Роҳҳои нави табобати бемории сил

0
211 просмотров

Ба ҳамагон маълум аст, ки бемории сил дар Тоҷикистон яке аз мушкилиҳои асосӣ ва самтҳои афзалиятноки фаъолияти тамоми системаи тандурустии кишвар мебошад. Дар солҳои сипаригашта аз ҷониби Ҳукумати Ҷумҳурии Тоҷикистон якчанд барнома оид ба пешгирӣ ва мубориза бар зидди бемории сил таҳия ва қабул гардидаанд.

Табобат бо Бедаквилин-5

Дар баробари ин, аз тарафи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо мақсади амалинамоии барномаҳои қабулгардида тамоми чораҳои зарурӣ андешида шудааст. Аз ҷумла, ба роҳ мондани усулҳои нави ташхису табобати гирифторони шакли мутобиқгаштаи бемории сил яке аз вазифаҳои асосист.

Маросими супоридани Бедаквилин

Ин нуктаро муовини якуми вазири тандурустӣ ва ҳифзи иҷтимоии аҳолии Ҷмуҳурии Тоҷикистон Умарзода Саида Ғайрат дар маросими супоридани дорувории нави зиддисилӣ дар Маркази миллии бемориҳои шуш, сил ва ҷарроҳии қафаси сина бори дигар ёдовар шуд. Ӯ ҳамчунин зикр намуд, ки “Дар ибтидои соли 2009 дар Тоҷикистон дар сатҳи ноҳияҳои пилотӣ табобати беморони шакли мутобиқгаштаи сил оғоз карда шуда буд ва дар охири соли 2014 табобати чунин шаклҳои беморӣ дар тамоми кишвар бо дастгирии шарикони байналмилалӣ имконпазир шуд.

Дар айни замон усулҳои табобати дарозмуддати беморони шакли мутобиқгаштаи сил мавриди истифода қарор доранд, ки аз 20 то 36 моҳро бо истифодаи комбинатсияи маводҳои дорувории зиддисилии қатори дуюм, дарбар мегирад. Идоракунии табобати чунин ҳолатҳо хеле душвор буда, маблағҳои зиёд ва потенсиали кадрии пуртаҷрибаро талаб менамояд.”

Табобат бо Бедаквилин-2

Дар маросими расмии супоридани маводи дорувории “Бедаквилин” ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон барои табобати беморони гирифтори шаклҳои гуногуни мутобиқгаштаи бемории сил, ки тариқи барномаи хайриявии “Ҳамкории Боздошти Сил” аз тарафи Оҷонсии ИМА оид ба рушди байналмилалӣ (USAID) сурат мегирад, муовини Сафири ИМА дар Ҷумҳурии Тоҷикистон, хонум Люси Ҷилка, намояндагони масъули дафтари ЮСАИД дар Ҷумҳурии Тоҷикистон, ташкилотҳои байналмилалие, ки дар самти мубориза бо бемории сил уор мебаранд иштирок доштанд. Директори Филиали KNCV дар Ҷумҳурии Тоҷикистон хонум Мавлуда Маҳмудова оиди татбиқи реҷаҳои табобати беморони гирифтори шаклҳои мутобиқгаштаи бемории сил бо доруи нав BDQ дар Тоҷикистон, зарурати дастрас намудани ин намуди доруворӣ ва тарзи дурусти истифодаи онро шарҳ дод.

Табобат бо Бедаквилин-1

Дар даҳсолаи охир барои ҳалли ин масъала тадқиқотҳои зиёд оиди коркарди маводҳои нави доруворӣ мисли Бедаквилин гузаронида шудаанд. Солҳои охир (2014-2016) зиёда аз 40 давлати ҷаҳон (аз ҷумла, Россия, Арманистон, Гурҷистон, Ӯзбекистон, Ҳиндустон, Бангладеш, Африқои Ҷанубӣ ва ғайра) бо истифодаи дорувории нав бо номи Бедаквилин ба табобати беморони гирифтори шаклҳои васеи мутобиқгаштаи сил (ШВМС) оғоз намуда, натиҷаҳои назаррас ба даст оварданд.

Табобат бо Бедаквилин-3

Дар Ҷумҳурии Тоҷикистон низ аз соли 2015 вориднамоии Бедаквилин барои табобати беморони шакли мутобиқгаштаи сил аз ҷониби ташкилоти «Табибон бидуни марз» оғоз гардида, то охири соли 2016-ум 17 нафар беморон бо табобат фаро гирифта шудаанд.

Табобат бо Бедаквилин-6

Қайд кардан ба маврид аст, ки яке аз тавсияҳои Ташкилоти Умумиҷаҳонии Тандурустӣ дар раванди татбиқи табобат бо Бедаквилин ин ташкил намудани шароитҳои мусоид барои гузаронидани мониторинги фаъоли бехатарии доруҳо ҳангоми табобат, аз ҷумла саривақт гузаронидани ташхисҳои биёкимёвӣ, сабти бурқии кори дил, санҷиши қобилияти шунавоӣ ва ғайра мебошанд. Баҳри саривақт гузаронидани ташхисҳои номбаршуда аз ҷониби Намояндагии ташкилоти KNCV дар Тоҷикистон бо маблағгузории Оҷонсии ИМА оид ба рушди байналмиллалӣ барои муассисаҳои зиддисилии ш.Душанбе, ноҳияи Рўдакӣ ва Маркази миллии бемориҳои шуш,  сил ва ҷарроҳии қафаси сина дастгоҳҳои сабти барқии кори дил, аудиометр, қадченкунак, тарозу, негатоскоп харидорӣ ва дастрас карда шудаанд.

Кабули доруи нав

Дар охир муовини якуми вазири тандурустӣ ва ҳифзи иҷтимоии аҳолии Ҷмуҳурии Тоҷикистон Умарзода Саида Ғайрат қайд кард, ки пайдоиши маводи дорувории зиддисилии нав мисли Бедаквилин барои саривақт фарогирии беморони гирифтори ШВМС дар Тоҷикистон ба табобати зарурӣ имконият дода, барои ноил шудан ба натиҷаҳои назаррас дар самти табобат ва боздошти фавти беморони гирифтони ШВМС мусоидат хоҳад кард.

Нет комментариев

Также рекомендуем

Боздиди тоҷирони Қазоқистон аз Душанбе

Панҷумин ҳамоиши доираҳои тиҷоратии Тоҷикистону  Қазоқистон 4 июни соли равон  дар Душанбе баргузор мегардад. Интизор меравад, ки  дар ҳамоиш роҳбарону намояндагони беш аз 30 ширкати ...