Зимни сафари корӣ ба шаҳри Панҷакент Раиси вилояти Суғд Раҷаббой Аҳмадзода чанде аз собиқадорони меҳнатро аёдат намуда, онҳоро бахшида ба Рӯзи Модар табрик намуд.
Раҷаббой Аҳмадзода аз ҷумла сокини деҳаи Шашқати Ҷамоати деҳоти Рӯдакӣ, собиқадори хизмати давлатӣ Мавлуда Саъдуллоева, сокини деҳаи Ғусари Ҷамоати деҳоти ба номи Лоиқ Шералӣ, собиқадори соҳаи маориф Муҳаррам Раҳмонова, сокини деҳаи Сӯҷинаи Ҷамоати деҳоти Сӯҷина, собиқадори соҳаи кишоварзӣ Маҳбуба Шодиева, сокини кӯчаи ба номи Лоиқ Шералӣ, собиқадори соҳаи маориф Ёқутой Ҷӯрақулова ва сокинони хиёбони Рӯдакии шаҳр, собиқадорони соҳаи маориф Хосият Ҳасанова ва Людмила Константиноваро аёдат намуд.
Дар рафти аёдат Раиси вилоят собиқадорони меҳнатро аз номи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бахшида ба Рӯзи Модар табрик гуфта, ба онҳо зиндагии орому осуда ва хушбахтиҳои рӯзгорро таманно кард.
Аёдатшудагон, ки солҳои зиёд барои пешрафти ҷомеа хизмат намудаанд, аз ҳусни таваҷҷуҳ изҳори хушнудӣ намуда, миннатдории хешро ба Сарвари давлат баён доштанд.
Манбаъ: Хадамоти матбуоти Раиси вилояти Суғд
Нет комментариев