем