Дар тантанаи бошукӯҳи Рӯзи шаҳри Хуҷанд, ки дар назди театри Камоли Хуҷандӣ баргузор гардид, Ҳунарманди мардумии Ҷумҳурии Тоҷикистон Сайрам Исоева соҳиби унвони баланди “Шаҳрванди фахрии шаҳри Хуҷанд” шуд.
Сайрам Исоева 24-уми ноябри соли 1942 ба дунё омадааст. Донишкадаи театрию бадеии шаҳри Тошкандро соли 1964 хатм кардааст. Ҳунарпеша ва коргардони Театри давлатии мусиқию мазҳакавии ба номи Камоли Хуҷандӣ (1964-2006), саркоргардони Театри давлатии мусиқию мазҳакавии ба номи Камоли Хуҷандӣ (аз соли 2006 то 2013).
Нақши аввалинашро дар намоишномаи «Гавҳари шабчароғ»-и С.Улуғзода (холаи Зиёда) бозидааст. Зиёда аз 100 нақш офаридааст, аз ҷумла Нози («Ҷанги тан ба тан»-и М.Байчиев), Робия («Суруди нотамом»-и А.Атобоев), Аза («Лӯлидухтар Аза»-и М.П.Старитский), Сита («Рамаяна»-и А.Гусев), Мирандолина («Соҳиби меҳмонхона»-и П.Бомарше), Шаҳло («Шаҳло»-и А.Шукӯҳӣ), Сотти («Исёни арӯсон»-и Саид Аҳмад) ва ғайра.
Коргардони чанд намоишнома, ба монанди «Маугли»-и Р.Киплинг, «Имтиҳон» ва «Баъди имтиҳон»-и Ф.Ансорӣ, «Дӯстӣ», «Сайр дар соли нав»-и С.Исоева, «Исёни арӯсон»-и Саид Аҳмад, «Арӯси шаҳрӣ»-и Н.Исломов мебошад.
Бо киностудияҳои «Тоҷикфилм» ва «Узбекфилм» ҳамкорӣ намуда, чандин нақшҳо, аз қабили Гулнор «Духтари сеюм»-и Анвар Тӯраев (1969), Гурдофарид «Рустам ва Сӯҳроб» (коргардон Б.Кимёгаров, 1971), Зумрад «Сирри оила» (коргардон Валерий Аҳадов, 1983), Малика «Агар дӯст дорӣ» (коргардон А.Куддусов), Малика «Кӯи сафед» (коргардон А.Ҳамроев), Нодира «Танҳо миёни мардум» (коргардон Комил Ёрматов) ва ғайраро офаридааст.
Бо орденҳои Байрақи Сурхи Меҳнат, Дӯстии халқҳо мукофотонида шудааст. Узви Иттифоқи синамогарони Тоҷикистон ва ИҶШС мебошад.
Соли 1971 барои хизматҳои шоёну бузург бо унвони Ҳунарманди шоистаи Ҷумҳурии Тоҷикистон сарфароз гардид Аз соли 1987 Ҳунарманди халқии Ҷумҳурии Тоҷикистон мебошад. Аз соли 1964 инҷониб дар Театри давлатии мусиқию мазҳакавии ба номи Камоли Хуҷандӣ софдилонаву сабаландона фаъолият менамояд.
Устоди саҳна, устоди даҳҳо санъаткорон, Ҳунарманди мардумии Ҷумҳурии Тоҷикистон Сайрам Исоеваро бо унвони баланди «Шаҳрванди фахрии шаҳри Хуҷанд» самимона таҳният намуда, барояшон дарозумриву сарбаландиро таманно менамоем!
Нет комментариев