Тавре қаблан бо истинод ба маълумоти Кумитаи ҳолатҳои фавқулода ва мудофиаи граждании наздии Ҳукумати Ҷумҳурии Тоҷикистон (КҲФ ва МГ ҶТ) хабар дода будем, дирӯз, 12 август, тақрибан соати 16:30 дар ҳудуди ноҳияи Лахш чархболи МИ-8 бо 13 нафар куҳнавардон ва се нафар сарнишин ҳангоми бозгашт аз қуллаи Исмоили Сомонӣ дар поёноби пиряхи Фортамбек «нишасти дурушт» кард.
Тавре аз КҲФ ва МГ ҶТ хабар доданд, мутаассифона, дар садамаи мазкур 3 кӯҳнавард, шаҳрвандони Россия:
Тимур Барабанов (соли таваллудаш 1986),
Александр Абросимов (соли таваллудаш 1971)
ва Руслан Тараканов (соли таваллудаш 1976), инчунин 2 сарнишин – Музаффар Файзуллоев (соли таваллудаш 1947, шаҳрванди Тоҷикистон) ва Саидҷон Қобилов (соли таваллудаш 1967, шаҳрванди Тоҷикистон) ба ҳалокат расида, 12 нафар кӯҳнавардон ва як сарнишин наҷот дода шуданд. Дар айни ҳол наҷотёфтагон ҷароҳатҳои гуногун бардошта, зери назорати табибон қарор доранд.
Барои мушаххас намудани сабабҳои рӯй додани ин ҳодиса аз ҳисоби роҳбарони КДАМ, ВКД, КҲФ, Вазорати мудофиа ва Вазорати тандурустӣ ва ҳифзи иҷтимоии аҳолии Ҷумҳурии Тоҷикистон комиссияи ҳукуматӣ созмон дода, ба ҷойи ҳодиса сафарбар карда шуданд. Бо куҳнавардон тамос барқарор шуда, ҷойи ҳодиса сари вақт муайян карда шуд. Ба ҷойи ҳодиса 3 чархбол бо наҷотдиҳандагон ва кормандони тиб фиристода шуданд.
Раванди корҳои ҷустуҷӯӣ ва наҷотбахширо Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шахсан зери назорат гирифтаанд.
Чархболи МИ-8 бо 15 нафар кӯҳнавар ва се сарнишин ҳангоми бозгашт аз қуллаи Исмоили Сомонӣ дар поёноби пиряхи Фортамбек, ҳудуди ноҳияи Лахш ба садама дучор шудааст.
То ин замон расман шахсияти кӯҳнавардон расман пурра эълон нашудааст, аммо бархе расонаҳои хабарӣ навиштаанд, ки дар миёни кӯхнпавардони ба садама дучоршуда 11 нафар шаҳрвандони Федератсияи Россия, як нафар шаҳрвандаи Ҷумҳурии Беларус ва як шаҳрванди Испания мебошанд. Хабаргузории «Mash» ному насаби кӯҳнавардонро чунин зикр кардааст:
1. Дубина Виктор, соли таваллуд 1952
2. Барабанов Тимур, соли таваллуд 1986
3. Абросимов Александр, соли таваллуд 1971
4. Шихов Николай, соли таваллуд 1958
5. Миронов Сергей, соли таваллуд 1964
6. Андрей Родыген, соли таваллуд 1980
7. Сергей Матвеев, соли таваллуд 1977
8. Руслан Тараканов, соли таваллуд 1976,
9. Соболенко Александр, соли таваллуд 1970
10. Дмитрий Кумшаев, соли таваллуд 1964
11. Горбатюк Татьяна, соли таваллуд 1969
12. Труш Вячеслав, соли таваллуд 1974
13. Роберто Родриго, соли таваллуд 1969
14. Шубин Павел, соли таваллуд 1965
15. Фейгина Юлия, соли таваллуд 1976
Хотиррасон менамоем, ки қуллаи Исмоили Сомонӣ баландтарин қуллаи кӯҳ дар қаламрави Иттиҳоди Давлатҳои Мустақил буда, баландии он 7495 метрро ташкил медиҳад.
Манбаъ: АМИТ «Ховар»
Нет комментариев