ОЗМУН: МЕҲМОНХОНА ВА ОСОИШГОҲИ БЕҲТАРИНИ ТОҶИКИСТОН МУАЙЯН ШУДАНД

0
545 просмотров

Дар шаҳри Душанбе озмунҳо бахшида ба натиҷаҳои соли 2018 – Соли рушди  сайёҳӣ ва ҳунарҳои мардумӣ, аз ҷумла озмуни «Ҳунарҳои ороишӣ аз санг» ҷамъбаст гардиданд. Ин озмун бо мақсади иҷрои Амри Президенти Ҷумҳурии Тоҷикистон аз 13 декабри соли 2018 оид ба ҷадвали  баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019 – 2021 аз ҷониби Кумитаи рушди сайёҳии назди Ҳукумати Ҷумҳурии Тоҷикистон созмон дода шуд.

Дар маросими ҷамъбаст ва қадрдонии ғолибони озмунҳо, ки субҳи имрӯз дар меҳмонхонаи «Hayat Regency Dushanbe» доир гардид, намояндаи Дастгоҳииҷроияи Президенти Ҷумҳурии Тоҷикистон, масъулони вазорату идораҳои ҷумҳурӣ, муассисаҳои олии таълимӣ, ки дар бахши сайёҳӣ мутахассис омода месозанд, осоишгоҳҳо, меҳмонхонаҳо, ширкатҳои сайёҳӣ ва доираҳои сайёҳӣ ширкат доштанд, иттилоъ  дод хабарнигори АМИТ «Ховар» Марзияи САИД, ки дар маросим ширкат намуд.

Дар маросим мушовири Бахши Ёрдамчии Президенти Ҷумҳурии  Тоҷикистон оид ба масъалаҳои рушди иҷтимоӣ ва робита бо ҷомеа Муҳиддин Пайшанбезода ва раиси Кумитаи рушди сайёҳии назди Ҳукумати Ҷумҳурии Тоҷикистон Нуъмон Абдуғаффорзода доир ба дастовардҳо ва имкониятҳои рушди сайёҳӣ  дар кишвар сухан гуфтанд.

Зикр гардид, ки  аз ҷониби Ҳукумати Ҷумҳурии Тоҷикистон, хосса Пешвои миллат муҳтарам Эмомалӣ Раҳмон  барои бунёди инфрасохтори сайёҳӣ, рушду истеҳсоли маҳсулоти ҳунармандӣ ва ҷалби сайёҳони хориҷӣ тамоми шароит фароҳам оварда шудаанд.

Давоми соли 2018 бо пешниҳоди Пешвои миллат «Стратегияи рушди сайёҳӣ барои давраи то соли 2030» таҳия ва қабул гардида, ҳадафҳои рушди соҳаро барои 12 соли минбаъда  муайян намуд ва дар ин ҷода имкониятҳои сайёҳии Тоҷикистон то ҳадди имкон дар арсаи байналмилалӣ муаррифӣ шуданд.

Зимни ҷамъбасти озмуни «Ҳунарҳои ороишӣ аз санг» Шоҳҷоиза насиби рассоми санъати ороишии амалӣ Ҷамшед Ҷӯраев гардида, ҷойи якумро ҶДММ «Асрори санг», ду ҷойи дуюмро ҶДММ «Рухом» ва ҶДММ «Карон» дар  ноҳияи Дарвоз, ду ҷойи сеюмро ҳунарманд аз ноҳияи Шоҳмансури шаҳри Душанбе  Умед Ҳамидов ва ҳунарманд аз ноҳияи Кушониён Ҳакималӣ Камолов ишғол намуданд.

Инчунин дар озмунҳо аз рӯи номинатсияҳои беҳтарин ширкати сайёҳии сол дар самти воридотӣ, беҳтарин ширкати сайёҳии сол дар самти дохилӣ, беҳтарин ширкати сайёҳии сол аз рӯи омӯзиши таҷрибаи байналмилалӣ, роҳбалади беҳтарини сол, осоишгоҳи беҳтарин, беҳтарин меҳмонхона, беҳтарин ҳунарманд оид ба истеҳсоли савғотии беҳтарин барои сайёҳон, таҳияи беҳтарин маҷмӯаи «Ҳафт ганҷинаи Тоҷикистон» ҷамъбаст гардиданд.

 

Аз рӯи номинатсияи “Беҳтарин ширкати сайёҳии сол дар самти воридотӣ” ҷойи якум насиби ҶДММ «Ориент Адвентур», ҷойи дуюм насиби ҶДММ «Куҳандиз», ҷойи сеюм насиби ҶДММ «Саёҳатҳои кӯҳи Помир» ва ҶДММ «Сайру саёҳати кӯҳӣ»  гардида, ҳамзамон барои саҳмгузорӣ ва ҷалби сайёҳони хориҷӣ ба Тоҷикистон дар соли 2018 бо диплому туҳфаҳои Кумитаи рушди сайёҳӣ қадрдонӣ шуданд.

Дар самти сайёҳии дохилӣ ҷойи якум  ба ҶДММ «Сафеддара»,  ҷойи дуюму сеюм ба «Муассисаи сайру саёҳати иттифоқҳои касабаи Тоҷикистон»  ва ҶДММ «Пойгоҳи  кӯҳнавардию  сайёҳии «Артуч» дода шуда, барои саҳмгузорӣ ҶДММ «Роҳат Тур» соҳиби ҷоиза гардид.  Барои саҳмгузорӣ дар омӯзиши  таҷрибаи байналмилалӣ ва ба роҳ мондани ҳамкории судманд ҶДММ «Глобал Транс», ҶДММ «Расул Сохтмон» ва ҶДММ  «Морхур» барои иштироки фаъолона дар корҳои ободонӣ бахшида ба 30- солагии Истиқлолияти давлатии Ҷумҳурии Тоҷикистон қадрдонӣ шуданд.

Барои саҳми муносиб дар хизматрасонӣ ба сайёҳони хориҷӣ дар Тоҷикистон Шаҳбоз Акрамзода,  Умеда Қурбонбекова, Ситора Набиева ва Ниёлқул  Неъматов  беҳтарин роҳбаладони соли 2018 дониста шуданд.

Дар озмун оид ба таҳияи беҳтарин маҷмӯаи «Ҳафт ганҷинаи Тоҷикистон» созмони ҷамъиятии «Маркази рушди туризм» ғолиб дониста шуд.

Ҳамзамон дар озмун миёни ҳунармандони кишвар оид ба истеҳсоли маҳсулоти сайёҳӣ ва савғотии беҳтарин ба сайёҳон бо мақсади эҳёи ҳунарҳои мардумӣ ҷойи  якум насиби ҳунарманд Фозилҷон  Носиров шуда, ҷойҳои дуюму сеюмро Фароғат Назарова ва Самариддин Холов ишғол намуданд.

Аз рӯи номинатсияҳои “Осоишгоҳи беҳтарин” ва “Беҳтарин меҳмонхона” осоишгоҳҳои «Зумрад», «Хоҷа оби гарм», «Сатурн» ва меҳмонхонаҳои «Тоҷикистон», «Ҳаятт Реҷенсӣ», «Серена», «Сафир», «Ҳиллтон» ва «Роҳат» дар радифи беҳтаринҳо дар самти ба роҳ мондани хизматрасонии муносиб ба меҳмонону сайёҳон ҳисобида шуданд.

Дар фарҷоми ҳамоиш муассисаҳои олии таълимӣ, ки дар риштаи сайёҳӣ мутахассис омода месозанд, ВАО ва дигар шарикон, аз ҷумла АМИТ “Ховар”  барои ҳамкории судманд дар таблиғу ташвиқи захира ва имкониятҳои сайёҳии Тоҷикистон, саҳм гузоштан дар татбиқи сиёсати давлатии соҳаи сайёҳӣ бо Сипосномаи Кумитаи рушди сайёҳии назди Ҳукумати Ҷумҳурии Тоҷикистон  сарфароз гардонида шуданд.

Нет комментариев

Также рекомендуем

Официальный курс валюты на 3.07.2018

Национальный банк Таджикистана (НБТ) 3.07.2018 года с целью бухгалтерского учета и оплаты таможенной пошлины определил официальный курс иностранной валюты по отношению к сомони.  1 доллар ...
%d такие блоггеры, как:

Сообщить об опечатке

Текст, который будет отправлен нашим редакторам: