Ҷовидон бод ҷавонӣ ва ҷавонон!

0
1 239 просмотров

Умри инсон чанд марҳиларо дар бар мегирад ва дар миёни ин марҳилаҳо зеботарину дилпазиртаринаш фасли ҷавонист, зеро дар ин фасл ҳар шахс асосан солиму нерӯманд, барнодилу болидарӯҳ аст.

Чавонони Точикистон-2

Ҷавониро чун рамзи тавоноӣ, қудрат, шукуфоӣ ва саодатмандӣ пазируфтаанд. Масалан, вақте бахти ҷавон мегӯянд, мурод аз он ҳадди ниҳоии хушбахтист.

Ҳофизи Шерозӣ гуфтааст:
Даромад ба айвони шоҳаншаҳӣ,
Ки бахтат ҷавон боду давлат раҳӣ!
Шахси ҷавонро ҷавонмард мегӯянд ва дар ситоиши ин гуна шахс ашъору ҳикоёти зиёде гуфта шудааст.
Ҷавонмардо, ҷавонмардӣ биёмӯз,
Зи мардони ҷаҳон мардӣ биёмӯз.
Ин гуфти Абдураҳмони Ҷомист. Саъдии Шерозӣ ҳам наздик ба ин маънӣ байте дорад:
Ҷавонмарду хушхулқу бахшанда бош,
Чу Ҳақ бар ту пошад, ту бар халқ пош!

чавонони Сугд-1

Ҷавониро навбаҳори зиндагонӣ меноманд. Ҷавонон бо чусту чолокӣ, паҳлавонӣ ва серҳаракатӣ тавъаманд.

Фирдавсӣ чунин гуфтааст:
Кушодазабону ҷавонит ҳаст,
Сухан гуфтани паҳлавонит ҳаст.
Ашхоси зиёде афсӯс хӯрдаанд, ки ҷавониашон барҳадар ва ё камсамар гузашта. Аз ин рӯ, панд медиҳанд, ки ҷавониро бояд ғанимат донист ва чун неруи комилу сиҳатмандӣ ҳаст, пайваста бояд кор карду илм омӯхт, иродатманду хушодобу некандеш бояд буд. Гёте, шоир ва мутафаккири бузурги немис, нидо кардааст: «Оҳ, ҷавонҳо, ҷавонҳо! Афсӯс, ки шумо қимат ва баҳои вақтро намедонед». Мутафаккири дигари сатҳи ҷаҳонӣ Ҷон Локк ба таври насиҳат чунин иброз доштааст: «Даврони ҷавонӣ фурсат барои ба даст овардани хирад ва даврони минбаъда фурсат барои кор бастани он аст». Ҳамин тавр, аксари хирадмандон ҷавононро насиҳат кардаанд, ки ба қадри беҳтарин айёми умр-ҷавонӣ бирасанд ва онро бештар ба таҳсилу омӯзиш ва андӯхтани таҷрибаи пешиниён сарф намоянд, аз ғуруру фориғболӣ барҳазар бошанд, пиронро эҳтиром кунанд, ба қувваи бозуи худ ғарра машаванд, дасти афтодагон бигиранд ва дар хотир дошта бошанд, ки бо мурури замон онҳо низ ба пирӣ хоҳанд расиду қувваю неруи имрӯзаашон коҳиш хоҳад ёфт ва дар навбати худ ниёзманд ба дастгирии ҷавонон хоҳанд шуд.
Дар ҷавонӣ дор пиронро азиз,
То азизи дигарон гардӣ ту низ.

Чавонони Точикистон-3

                                Ҷавонон ояндаи миллату давлатанд

Вобаста ба ин, дар ҳар давлати пешрафта ба нақши ҷавонон ва ба неруи созандаи онҳо эътибори махсус дода мешавад. Тоҷикистони азизи мо низ аз ин қатор истисно нест. Дар кишварамон аз ҷониби Президенти мамлакат ва Ҳукумати ҷумҳурӣ нисбат ба ҷавонон ва таҳсилу фароғату фаъолияти онҳо ғамхории ҳамешагӣ зоҳир карда мешавад.
Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон дар Паёми имсола ба Маҷлиси Олии Ҷумҳурии Тоҷикистон соли 2017-ро Соли ҷавонон эълон намуданд. Аз ҷумла, дар Паём чунин омадааст:
«Татбиқи босамари сиёсати давлатии ҷавонон аз рӯзҳои нахустини соҳибистиқлолӣ дар меҳвари фаъолияти Ҳукумати Тоҷикистон қарор дорад. Аксарияти аҳолии Ҷумҳурии Тоҷикистонро ҷавонон ташкил медиҳанд, ки онҳо давомдиҳандаи фаъолияти насли калонсол, нерӯи созанда ва иқтидори воқеии пешрафти ҷомеа, хулоса, ояндаи миллат ва давлат мебошанд.

Фестиваи Гулдухтарони сугдй-2

Имрӯзҳо дар тамоми соҳаҳои иқтисоди миллии мамлакат, инчунин дар сафҳои Қувваҳои Мусаллаҳ ҷавонони бонангу номус содиқона хизмат ва фаъолият доранд ва дар рушди иқтисоди миллӣ ҳиссаи назаррас мегузоранд. Дар баробари ин, ҷавонони мо дар дохил ва хориҷи мамлакат дар бахшҳои мухталиф таҳсил карда, соҳиби касбу ихтисосҳое шуда истодаанд, ки барои кишварамон зарур мебошанд.
Наврасону ҷавонони моро зарур аст, ки ҷавобан ба ин ғамхориҳо тамоми саъю талоши хешро ба донишандӯзӣ, интихоби касбу ҳунарҳои муосир, ободиву пешрафти сарзамини аҷдодӣ, ҳимояи Ватан, рушди илму техника ва бунёдкорӣ равона созанд».
Ба таъкиди Сарвари давлат, ҷавонон бояд аз ҳама қишрҳои ҷомеа бештар фаъол бошанд, ташаббусҳои созанда пешниҳод намоянд, рамзҳои давлатӣ, муқаддасоти миллӣ ва дастовардҳои истиқлолиятро ҳифз кунанд, дар ҳаёти сиёсиву иҷтимоии Тоҷикистони азиз бо дасту дили гарм ва нерӯи бунёдгарона ширкат варзанд, амнияти давлат ва шарафу номуси ватандориро ҳимоя карда, худро аз ҳама хавфу хатарҳои номатлуби ҷаҳони муосир эмин нигоҳ доранд ва парчамбардори ин сарзамин, марзу бум ва кишвари муқаддасамон бошанд. Бо назардошти саҳми ҷавонон дар рушди ҷомеа ва иштироки фаъолонаи онҳо дар ҳаёти сиёсиву иқтисодии мамлакат Пешвои миллат пешниҳод намуданд, ки соли 2017 дар Ҷумҳурии Тоҷикистон Соли ҷавонон эълон карда шавад.
Ҷавонони мо дар ҳар ҷое, ки бошанд, бояд ҳисси баланди миллӣ дошта бошанд, бо Ватан, миллат, давлати соҳибистиқлоли худ ва забону фарҳанги миллии хеш ифтихор намоянд, барои ҳимояи онҳо ҳамеша омода ва ҳушёру зирак бошанд. Ҷавонони имрӯзаи мо, яъне насли замони истиқлол аз наслҳои пешина бо савияи илму дониш, маърифату ҷаҳонбинӣ, сатҳи тафаккур ва одобу ахлоқ фарқи куллӣ доранд, ки ин ҳама боиси ифтихори мо мебошад.

Дар олами зебой

Ҷавонон дар ҳар давру замон қувваи бузургу сарвати гаронарзиш ба шумор мераванд. Бинобар ин, бо истифода аз зиракии сиёсӣ, донишҳои иқтисодӣ ва доштани шуури кофии динию мазҳабӣ ҷавонони кишвари мо ҳамеша нерӯи пешбаранда, ворисони асилу арзандаи миллату давлат ва созандагони имрӯзу фардои Тоҷикистони азизи хеш буда метавонанд Дар Қонуни Ҷумҳурии Тоҷикистон “Дар бораи ҷавонон ва сиёсати давлатии ҷавонон” омадааст, ки гурӯҳи иҷтимоӣ, демографие ҷавон ҳисобида мешаванд, ки шахсони синни аз 14 то 30-сола бошанд. Ин аз нигоҳи шахсоне аст, ки муваззафанд, то қонуне эҷод кунанд ва дар доираи қонун аҳдофи як ҳукумати сирф миллиро пиёда намоянд.
Аммо метавон ҷавониро аз нигоҳи маънавию иҷтимоӣ низ шарҳ дод. Аз ин нигоҳ шахсеро месазад ҷавон ҳисобид ва бар ӯ умед баст, ки нигоҳи тозаву иштиёқи беандозае ба як зиндагии ошиқонаю оқилона дорад. Пайваста гом мебардорад ба сӯи муваффақият ва ормонҳои нав ба нав ва шикастан дар роҳи муваффақиятро бурдборӣ меҳисобад. Зиндагии худро ба мазрааи набардҳои муваффақона мубаддал мекунад ва таслим нагаштан дар зиндагиро шиори аслии хеш қарор медиҳад.
Зимнан, ҷавони муваффақ нафарест, ки роҳу равиши хешро дар зиндагӣ дорад, мақсаду ҳадафи муайянеро пайгирӣ мекунад ва дар шароити ҷомеаи муосир яке аз роҳҳои асосии тарбияи ҷавонон ва ба пояи мақсад расидану эмин нигоҳ доштани онҳо аз таъсири ҳар гуна омилҳои номатлуб ба касби муайяне ҷалб гардидани онҳо мебошад.
Ҷавонон бояд бо истифода аз ҳама гуна шароити муосир пайгири касби муайяне гарданд ва итминон дошта бошанд, ки танҳо дар ҳамин сурат метавонанд ба қуллаҳои баланди муваффақият бирасанд.

Фестиваи Гулдухтарони сугдй

Дар доираи Соли ҷавонон ва ба истиқболи Рӯзи ҷавонони Тоҷикистон давоми чанд ҳафтаи охир чорабиниву ҷамъомадҳо, вохӯриву мулоқот ва мусобиқаву сабқатҳо гузаронида шуданд. Бахусус, дар тамоми шаҳру навоҳии вилояти Суғд Фестивал-озмуни «Гулдухтарони суғдӣ», веломарафон, Рӯзи Дави миллӣ ва ғайра.
Иштироки наздик 427 ҳазор нафар дар рӯзи “Дави миллӣ” бахшида ба Соли ҷавонон ва Рӯзи ҷавонони Тоҷикистон

чавонони Сугд-2

Субҳи рӯзи якшанбе, 21-уми май дар тамоми шаҳру ноҳияҳои кишвар рӯзи Дави миллӣ доир карда шуд.
Дар он наздик ба 427 ҳазор нафар сокинони касбу кори гуногуни кишвар, аз ҷумла беш аз 132 ҳазор нафар бонувон иштирок намуданд.
Бояд қайд намуд, ки дар асоси Фармони Президенти Ҷумҳурии Тоҷикистон мӯҳтарам Эмомалӣ Раҳмон аз 28 марти соли 2007 «Дар бораи Рўзи Дави миллӣ» ҳамасола якшанбеи сеюми моҳи май дар саросари кишвар бо мақсади таҳкими тарзи ҳаёти солим, рушду инкишофи соҳаи варзиш ва оммавияти он доир мегардад.
Имсол 10-умин сол аст, ки рӯзи Дави миллӣ дар кишвари азизамон дар як фазои мутантан бо иштироки васеи ҷомеа баргузор мегардад, ки ин иқдом заминаи мусоидеро баҳри нигоҳдоштани тарзи ҳаёти солимии аҳолӣ фароҳам овард.
Иштироки беш аз 84 ҳазор нафар сокинони вилояти Суғд дар чорабинии варзишии Рӯзи Дави миллӣ

чавонони Сугд-3

Санаи 21-уми май дар маркази вилоят чорабинии варзишии Дави миллӣ баргузор гардид, ки дар он Раиси вилояти Суғд Абдураҳмон Қодирӣ ва беш аз 15 ҳазор нафар сокинони касбу кори гуногун иштирок намуданд.
Ин чорабинии варзишӣ имсол аз назди Маҷмааи ҳавзҳои шиноварии “20 солагии Истиқлолияти Тоҷикистон” оғоз ёфта, ба воситаи кӯчаи Сирдарё то назди Парчами давлатии Ҷумҳурии Тоҷикистон, воқеъ дар хиёбони ба номи Раҳмон Набиев идома ёфт. Дар оғози чорабинӣ сардори Раёсати ҷавонон, варзиш ва сайёҳии вилояти Суғд Олимҷон Зоҳидзода суханронӣ намуда, изҳор дошт, ки Рӯзи Дави миллӣ бо ташаббуси Президенти Ҷумҳурии Тоҷикистон мӯҳтарам Эмомалӣ Раҳмон бо мақсади таҳкими тарзи ҳаёти солим, рушду инкишофи соҳаи варзиш ва оммавияти он байни аҳолӣ аз соли 2007 инҷониб баргузор мешавад.
Дар поёни чорабинии варзишӣ намояндагони фаъоли 15 муассисаву ташкилот бо тӯҳфаҳои хотиравӣ қадршиносӣ гардиданд.
                                 Веломарафони ҷумҳуриявӣ

Веламарафони Сугд

Субҳи рӯзи шанбе, 20-уми май бо ташаббуси Кумитаи ҷавонон, варзиш ва сайёҳӣ ва Кумитаи миллии олимпии Ҷумҳурии Тоҷикистон дар шаҳру навоҳӣ Веломарафони ҷумҳуриявӣ доир гардид.
Танҳо дар шаҳри Хуҷанд бештар дар веломарафон бештар аз 500 нафар дӯстдорони ин намуди варзиш, ки синну соли мухталиф доштанд, иштирок намуданд.
Дар оғози чорабинӣ, ки дар майдони маҷмааи фаввораҳои муҷассамаи Исмоили Сомонӣ баргузор гашт, сардори Раёсати ҷавонон, варзиш ва сайёҳии вилояти Суғд Олимҷон Зоҳидзода, мудири бахши ҷавонон варзиш ва сайёҳии шаҳр Бахтиёр Исматҷонов ва мудири шӯъбаи маорифи шаҳр Илҳом Султонӣ тамоми ширкаткунандагони ин ҳамоиши варзиширо бо Рӯзи ҷавонон табрик намуданд. Дучархаронҳо дар мавзеи интиҳои сайрхат — дар пояи муҷассамаи Абӯабдуллоҳ Рӯдакӣ сарҷамъ гардиданд ва барои онҳо барномаи фарҳангӣ — фароғатӣ намоиш дода шуд.

Чавонони Точикистон-1

Ҷавонӣ даврони кашф, сохтани истеъдодҳо ва шахсиятҳост. Ногузир аст, ки нафаре дар айёми пирӣ ба коре даст задаву муваффақият насибаш гардида бошад. Фақат дар овони ҷавонӣ инсон метавонад, ки роҳи ояндаашро интихоб кардаву ба сӯи фардои дурахшон қадам гузорад. Ҷавонӣ даврони аз ғунча берун гардидан ва шукуфтани инсон аст.
Ту ҷавонӣ, ҷавоният зебост,
Айни сабзидану шукуфтанҳост.
Ту ҷавонӣ, ҷаҳони ту роҳ аст,
Арсагоҳат зи моҳӣ то моҳ аст.

Рӯзи ҷавонони Тоҷикистон муборак!

Нет комментариев

Также рекомендуем