Аз 1 январи соли 2019 арзиши патенти кор барои муҳоҷирон дар шаҳри Маскав аз 4,5 ҳазор то ба 5 ҳазор рубл (аз 68 то 76 доллар) боло меравад, хабар медиҳад ТАСС.
Раиси комисиияи Думаи шаҳри Маскав оид ба сиёсати иқтисодӣ ва молия Людимла Гусева дар ин робита гуфтааст, болоравии арзиши патент ба он хотир сурат мегирад, ки ба Маскав бояд муҳоҷирони соҳибкасбу дорои маълумоти дахлдор ва имкони кор кардан дар пойтахти Русия оянд.
“Аз ҷониби дигар, ба ин васила ба буҷет маблағи зиёдтар ворид гардида, онро ба рафъи эҳтиёҷоти иҷтимоӣ равона мекунем, ки то ки аз ҷумла барои муҳоҷирон низ кор дар шаҳри Маскав осонтару бароҳат шавад”, — иброз доштааст ӯ.
Қобили зикр аст, ки соли 2017 аз ҳисоби муҳоҷирон ба буҷети Русия беш аз 160 млрд. рубл (қариб 2,8 млрд. доллар) маблағ ворид шуд. Соли гузашта аз ҳисоби харидани патентҳои кор ба буҷети шаҳри Маскав 15,7 млрд. рубл (277 млн. доллар бо қурби ҳамон замон) ва давоми 5 моҳи соли равон – 7,7 млрд. рубл (122,6 млн. доллар) маблағи ворид гардидааст, ки нисбат ба ҳамин давраи соли гузашта 20% зиёдтар аст.
Дар ҳамин ҳол, дар муқоиса бо соли 2017 соли 2018 нархи патенти кор дар шаҳри Маскав 300 рубл – аз 4200 то ба 4500 рубл зиёд шуда буд.
Моҳи октябри соли ҷорӣ раиси шаҳри Маскав Сергей Собянин изҳор дошт, ки даромади пойтахти Русия аз ҳисоби муҳоҷирони кории қонқнӣ дар ҳоли афзоиш қарор дошта, то охири сол ба беш аз 16 млрд. рубл (245,2 млн. доллар) мерасанд.
Бино ба маълумоти ВКД, аз кишварҳои ИДМ дар Русия ҳамагӣ 8,5 млн. нафар муҳоҷирон кору зиндагӣ мекунанд, аз ҷумла: аз Украина – 2,2 млн., Ӯзбекистон – 1,9 млн. ва Тоҷикистон – 1 млн. нафар.
Мебояд гуфт, маблағи умумии пулҳои интиқолёфта аз Русия ба Тоҷикистон нимсолаи аввали соли 2018 – 1 млрд. 150 млн. долларро ташкил дод, ки нисбат ба ҳамин давраи соли гузашта 89 млн. доллар зиёдтар аст.
Бино ба маълумоти ташкилоти ҷамъиятии “Федератсияи муҳоҷирони Русия, аз оғози соли равон беш аз 1,7 млн. нафар шаҳрвандони Тоҷикистон ба қаламрави Русия ворид шуда, аз рӯи шумори муҳоҷирони дар Русия Тоҷикистон баъди Ӯзбекистон дар зинаи дуюм қарор дорад.
Манбаъ: https://news.tj
Нет комментариев