Сарбаланду некном аст аз санъати сарояндагӣ!

0
424 просмотров

Дар ин рӯзҳои тирамоҳи заррин табиат ба худ зебоии зиёдеро мегирад ва ба инсонҳо, бахусус аҳли ҳунару фарҳанг илҳоми тозае мебахшад, то ки онҳо бо суруду таронаҳои худ қалби моро шод гардонанд. Яке аз падидаҳои нодири тирамоҳи имсола таҷлили 35-солагии фаъолияти эҷодии сарояндаи хушовозу соҳибҳунар, устоди санъати эстрадаи тоҷик, дорандаи Ифтихорномаи Президенти Ҷумҳурии Тоҷикистон, устоди даҳҳо ситораҳои эстрадаи вилояти Суғд Анвар Қосимов мебошад.

anvar-kosimov-6

Ба ин муносибат рӯзи ҷумъа, 21-уми октябри соли 2016 дар толори Кохи ба номи устод Абӯабдуллоҳ Рӯдакӣ садҳо нафар мухлисону ҳаводорон, дӯстону рафиқон, шогирдону ҳамкасбон ва наздикону пайвандон ҷамъ омаданд. Бо баробари муборакбодӣ, барои ин санъаткори асил ва фидоии касбу кори худ сиҳатмандии комил, комёбиву музаффариятҳо дар ҷодаи санъату сарояндагӣ таманно нмуданд. Бо хоҳишу дархости сершумори шунавандагону дӯстдорони суруду таронаҳои устод Анвар Қосимов рӯзи шанбе, 22-юми октябр консерти ҳисоботии ҳунарманди мумтозу хушсалиқа ва маъруф таҳти унвони “Садои дил” боз ҳам дар саҳнаи Кохи Рӯдакӣ манзур гардид.

anvar-kosimov-10

Дар ҳақиқат, ҷавонони давраи истиқлолият бо сурудҳои дилнишину рӯҳнавози устод Анвар Қосимов ба камол расидаву ҳаёти худро рангину ширин кардаанд. Зеро, ҳар як суруду таронаи ин сарояндаи нотакрор ба қалбҳо суруру шодмонӣ ва нерӯи тоза мебахшаду тори қалби ҳар як шунавандаро навозиш менамояд. Барояш дилхушӣ ва дарозумрӣ ҳадя мекунаду ба шоҳроҳи дурусти зиндагӣ ҳидоят менамояд. Ин аст, ки сурудҳои устод Анвар Қосимов дар қалби мухлисону ҳаводорон маскан гирифтаву ҳамагонро мафтун гардонидааст. Мафтуни зиндагии рангин, мафтуни ишқу ошиқӣ, мафтуни Ватану диёри зебоманзар. Воқеан, ҳар як суруди ин санъаткори асил ва маъруф инсонро ба ҳаёту зиндагонӣ дилгарм менамояд. Бахусус ошиқони шайдо ва дӯстдорони беҳамторо.

anvar-kosimov-8

Дӯстдорону мухлисони сершумор суруду таронаҳои дилнишину ҷаззобро на танҳо аз саҳнаҳои ҳунар, балки тавассути радио ва телевизионҳои кишвар, бахусус радиоҳои маҳаллӣ шунида, ғизои зиёди маънавӣ мегиранду хеле баҳраманд мешаванд. Ҳамзамон, ҳар як суруди устод Анвар Қосимовро зам-зама намуда, ҳаловат мебаранд.

Дар рӯзи таҷлили 35-солагии фаъолияти эҷодӣ низ суруду таронаҳои наву рӯҳнавози сарояндаи хушовоз ва соҳибистеъдод манзури тамошобинони сершумор гардонида шуд. Мухлисону дӯстдорон бо кафкӯбиҳои бардавом ҳар як суруду таронаҳоро бо албатта сарояндаи нотакрораш истиқбол гирифтанд. Рақсҳои зебои гулдухтарони гурӯҳҳои рақсӣ низ ба барномаи консертӣ ҷилои тозае бахшиданд.

Аз номи тамоми мухлисону ҳаводорон, бахусус кормандони ҶДММ  ШТРР “Тироз” ва Медиапортали “Тироз” устод Анвар Қосимовро бо 35-солагии фаъолияти эҷодиашон самимона табрик намуда, барояшон сиҳатмандии бардавом, дарозумриву сарбаландии ҳамешагӣ ва дар ҷодаи санъат музаффариятҳои нав таманно менамоем.

                                                                                                                     Медиапортали “Тироз”

 

Нет комментариев

Также рекомендуем