Сайре ба диёри биҳиштӣ

0
330 просмотров

Водии Раштонзамин аз замонҳои хеле қадим таваҷҷӯҳ ва диққати сайёҳону ҷаҳонгардонро ба худ ҷалб намудааст. Ҳанӯз дар охирҳои ҳазорсолаи якуми то аҳди мо тавассути Роҳи Абрешим, ки водии Олою Рашт, шаҳру рустоҳои Ҳисору Хатлон, Балху Ирон ва Ироқро убур намуда, то баҳри Миёназамин  мерасид ва Машриқу Мағрибро бо ҳам мепайваст, овоза ва шӯҳрати ин сарзамини биҳиштосоро ба оламиён муаррифӣ менамуд.

Табиати афсункору назаррабои дараҳои Камаробу Ясман, Ҳоиту Вахё, Муҷихарфу Ҳакимӣ хеле нотакрору дилрабои буда, аз беҳтарин макони сайру саёҳат ба шумор меравад. Чандин солҳост, ки диққати дӯстдорону шавқмандони сайёҳат ва кӯҳнавардиро қуллаҳои осмонбӯси Исмоили Сомонӣ, Пётри 1, пиряхҳои Федченко ва Москвин ба худ ҷалб намудааст.  Ин сарзамин бо сарватҳои зеризаминӣ ва канданиҳои фоиданоку конҳои табиӣ, аз қабили ангишту алюминий, намаксангу хоки кулолӣ ва мармару фарфор низ шуҳрат дорад. Аз конҳои Назарайлоқу Миёнаду, Мук, Лахш ва Кашот ангишти аълосифат истихроҷ мегардад. Захираҳои тиллои дарёи Мук маълуму машҳур аст.

Ин водӣ бо мавзеъҳои табобатии худ низ овозадор аст. Гармчашмаи Тамдиқул хусусияти табобатӣ дошта, барои муолиҷаи касалиҳои гуногун хеле созгор аст.Меҳмоннавозии самимӣ ва меҳнатдӯстиву садоқатмандии сокинони диёри Қаротегин ба ҳамагон маълуму машҳур буда, ҳар касе меҳмони ин диёр мегардад, инро бо чашмони худ эҳсос менамояд.

Бо шарофати истиқлолияту ваҳдат ин гӯшаи Ватани маҳбуб рӯз то рӯз обод гардида, рушду нумӯъ ёфта истодааст. Имрӯзҳо сокинони ноҳияҳои Нурободу Тоҷикобод, Рашту Ҷиргатол ва Тавилдара бо шукргузорӣ аз рузгори тинҷу осуда барои расидан ба нияту ҳадафҳои  кору пайкор доранд.

Дар навоҳии водии Рашт барои рушди соҳаҳои мухталифи хоҷагии халқ тамоми шароитҳо муҳайё буда, табиати афсонавии Раштонзамин барои инкишофи бахшҳои боғдорӣ, чорводорӣ, занбури асалпарварӣ ва сабзавоткорӣ хеле созгор аст.

Нет комментариев

Также рекомендуем