Рӯзи профилактика дар радиои «Тироз»

1
529 просмотров

Аксар вақт диққати моро навиштаҷот ё эълон дар телевизион ва радио таҳти унвони «Рӯзи профилактика»  ба худ ҷалб месозад. Бо саволе ба худ муроҷиат мекунем, ки ин чӣ гуна рӯз будааст, як рӯзи пахш нашудани барномаҳо кормандони телевизион ва радио бо чӣ корҳо машғул мешуда бошанд?

Ҳафтаи сипаригардида, мо ба иттилои шунавандагон расонида будем, ки рӯзи душанбеи 15-уми июни соли ҷорӣ, дар радиои Тироз «Рӯзи профилактика» гузаронида мешавад ва барномаҳои мо рӯзи оянда рӯи мавҷ хоҳанд баромад.

Субҳи рӯзи гузашта, радиои Тироз фазои дигар дошт, кулли кормандон на бо либоси корӣ,  балки либосҳои кӯҳантарро ба бар намуда, дар коргоҳ ҷамъ омаданд. Дар ин рӯз, аз корманди техникӣ оғоз карда, то директори генералиамон Хуршед Улмасов ҳама саргарми кор буданд. Агар ҳамаррӯза онҳо аз қаламу қоғаз истифода баранд, дар ин рӯз бошад ин олоти меҳнатиашонро ба ҷорӯбу воситаҳои тозакунанда иваз намуданд.  Яке ҳуҷҷатҳоро ҷобаҷо мегузошту дигаре таҷҳизотҳои техникӣ, аз қабили компютер, микрофон, мавҷпахшкунак ва дигар асбобҳоро аз назар мегузаронид, сеюми дару тирезаҳоро тоза мекард. Ҳатто посбони коргоҳамон амаки Инъомҷон хеле серташвиш буд. Ӯ барои  ҳашарчиён  оши палав мепухт.

Кормандон баъди ба итмом расонидани корҳои дохили коргоҳ, ба дастаҷамъона аз хасу хошок тоза намудани майдончаи назди радио шурӯъ намуданд. Дар ин рӯз ҳамкорамон Эшқул Файзуллоев, ки ҷавони хеле хушзавқу шӯхтабиат аст, гоҳе бо овози баланд суруд мехонду гоҳе бо латифаи намакин таъби ҳашарчиёнро шод менамуд.  Як чӣ гӯям бовар намекунед, ҳатто директори генералиаамон ба шӯхиҳои ӯ шарик шуда, ҳамаро механдониданд.

Хулоса, «Рӯзи профилактикӣ» дар радиои Тироз хеле ҷолиб гузашт. Мо ба чунин ақидае омадем, ки меҳнати коллективона  кору фаъолиятро самараноку шавқовартар мегардонидааст.

Баъди ба анҷом расидани корҳои профилактикӣ, ки то соати расо 16:30 дақиқа  идома ёфт, маҷлиси ҳафтаина гузаронида шуд. Дар он кормандон андешаи худро бобати боз ҳам беҳтар гардонидани барномаҳои радио иброз намуданд.

Ана ҳамин тавр, дар ду моҳ як маротиба мо дар радиои Тироз «Рӯзи профилактикӣ»  мегузаронем.

 

1 comment

  1. Саодат Назарова 17 Июнь, 2015 at 13:38 Ответить

    Ман бисёр вакт бо хамин савол мурочиат мекардам, акнун фахмидам, ки рузи профилактики чи гуна руз будааст

Опубликовать новый комментарий

Также рекомендуем