Филми тозаистеҳсоли ҳунарӣ таҳти унвони «Пиксел: Ҳифзи сайёраи Замин»
бо фурӯши 23 млн доллар мақоми нахустро дар ҷадвали нуфузсанҷии соҳаи тиҷорати синамоии «Бокс офис» ишғол намуд. Филми мазкурро коргардони машҳур Крис Коламбус дар асоси филмномаи Тим Херлихи, Тимоти Даулинг ва бо корсозии Майкл Барнатан, Крис Коламбус ва дигарон офаридаанд. Нақшҳои асосиро дар ин филми басо диданию лаззатбахш ҳунарпешаҳои соҳибистеъдоду нотакрор: Адам Сэндлер, Кевин Ҷеймс, Мишел Монахэн, Ҷош Гад ва дигарон иҷро намудаанд. Қиссаи басо ҷолибу ҷозиб шуруъ мегардад. Филми «Пиксел» дар асоси бозиҳои тахаюлии компютерӣ сохта шудааст. Акнун ба сайёраи мо боз одамони дигар сайёраҳо ҳуҷум мекунанду онро ба муҳосира мегиранд. Вале на ба шабеҳи дигар филмҳо — балки монанд ба бозиҳои компютерӣ. Мардум барои бо пикселҳои техникӣ ё худ меҳмонони нохонда ҷангидан, собиқ бозингарони номдори замонро ба мубориза даъват мекунанд. Қаҳрамонони филм мушобеҳи ҳаводиси қаблию гузашта бо тамоми ҳастии худ ба хотири наҷот додани одаму олам аз дасти деву дадҳои даҳшатӣ истифода мебаранд. Марому мақсади онҳо некӣ ба инсоният асту ҳифзи яклахтии муҳити будубоши мо – сайёраи заминӣ мебошад. Лаҳзаҳое ҳам фаро омад, ки бозигарони бозиҳои компютерӣ дар майдони реалӣ биҷанганд. Қаҳрамонони асосии филмро саргузашти пешгӯйнашаванда, ҳаводиси даҳшатбор, душманону бадандешон ва дигар хатарҳои маргбор дар пеш интизор асту, ҳадаф – имтиҳон ва санҷиши зиндагӣ. «Пиксел: «Ҳифзи сайёраи Замин» соли 2015-ум дар Амрико аз ҷониби ширкати филмофарии «Коламбия пикчерз» дар жанрҳои тахаюлӣ, ҷангӣ ва саргузашӣ бо харҷи 88 млн доллар наворбардорӣ шудааст ва то имрӯз зиёда аз 66 млн доллар ба хазинаи худ суд афзудааст. Ҳавасмандони тамошои ин филмро асосан табааи давлатҳое, чун Амрико, Испания, Фаронса ва кишварҳои муштаракулманофеъ ташкил медиҳанд. Давомнокии филм 106 дақиқаро ба таркиб дорад. «Пиксел»-ро аллакай пайгирони навгониҳои синамо дар бисёр кишварҳои олам бо шумули Тоҷикистони мо ҳам намоиш дода истодаанд.
Манбаъ: http://jahonnamo.tj/
Нет комментариев