Роҳбарони бозорҳо барои бартараф намудани фурӯшгоҳҳои ғайриқонунӣ 10 рӯз мӯҳлат гирифтанд.

0
505 просмотров

Дар маҷлисгоҳи Мақомоти иҷроияи ҳокимияти давлатии шаҳр таҳти раёсати Раиси шаҳри Хуҷанд Шарифзода Шариф Файз ҷаласаи Шӯрои шаҳрии мутобиқсозии методӣ оид ба тарбияи ҳуқуқии шаҳрвандон баргузор гардид.

raisi-sha-ri-xu-and

Дар кори ҷаласа муовинон ва роҳбари дастгоҳи Раиси шаҳри Хуҷанд, роҳбарони воҳидҳои сохтори мақомоти маҳаллӣ, нозироти андоз, прокуратура, шӯъбаи корҳои дохилӣ, бозорҳои шаҳр, кумитаи маҳаллаҳо иштирок доштанд. Дар ҷаласа ду масъала: таъмини иҷрои қонунгузории замин ва роҳҳои пешгирӣ намудани ҳолатҳои худсарона ишғол намудани қитъаҳои замин ва сохтмони худсарона ва вазъи иҷрои Қарори Раиси шаҳри Хуҷанд аз 19.04.2006, №282 «Оиди манъ намудани фаъолияти бозорҳои номуташаккил» мавриди баррасӣ қарор гирифт.

Доир ба масъалаи аввал раиси Кумитаи идораи замини шаҳр Абдухалил Ёрматов ба ҳозирин ахбори муфассал пешниҳод намуд. Қайд гардид, ки бо мақсади таҳкими корҳои фаҳмондадиҳӣ ва истифодаи самараноки замин аз ҷониби Кумитаи идораи замин дар якҷоягӣ бо сохторҳои қудратӣ рейдҳои муштарак гузаронида шуда, барои пешгирии ҳолати қонуншиканӣ дар мавриди истифодаи замин чораҳои амалӣ андешида мешавад.

Аз ҷониби Раиси шаҳри Хуҷанд доири ба роҳ мондани ҳамкорӣ бо раисони кумитаи маҳаллаҳо, бартараф намудани камбудиҳои ҷойдошта дар мавриди ҷудо гаштани қитъаи замини наздиҳавлигӣ дар селроҳаҳо,  пурзӯр намудани  чораҳои  бартараф намудани ишғоли худсаронаи замин ва ба ҳолати аввала баргардонидани онҳо  ба раиси Кумитаи идораи замин, нозирони минтақавӣ, раисони маҳаллаҳо, шӯъбаи шаҳрсозӣ ва меъморӣ дастуру супоришҳои мушаххас дода шуданд.

Аз рӯи масъалаи дуюм сармутахассиси шӯъбаи савдои мақомоти иҷроияи ҳокимияти давлатии шаҳр Абдуваҳҳоб Ҳомидов баромад намуд.

Дар маърӯзаи пешниҳодшуда қайд гардид, ки ҳоло дар шаҳри Хуҷанд бо мақсади таъмини саривақтии сокинон бо маҳсулоти ниёзи аввал  бозорҳои фурӯши маводи ғизо ташкил карда шуда, ба мардум хизмат мерасонанд. Баъди саволу ҷавоби масъулин ба роҳбарияти бозорҳои шаҳр, сохторҳои дахлдори назоратӣ супоришҳои мушаххас дода шуданд.

Аз ҷумла таъкид гардид, ки барои манъ намудани фаъолияти бозорҳои номуташаккил ва ба танзим даровардани тартиби фурӯши маҳсулоти хӯроквориро дар бозорҳои шаҳр чораандешӣ намоянд.

ishtirokdoron-alasa

Роҳбарони бозорҳои шаҳри Хуҷанд вазифадор карда шуданд, ки фурӯшандагони дар гирду атрофи бозор, қади роҳҳо ҷойгирбударо ба дохили бозор дароварда, ба вазъи санитарию эпидемологӣ аҳамият диҳанд. Ба ҳолатҳои худсарона сохтмони нуқтаҳои фурӯши маҳсулот дар ҳудуди бозорҳо хотима дода шаванд. Дар ҷойҳои ғайримуқаррарӣ, ки ба талаботи меъёрҳои санитарию-гигиенӣ ҷавобгӯ намебошад, ба фурӯш гузоштани маҳсулоти ширӣ, гӯштӣ ва полезӣ манъ карда шавад. Барои риоя накардани меъёрҳои санитарию-гигиенӣ ва санитарию эпидемологӣ нисбат ба шахсони масъул парвандаи ҳуқуқвайронкунии маъмурӣ сари вақт оғоз карда шавад.

Ба бахши нақлиёт ва алоқа супориши қатъӣ дода шуд, ки дар якҷоягӣ бо кормандони Бозрасии давлатии автомобилӣ ҳаракати нақлиётро дар қади роҳҳои дохилишаҳрӣ, алалхусус гирду атрофи бозори «Панҷшанбе», маҳаллаи 34, кӯчаи «Шарқ», хиёбони Исмоили Сомонӣ ва дигар самтҳоро ба тартиб дароранд.

Ба роҳбарияти Бозрасии давлатии автомобилӣ супориш дода шуд, ки барои худсарона нигоҳ доштани воситаҳои нақлиёт, барои дар кӯчаҳо, майдончаҳо, даромадгоҳҳо, дар хиёбон ва дигар ҷойҳои мақаррар карда нашуда, фурӯхтани мол чораҳои қонунӣ андешида, фаъолияти онҳо қатъиян манъ карда шавад.  Ба тамоми мутасаддиён супориш дода шуд, ки дар мӯҳлати 10 рӯз фурӯшгоҳҳои ғайриқонунӣ ва савдои  кӯчагиро барҳам дода, савдо ва фурӯши маҳсулотро танҳо дар дохили бозор ва мавзеҳои муқарраргардида ба роҳ монанд.

Ҷаласаи мазкур рӯзи ҷумъаи ҳафтаи гузашта, 14-уми октябр доир гардид. Барои тасдиқи суханҳои дар ҷаласа гуфташуда, рӯзи шанбе, 15-уми октябр дастаи Медиапортали “Тироз” аз гирду атрофи Бозори калонтарини шаҳр – “Панҷшанбе” дидан карда, чанд акс гирифтем. Бахусус, аз регистони «Панҷшанбе» ва кӯчаи Шарқи назди бозор. Худ аз аксҳои дар боло овардашуда қазоват намоед!

Хушбахтона, пас аз шунидани эродҳо ва гирифтани мӯҳлат аз ҷониби Раиси шаҳри Хуҷанд Шариф Шарифзода, дар рӯзи дигар, яъне рӯзи якшанбе 16-уми октябр аз ҷониби роҳбарияти бозор фурӯши молу маҳсулот дар регистони бозори “Панҷшанбе” пурра қатъ гардонида шуда, фурӯшандагон ба дохили бозор дароварда шуданд.

Мутаассифона, ҳолати фурӯши молу маҳсулоти кишоварзӣ дар кӯчаи Шарқ боз ҳамон ҳасту ҳамон!!! Боз фурӯшандагон роҳи гаштугузори шаҳрвандонро ба қавле “банд” намуда, ҳолати ногуворро эҷод мекунанд! Шаҳрвандон наметавонанд бе мушкиливу душворӣ ба нақлиёти мусофиркашон нишинанд!

Мусъулону роҳбарони бозори “Панҷшанбе”-ро зарур аст, ки дар асоси дастуру супоришҳои Раиси шаҳри Хуҷанд Шариф Шарифзода ин мавзеи хеле безебро низ ба тартиб дароранд. Зеро, барои онҳо 10 рӯз мӯҳлат дода шудааст, ки аз он аллакай се рӯзаш гузаштааст!  

 

Нет комментариев

Также рекомендуем