Сафари кории Пешвои миллат ба Бадахшони кӯҳӣ

0
252 просмотров

Субҳи имрӯз Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ бо вазъи иҷтимоӣ, иқтисодӣ, фарҳангии мардум, ифтитоҳи як зумра иншооти нав ва мулоқот бо сокинон дар рӯзҳои таҷлил аз ҷашни 27-солагии Истиқлолияти давлатии Ҷумҳурии Тоҷикистон ба Вилояти Мухтори Кӯҳистони Бадахшон ташриф оварданд.

Боздиди Президенти Ҷумҳурии Тоҷикистон муҳтарам Эмомалӣ Раҳмон аз ноҳияи Ванҷ оғоз гардид. Сокинони саодатманди ноҳияи Ванҷ Пешвои миллат муҳтарам Эмомалӣ Раҳмонро бо самимияти хосса истиқбол гирифтанд.

Фазои шукӯҳу шодӣ, фараҳмандӣ ва истиқболи гарм аз садоқат ва меҳру муҳаббати самимии мардуми ноҳияи Ванҷ нисбат ба Пешвои муаззами худ муҳтарам Эмомалӣ Раҳмон шаҳодат медод.

Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Ванҷ бинои наву замонавии Муассисаи таҳсилоти миёнаи умумии рақами 4-ро мавриди баҳрабардорӣ қарор доданд.

Бинои нави Муассисаи таҳсилоти миёнаи умумии рақами 4 дар маркази ноҳияи Ванҷ барои 1280 нафар хонанда дар ду баст пешбинӣ гардида, дорои муосиртарин шароити таълиму тарбия барои насли наврас мебошад. Иншооти мазкур аз се бинои ду ва сеошёна иборат мебошад.

Бинои нави Муассисаи таҳсилоти миёнаи умумии № 4-и ноҳияи Ванҷ дорои 28 синфхонаи таълимӣ, аз ҷумла, физикаю химия, технологияи компютерӣ, лингафонӣ барои забонҳои русию англисӣ ва озмоишгоҳи фанҳои физикаю химия буда, бо тамоми ашёи хониш ва аёнияти таълимӣ таъмин аст.

Корҳои сохтмонӣ дар бинои нави Муассисаи таҳсилоти миёнаи умумии рақами 4-и ноҳияи Ванҷ соли 2016 бо дастуру ҳидоятҳои бевоситаи Сарвари маорифпарвари мамлакат дар масоҳати 4254 метри мураббаъ оғоз гардида, иншоот як сол қабл аз муҳлат бо сифати баланди меъморӣ ва муҷаҳҳаз бо тамоми лавозимоти зарурии хониш мавриди истифода қарор дода шуд.

Пешвои миллат муҳтарам Эмомалӣ Раҳмон зимни боздид аз синфхонаҳои таълимӣ ба сифати корҳои сохтмонӣ баҳои баланд доданд ва таваҷҷуҳи омӯзгоронро ба истифодаи мақсаднок аз шароити муҳайёгардида барои таълими босифати насли наврас ва ҷалби бештари онҳо ба забономӯзию аз худ намудани нозукиҳои технологияи муосир ҷалб намуданд.

Тамоми синфхонаҳои муассисаи таълимии мазкур бо системаи махсуси замонавӣ гарм карда мешаванд ва дар назди муассисаи таълимӣ барои ҳолатҳои зарурӣ анбори махсуси нигаҳдории ангишт ҳам сохта шудааст.

Толори маҷлисгоҳи ин муассисаи таълимӣ дорои 220 ҷойи нишаст буда, барои баргузории ҳамоишу чорабиниҳои гуногун хеле мувофиқу муносиб мебошад. Президенти мамлакат муҳтарам Эмомалӣ Раҳмон зимни шиносоӣ бо шароити маҷлисгоҳи муассисаи таълимии мазкур ҷиҳати ҷалби хонандагон ба маҳфилҳои гуногун ва ташкили ҳар гуна чорабиниҳои судманд дар самти боло бурдани савияи дониши насли наврас ба омӯзгорон дастуру ҳидоятҳои муфид доданд. Дар муассисаи таълимии мазкур вобаста ба талаботи давру замон китобхонаи электронӣ низ муҳайё карда шудааст.

Мактаб дорои толори варзишӣ бо 85 ҷойи нишаст мебошад. Дар толори кушоду барҳавои варзишии муассисаи таълимӣ барои хонандагон шароити хуби баргузории бозиҳои гуногун муҳайё карда шудааст. Дар ин ҷо майдончаҳо барои бозии футбол, волейбол ва баскетбол низ сохта шудаанд.

Атрофи бинои нави Муассисаи таҳсилоти миёнаи умумии рақами 4-и ноҳияи Ванҷ дар масоҳати 1200 метри мураббаъ сабзазор карда шуда, барои равшаннамоӣ 6 адад сутунпоя бо баландии 3,5 метр ва 6 адад бо баландии 9 метр насб гардидаанд. Иншоот бо камераҳои назоратии дохилию беруна ва системаи аз сӯхтор огаҳкунанда таъмин мебошад.

Пешвои миллат муҳтарам Эмомалӣ Раҳмон зимни суҳбат бо хонандагону омӯзгорон ифтитоҳи бинои нави таълимии Муассисаи таҳсилоти миёнаи умумии рақами 4 дар маркази ноҳияи Ванҷро дар рӯзҳои таҷлил аз 27-солагии Истиқлолияти давлатии Ҷумҳурии Тоҷикистон ба онҳо табрик намуданд.

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба фаъолияти бинои нави маъмурии Мақомоти иҷроияи  ҳокимияти давлатии ноҳияи Ванҷ оғози расмӣ бахшиданд.

Бинои нав   аз 3 ошёна иборат буда, бо тарҳи зебою замонавӣ дар масоҳати 2033 метри мураббаъ қомат афрохтааст ва дорои 52 ҳуҷраи корӣ мебошад.

Пешвои миллат муҳтарам Эмомалӣ Раҳмон зимни боздид аз ҳуҷраҳои корӣ ба сифати корҳои сохтмонӣ баҳои баланд дода, барои боз ҳам беҳтар намудани фаъолияту хизматрасонӣ ба сокинон ва кормандони мақомот дастуру ҳидоятҳои мушаххас доданд.

Ифтитоҳи бинои Қасри фарҳанг дар маркази ноҳияи Ванҷ 11.09.2018Дар ноҳияи Ванҷ Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  бинои Қасри фарҳангро мавриди истифода қарор доданд.

Пешвои миллат муҳтарам Эмомалӣ Раҳмон ба корҳои сохтмонӣ ва тарҳи меъмории бино баҳои баланд дода, иншооти муосири фарҳангиро туҳфаи арзишманд барои аҳли ҳунар ва сокинони ноҳияи Ванҷи Вилояти Мухтори Кӯҳистони Бадахшон маънидод намуданд.

Корҳои сохтмонӣ дар бинои Қасри фарҳанги ноҳияи Ванҷ соли 2016 оғоз гардида, аз тарафи коргарону мутахассисони маҳаллӣ ба анҷом расонида шудаанд.

Иншооти мазкур аз ду ошёна иборат буда, толори барҳавои он дорои 350 ҷойи нишаст мебошад. Дар ошёнаи дуюм пешайвон бо 76 ҷойи нишаст, ҳуҷраҳо барои рақсҳои миллӣ, дӯзандагӣ ва утоқҳои корӣ барои ҳайати кормандон ҷойгир шудаанд.

Ифтитоҳи бинои маъмурии шуъбаи Кумитаи давлатии амнияти миллии Ҷумҳурии Тоҷикистон дар ноҳияи Ванҷ 11.09.2018

Дар доираи сафари корӣ дар шаҳру ноҳияҳои Вилояти Мухтори Кӯҳистони Бадахшон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Ванҷ бинои маъмурии шуъбаи Кумитаи давлатии амнияти миллии Ҷумҳурии Тоҷикистонро, ки бо тарҳи хосса бунёд гардидааст, ифтитоҳ намуданд.

Дар ин ҷо ба Пешвои  миллат муҳтарам Эмомалӣ Раҳмон иттилоъ доданд, ки корҳои сохтмонӣ дар иншооти мазкур моҳи сентябри соли 2015 оғоз гардида буданд ва дар давоми се сол иншооти мазкур бо ҷалби бинокорони маҳаллӣ бо сифати баланд ба истифода дода шуд.

Пешвои миллат муҳтарам Эмомалӣ Раҳмон ифтитоҳи бинои навро дар рӯзҳои таҷлил аз ҷашни 27-умин солгарди Истиқлолияти давлатии Ҷумҳурии Тоҷикистон ба кормандони соҳа табрик намуданд.

Президенти Ҷумҳурии Тоҷикистон муҳтарам Эмомалӣ Раҳмон баъди ифтитоҳи як зумра иншооти гуногун бо сокинон ва фаъолони ноҳияи Ванҷ мулоқоти озоду самимӣ доир намуданд.

Пешвои миллат муҳтарам Эмомалӣ Раҳмон дар оғози суханронӣ ҳамаи иштирокчиёни мулоқотро ба ифтихори 27-умин солгарди Истиқлолияти давлатии Ҷумҳурии Тоҷикистон табрик намуда, ифтитоҳи иншооти навро ба таваҷҷуҳи давлату Ҳукумати Тоҷикистон дар самти рушди ноҳияҳои дурдасти мамлакат марбут донистанд.

Таъкид гардид, ки ноҳияи Ванҷ дар даврони соҳибистиқлолии мамлакат ҳамаҷиҳата рушд намуда, дастовардҳои назаррас дар тамоми бахшҳо ба назар мерасанд.

Манбаъ: Хадамоти матбуоти Президенти Ҷумҳурии Тоҷикистон

Нет комментариев

Также рекомендуем

Лидер нации наградил спортсменов по итогам года

Лидер нации  уважаемый Эмомали Рахмон подписал 26 декабря с.г. Распоряжение о награждении таджикских спортсменов. Согласно данному  распоряжению, 25 спортсменов и их тренеры получат денежные премии ...